Yehova a si me̱nde̱ lingane̱ wa yete̱na o si we̱li londise̱ lambo di buki ngud’ango̱. (2 Kor. 8:12) E̱ne̱ nde be bete̱medi ka belongedi bō̱ te̱nge̱. O̱nge̱le̱ mambo o málondise̱no̱. Bibe̱l mo̱ ná “Loba a titi nusite̱m na sim, o dimbea ebol’ańu.” (Bon. 6:10) To̱ wa pe̱ o si dimbea mo̱. O̱nge̱le̱ nje o málondise̱no̱ nate̱na wan; k’eyembilan o timbi diko̱m la Yehova, o malangwea bape̱pe̱ nja eno̱, o mádubisabe̱ pe̱ yen ebe. Ka nje te̱ o ńakino̱ o londise̱ pe̱ mambo ma mudī o tano̱ o te̱se̱, we ná o benga ńaka ná o we̱le̱ londise̱ nje o te̱se̱no̱ oteten a ponda. Na jongwane̱ la Yehova, we ná o tongwe̱le̱. Niponda weno̱ po̱ngo̱ miwe̱n o londise̱ lambo la mudī o te̱se̱no̱ o bola, wasa je̱ne̱ ne̱ni Yehova eno̱ jongwane̱ na namse̱ wa, o bwane̱ pe̱ nika muńe̱nge̱. (2 Kor. 4:7) Titimbe̱ ńo̱ngo̱ e me̱nde̱ lena wa minam minde̱ne̱.—Gal. 6:9. w23.05 31 § 16-18

Yehova e muńe̱nge̱ o lee̱ ba a to̱ndino̱ ná a do̱lisane̱ babo̱. Bibe̱l e makwalea ońola ngedi iba a langwedino̱ Yesu ná e nde Mun’ao ńa ndolo, a do̱lisanno̱. (Mat. 3:17; 17:5) Mo̱ o me̱nde̱ to̱ndo̱ senga Yehova a malangwea wa ná a do̱lisan wa e? Yehova a si makwalisane̱ biso̱ boso na boso, a makwalisane̱ nde biso̱ tongwea n’Eyal’ao. Je ná di “senga” doi la ndolo la Yehova tongwea na byala Yesu a langwedino̱ bokwedi bao. Yesu embilane̱ Sango ao o mbadi ńe ke̱nge̱nge̱. Di malanga so̱ te̱ ná Yesu a langwedi bokwedi bao ba jemea ba si ta ke̱nge̱nge̱ ná a to̱ndi babo̱, je̱ne̱ nde biana Yehova nde e o langweye̱ biso̱ nika. (Yohane 15:9, 15) Mitakisan mi po̱i te̱, nik’e si mapula kwala ná Loba a si do̱lisane̱ pe̱ biso̱. O diwengisan, mi mabola nde biso̱ epolo o lee̱le̱ nate̱na o njika dikala di to̱ndino̱ Loba di lakisanno̱ pe̱ mo̱.—Yak. 1:12. w24.03 28 § 10-11

We te̱ muyedi, ongwane̱ bana bo̱ngo̱ o boṅsane̱ malabe̱ bupisane̱ mimbu mabu. Ponda iwo̱, mokwa ma yo̱ki nde kwalea mambo ma njiba ma mombweye̱ babaedi, to̱ bete̱sedi jombwea bedangwedi; nde o be̱n te̱ nde dongo diwo̱ to̱ maba muna eno̱ ná alabe̱. Ongwane̱ pe̱ bana bo̱ngo̱ o so̱ṅtane̱ ná ba si me̱nde̱ po̱so̱be̱ ponda te̱ ba me̱nde̱no̱ le̱ke̱ dia mo̱ń. Bola la nika di me̱nde̱ jeka ná ba bwe ndutu ke̱ ba po̱si bato bape̱pe̱. (1 Tim. 6:18) Biso̱ be̱se̱ je ná di boṅsane̱ malabe̱ ma bwam ma masese̱ Yehova, ma membe̱ pe̱ bonasango asu. (Min. 25:11) E po̱i te̱ ná di kwaleye o patape̱m ońola lambo di po̱yedi biso̱, di si kwalea jombwea biso̱me̱ne̱ buka dime̱ne̱. (Min. 27:2; 2 Kor. 10:18) Jangame̱n nde bonde̱ Yehova, Eyal’ao, na tumba lao.—Bbī. 4:11. w23.04 24-25 § 17-18