Ponda te̱ di mapulano̱ no̱ngo̱ bedomsedi ba mweńa, jangame̱n wasa “bia nje ye jemea” la Yehova, na bupe̱ mo̱. (Efe. 5: 17) Ponda di mawasano̱ bete̱sedi ba Bibe̱l be mombweye̱ bete̱medi basu, je nde wasa bia jo̱nge̱le̱ la Loba jombwea di to̱ti. Di we̱le̱ pe̱ te̱ be bete̱sedi ba Bibe̱l o ebolo, di me̱nde̱ no̱ngo̱ bedomsedi ba bwam. Ńo̱ng’a musinged’asu Satan ńena ńe “bobe,” ńe nde ná di walame̱ne̱ na mambo ma nin wase ńai di si mabe̱ne̱no̱ pe̱ ponda o bolea Loba. (1 Yohane 5:19) Ye ná e po̱ ná kriste̱n e we̱le̱ myam, esukulu na ebol’a musawedi o epol’a boso o longe̱ lao, o mulopo ma wasa ne̱ni bata bola mambo ońola Yehova. Nik’e po̱yedi te̱ kriste̱n, ke̱ mo̱nge̱le̱ ma nin wase ma mábe̱ne̱ ngińa omo̱ń ao. Ye mbale̱ ná ma mambo ma titi bobe, nde ma s’angame̱n be̱ne̱ epol’a boso o longe̱ lasu. w24.03 24 § 16-17

Maka mambo maba ma mweńa o y’epasi: (1) Bate̱m ná sim ba be̱n ndutu. (2) Yehova a masunga biso̱ o ndut’asu. Mbadi po̱ ńe nde ná a mongwane̱ biso̱ o jemba ná longe̱ le ndutu o nin wase. To̱ná Yehova a kakanno̱ biso̱ ná di me̱nde̱ be̱ muńe̱nge̱ ke̱ di mabolea mo̱, a si langwedi biso̱ ná di me̱nde̱ be̱ne̱ longe̱ di si be̱n mitakisan to̱ mō̱. (Yes. 66:14) A mome̱le̱ biso̱ ná di soke̱ nde mo̱nge̱le̱ masu o kie̱le̱ ni maye̱, niponda di me̱nde̱no̱ be̱ne̱ longe̱ le bonam o bwindea. (2 Kor. 4:16-18) O mulemlem ma ponda pe̱, a mongwane̱ biso̱ o benga bolea mo̱ buńa te̱. (Mad. 3:22-24) Nje jeno̱ ná jokwa na byembilan ba baboledi ba Yehova ba jemea ba pond’a kwaṅ na ba nin we̱nge̱. Je ná di be̱ne̱ mitakisan m’epańpań. Nde di se̱medi te̱ na Yehova, a si me̱nde̱ caka biso̱ to̱ buńa.—Mye. 55:22. w23.04 14-15 § 3-4

Je ná jokwa na byembilan ba Yose̱f na Maria bena ba ta ba le̱le̱me̱ o sengane̱ manea, to̱ ponda nik’e tano̱ ndutu o bola. (Lukas 2:1-6) Ke̱ Maria e deme̱ la lambo ka myo̱di dibua, janea di baise̱ ná ba bole lambo di ta ndutu jita. Kaisa Augusto nu ta janea la Roma, a ta a te̱se̱ mbenda ná bato be̱se̱ bale no̱ngo̱be̱ muso̱ngi, moto te̱ o mao mundi. Yose̱f na Maria ba ta bangame̱n wala o Betlehem, nik’e ta nde lo̱ndo̱ la buka 150 kilometa owe̱ni ba tano̱ bangame̱n jondea na siba midongo. Di lo̱ndo̱ di wusa be̱ ndutu, sepo̱n ońola Maria. Yose̱f na Maria ba wusa jo̱nge̱le̱ ná di lo̱ndo̱ le ná di wana mbeu a ńolo ońola Maria to̱ muna nu ta mo̱ o dibum. Mo̱ e wusa nde be̱ ne̱ni yete̱na ses’a yadi ńaledi mo̱ o ngea e? Ba wusa taka oteten ońola nje ye ná e po̱ye̱ nu muna nu ta ńangame̱n timbe̱ Mesia. Mo̱ nika ńe̱se̱ e boli so̱ ná ba si sengane̱ ni mbenda e? Yose̱f na Maria ba ta ba be̱ne̱ njo̱m a bwam ná ba si sengane̱ ni mbenda, nde ba sengane̱. Yehova a bwane̱ sengane̱ labu muńe̱nge̱. Maria a tunge̱ o Betlehem esibe̱ sese to̱ po̱, a yai muna nu ta nu be̱ne̱ ja la bwam, ongwane̱ pe̱ o londise̱ eding’a Bibe̱l ewo̱!—Mik. 5:1. w23.10 8 § 9; 9 § 11-12