Lɔti muso ye filɛri kɛ a kɔfɛ

LƆTI n’a ka denbaya ani Ibrayima tun siginin be ɲɔgɔn fɛ Kanaan jamana na. Loon dɔ la, Ibrayima y’a fɔ Lɔti ye ko: ‘Biin man ca yan ka an ka bɛgɛnw bɛɛ balo. Sabari, an ka mabɔ ɲɔgɔn na. Ni i tagara faan kelen fɛ, ne bena taga faan dɔ fɛ.’

Lɔti ye jamana filɛ. A ye yɔrɔ cɛɲumanba dɔ ye, jii ni biin ɲuman tun ka ca yen k’a ka bɛgɛnw balo. O tun ye Zurudɛn mara ye. O lo y’a to Lɔti y’a ka denbaya n’a ka bɛgɛnw yɛlɛma o yɔrɔ la. A laban, u y’u ka soo lɔ Sodɔmu dugu kɔnɔ.

Sodɔmu dugumɔgɔw tun ka jugu kosɔbɛ. O tun be Lɔti dusu kasi sabu ale tun ye mɔgɔ ɲuman ye. O tun be Ala dusu kasi fana. A laban, Ala ye mɛlɛkɛ fila ci ka na a fɔ Lɔti ye ko a b’a fɛ ka Sodɔmu ni a gɛrɛfɛ dugu Gɔmɔri halaki u ka kɛwale juguw kosɔn.

Mɛlɛkɛw y’a gwan Lɔti kɔ ko: ‘Wuli k’i ka muso n’i denmuso fila minɛ ka taga ka bɔ yan.’ Lɔti n’a ka denbaya tun tɛ teliyara ka bɔ minkɛ, mɛlɛkɛw y’u minɛ u bolo ma ka bɔ n’u ye dugu kɔnɔ. O kɔ, mɛlɛkɛw la kelen y’a fɔ ko: ‘ A’ ye boli k’aw niin kisi! Aw kana filɛri kɛ aw kɔfɛ. Aw ka boli ka taga kuluw yɔrɔ la walisa aw kana halaki.’

Lɔti n’a denmusow ye kaan minɛni kɛ ani u bolila k’u yɔrɔ janya Sodɔmu ma. U ma lɔ yɔrɔ si la ani u ma filɛri kɛ u kɔfɛ. Nka, Lɔti muso ma kaan minɛni kɛ. U bɔra Sodɔmu dugu kɔnɔ ka janya dɔɔni, ale lɔra ani a ye filɛri kɛ a kɔfɛ. O kama, a yɛlɛmana ka kɛ kɔgɔ samasen ye. I ɲɛɛ b’a la jaa nin kan wa?

An be kalan ɲuman sɔrɔ nin maana nin na. O b’a yira ko minw be Ala kaan minɛ a b’u kisi, nka minw be ban k’a kaan minɛ, olu bena bɔnɛ u niin na.