I hakili to Lɔti muso ka koo la

Lɔti n’a facɛfitinin Ibrayima tun siginin be ɲɔgɔn fɛ Kanaan jamana na. Wagati dɔ nana se, Ibrayima ni Lɔti ka bɛgɛnw cayara fɔɔ yɔrɔ tun tɛ u labɔra tugun. Ibrayima y’a fɔ Lɔti ye ko: ‘An tɛ se ka sigi ɲɔgɔn fɛ yɔrɔ kelen na tugun. Sabari ka taga yɔrɔ min ka di i ye. Ne bena taga faan wɛrɛ la.’ O b’a yira ko Ibrayima t’a yɛrɛ nafa ɲini. Tiɲɛn tɛ?

Lɔti ye yɔrɔ cɛɲumanba dɔ ye dugu dɔ gɛrɛfɛ min be weele ko Sodɔmu. Jii ni biin ɲuman tun ka ca yen. O kama, Lɔti tagara sigi o yɔrɔ la n’a ka denbaya ye.

Sodɔmu n’a gɛrɛfɛ dugu Gɔmɔri dugumɔgɔw tun ka jugu kosɔbɛ. U tun ka jugu haali fɔɔ Jehova y’a latigɛ k’o duguw halaki. Nka, komi Jehova tun b’a fɛ ka Lɔti n’a somɔgɔw kisi, a ye mɛlɛkɛ fila ci ka na u lasɔmi ko: ‘Wuli joona ka bɔ dugu nin na. Jehova be nana a halaki.’

Lɔti tun tɛ teliyara ka bɔ. A tora ka munumunu. O kama, mɛlɛkɛw ye Lɔti, a muso, ani a denmuso fila minɛ u bolo ma ka bɔ n’u ye dugu kɔnɔ ani k’a fɔ u ye ko: ‘ A’ ye boli k’aw niin kisi! Aw kana filɛri kɛ aw kɔfɛ. N’o tɛ, aw bena sa!’

U sera dugu dɔ la min tɔgɔ ko Sowari. O kɔ, Jehova y’a kɛ tasuma ni kiribi bɔra sankolo la ka jigi Sodɔmu ni Gɔmɔri kan. O dugu fila halakira pewu. Lɔti ka muso ma mɛnni kɛ Jehova fɛ. A ye filɛri kɛ a kɔfɛ. O kama a yɛlɛmana ka kɛ kɔgɔ kabakurulaman ye. Nka Lɔti n’a denmusow kisira sabu u ye mɛnni kɛ Jehova fɛ. Siga t’a la, u dusu tiɲɛna k’a ye ko Lɔti ka muso ma mɛnni kɛ Jehova fɛ. Faan wɛrɛ fɛ, u dusu tun ka di sabu u ye Jehova ka cikanw sira tagama.