Jɔn lo ye Ala teriw ye?

Yesu Kirista ye Jehova dencɛ n’a teri fisaman kanulen ye. Sanni a ka ɲɛnamaya kɛ dugukolo kan i n’a fɔ hadamaden, Yesu tun be balo la sankolo la i n’a fɔ danfɛn hakililama barikaman dɔ ( Yuhana 17:5). O kɔ, a nana dugukolo kan ka tiɲɛn kalan mɔgɔw ye Ala koo la ( Yuhana 18:37). A fana y ’a hadamadenlama niin di ka hadamaden kanminɛbagaw kisi ka bɔ jurumu ni saya bolo (Romɛkaw 6:23). Sisan nin na Yesu ye Ala ka Masaya Masa ye, sankolola gɔfɛrɛnaman lo, min bena alijana lase dugukolo nin ma.—Jirali 19:16.

Mɛlɛkɛw fana ye Ala teriw ye. Mɛlɛkɛw m’u ka ɲɛnamaya daminɛ dugukolo kan i n’a fɔ hadamadenw. U danna sankolo la sanni Ala ka dugukolo dan ( Job 38:4-7). Mɛlɛkɛ miliyɔn caaman lo be yen (Daniɛl 7:10). O sankolola Ala teriw b’a fɛ mɔgɔw ka tiɲɛn lɔn Jehova koo la.— Jirali 14:6, 7.

Teriw be Ala fɛ dugukolo kan fana, a b’u weele a seerew. Kiritigɛyɔrɔ la, seere be min lɔn mɔgɔ wala koo min kan a b’o lo fɔ. Jehova Seerew be min lɔn Jehova n’a sagonata koo la, u b’o lo fɔ mɔgɔ tɔw ye (Esayi 43:10). I n’a fɔ mɛlɛkɛw b’a kɛ cogo min na, Seerew b’a fɛ k’i dɛmɛ ka tiɲɛn lɔn Jehova koo la. U b’a fɛ i fana ka kɛ Ala teri ye.