Tiɲɛn diinan be sɔrɔ cogo di?

N’i b’a fɛ ka kɛ Ala teri ye, Ala be sɔn diinan sira min ma, i ka kan k’o lo tagama. Yesu tun y ’a fɔ ko “batobaga sɛbɛw” tun bena Ala bato ka kɛɲɛ ni “tiɲɛn” ye ( Yuhana 4:23, 24). Sira sɔbɛ kelenpe lo be yen ka Ala bato (Efesekaw 4:4-6). Tiɲɛn diinan be mɔgɔ bila ka taga ɲɛnamaya banbali la, ani nkalon diinan be mɔgɔ bila ka taga halakili la.—Matiyu 7:13, 14.

I be se ka tiɲɛn diinan faranfasi ka lɔn i kɛtɔ k’a tagamabagaw kɔrɔsi. I komi Jehova ka ɲi, minw ye a batobaga sɔbɛw ye olu ka kan ka kɛ mɔgɔ ɲumanw ye. Cogo min na lɛmurubasun ɲuman be lɛmuruba cɛɲumanw den, o cogo kelen na tiɲɛn diinan be mɔgɔ cɛɲumanw den.—Matiyu 7:15-20.

Jehova teriw be bonya dunba la Bibulu kan. U b’a lɔn ko Bibulu bɔra Ala yɔrɔ. U be sɔn a ka fɔta k’u ɲɛminɛ u ka ɲɛnamaya kɔnɔ, k’u ka kunkow ɲɛnabɔ, ani k’u dɛmɛ ka Ala lɔn (2 Timote 3:16). U be waajuli min kɛ, u b’u jija k’o sira tagama.

Jehova teriw b’u ka kanuya yira ɲɔgɔn na. Yesu ye kanuya yira mɔgɔw la a kɛtɔ k’u kalan Ala koo la, ka banabagatɔw kɛnɛya. Minw be tiɲɛn diinan sira tagama, u fana b’u ka kanuya yira mɔgɔ tɔw la. I n’a fɔ Yesu, u tɛ mɔgɔw mafiɲɛya ko fantanw lo wala ko u bɔra siya wɛrɛ la. Yesu tun y ’a fɔ ko mɔgɔw tun bena a ka kalandenw faranfasi ka lɔn kanuya fɛ, u be min yira ɲɔgɔn na.—Yuhana 13:35.

Ala teriw be bonya la a tɔgɔ kan: Jehova. Ni mɔgɔ dɔ be ban k’i tɔgɔ fɔ, o tigi be se ka kɛ i teri sɔbɛ ye wa? Ayi! Ni teri b’an fɛ, an b’a tɔgɔ fɔ ani an b’a tɔgɔ ɲuman fɔ mɔgɔ wɛrɛw ɲɛ na. O cogo la, minw b’a fɛ ka kɛ Ala teriw ye u ka ɲi ka baara kɛ n’a tɔgɔ ye ani ka kuma a koo la mɔgɔ tɔw ɲɛ na. Jehova b’a fɛ an k’o lo kɛ.—Matiyu 6:9; Romɛkaw 10:13, 14.

I n’a fɔ Yesu, Ala teriw be mɔgɔw kalan Ala ka Masaya koo la. Ala ka Masaya ye sankolola gɔfɛrɛnaman ye, min bena dugukolo kɛ alijana ye. Ala teriw be nin kibaro duman tilan ni mɔgɔ tɔw ye Ala ka Masaya koo la.—Matiyu 24:14.

Jehova Seerew b’u seko kɛ ka kɛ Ala teriw ye. U be bonya la Bibulu kan ani kanuya be yen u ni ɲɔgɔn cɛ. U fana be baara kɛ ni Ala tɔgɔ ye ka bonya la a kan ani u be mɔgɔ tɔw kalan Ala ka Masaya koo la. Jehova Seerew be tiɲɛn diinan sira tagama bi dugukolo kan.