I ka ban nkalon diinan la!

Sitanɛ n’a ka jinɛw t’a fɛ i ka baara kɛ Ala ye. U b’a fɛ k’u seko kɛ ka bɛɛ kelen kelen kunnatiɲɛ Ala bolo. U b’a ɲini k’o kɛ cogo di? U ka fɛɛrɛ dɔ ye nkalon diinan ye (2 Kɔrɛntekaw 11:13-15). Diinan ye nkalontigɛla ye n’a tɛ Bibulu ka tiɲɛn kalan kɛ. Nkalon diinan be i n’a fɔ warisu, a be se ka bɔ fɛɛn lakika fɛ nka nafa t’a la. A be se ka kunko caaman lase i ma.

Diinan nkalontigɛ tɛ se ka diya abada Jehova, tiɲɛntigi Ala ye. Tuma min na Yesu tun be dugukolo kan diinan jɛnkulu dɔ tun be yen min tun b’a fɛ k’a faga. U tun b’a miiri k’olu ka batoli kɛcogo tun ye sira tilennen ye. U y ’a fɔ ko: “Fa kelenpe de be an fɛ, Ala do.” Yala Yesu sɔnna wa? Ayi! A y ’a fɔ u ye ko: “Aw fa ye min ye, Setane do.” ( Yuhana 8:41, 44). Bi, mɔgɔ caaman b’a miiri k’u be Ala batola, nka tiɲɛn na u be baara kɛla Sitanɛ n’a ka jinɛw lo ye!—1 Kɔrɛntekaw 10:20.

I n’a fɔ yiri tolinen be den gwomanw kɛ cogo min na, nkalon diinan be mɔgɔw kɛ minw be koo jugumanw kɛ. Mɔgɔw ka koo jugumanw kɛli kosɔn, duniɲa falen be gwɛlɛya la. Kakalaya, kɛlɛ, sonyali, nintɔɔrɔ, mɔgɔfaga, ani benkanni be yen. Mɔgɔ minw be o koo jugumanw kɛ, u caaman be diinan dɔ kɔnɔ, nka u ka diinan t’u lasu ka ɲuman sira tagama. U tɛ se ka kɛ Ala teriw ye fɔɔ n’u ye koo jugumanw kɛli dabila.—Matiyu 7:17, 18.

Nkalon diinan be mɔgɔw kalan u ka boliw deli. Ala ko an kana boliw deli. O ka kan. Yala a be diya i ye ni mɔgɔ dɔ be kuma i ka jaa dɔrɔn fɛ nka a tɛ kuma ka ye i fɛ wa? O tigi be se ka kɛ i teri sɔbɛ ye wa? Ayi, a tɛ se. Jehova b’a fɛ mɔgɔw ka kuma ale fɛ, u kan’a kɛ yirimɔgɔnin wala jaa dɔ fɛ niin tɛ min na.— Ekisode 20:4, 5.

Nkalon diinan be mɔgɔ kalan ko a dagalen lo ka mɔgɔ wɛrɛw faga kɛlɛ wagati la. Yesu y ’a fɔ ko Ala teriw tun bena kɛ ni kanuya ye u ni ɲɔgɔn cɛ. An be mɔgɔ minw kanu, an t’u faga ( Yuhana 13:35). A ka jugu an ka hali mɔgɔ juguw faga. Tuma min na Yesu ka juguw nana a lalɔ yɔrɔ, a m’a to a ka kalandenw ka kɛlɛ kɛ walisa k’ale tanga.—Matiyu 26:51, 52.

Nkalon diinan be mɔgɔ kalan ko mɔgɔjuguw bena tɔɔrɔ jahanama tasumaman kɔnɔ. Nka Bibulu ka kalan ko jurumu be mɔgɔ bila ka taga saya la (Romɛkaw 6:23). Jehova ye kanuya Ala lo ye. Yala kanuya be Ala min na o tun bena mɔgɔ bila tɔɔrɔ banbali la wa? Ayi dɛ! Alijana kɔnɔ diinan kelenpe dɔrɔn lo bena kɛ yen, Jehova be sɔn min ma ( Jirali 15:4). Diinan minw bɛɛ basigilen be Sitanɛ ka nkalontigɛ kan, u bena tunu.