Mun lo be kɛ saya kɔ?

Saya ye ɲɛnamaya sinaya lo ye. Saya be i n’a fɔ sunɔgɔba dɔ ( Yuhana 11:11-14). Suuw tɛ se ka mɛnni kɛ, ka yeli kɛ, ka kuma, wala ka miiri koo foyi si la (Ekilesiaste [Waajulikɛla] 9:5, 10). Nkalon diinan be mɔgɔ kalan ko suuw be taga danfɛn hakililamaw ka duniɲa dɔ la ka ɲɛnamaya kɛ n’u bɛnbaw ye. Bibulu t’o kalan kɛ.

Mɔgɔ minw sara, u tɛ se k’an dɛmɛ, u fana tɛ se ka kojugu kɛ an na. Mɔgɔw delila ka landako ni saraka dɔw kɛ sabu u b’a miiri k’o bena diya mɔgɔ salenw ye. O man di Ala ye sabu a basigilen be Sitanɛ ka nkalon dɔ lo kan. A fana tɛ se ka diya mɔgɔ salenw ye sabu niin t’u la. An man kan ka siran suuw ɲɛ wala k’u bato. An ka kan ka Ala kelenpe lo bato.—Matiyu 4:10.

Mɔgɔ salenw bena ɲɛnamaya kokura. Jehova bena suuw lakunun k’u lakɔsegin ɲɛnamaya la alijana kɔnɔ dugukolo kan. O wagati be nana ( Yuhana 5:28, 29; Kɛwalew 24:15). Cogo min na i be se ka sunɔgɔtɔ kunun cɔ, o cogo la Ala be se ka mɔgɔ salenw lakunun.—Marka 5:22, 23, 41, 42.

Miiriya min ko an tɛ sa, o ye nkalon ye Sitanɛ Naafigi ye min jɛnsɛn. Sitanɛ n’a ka jinɛw ye mɔgɔw bila ka miiri ko suuw ka hakiliw be niin na ani k’u be banaw ni kunko wɛrɛw lase mɔgɔw ma. Tuma dɔw la, Sitanɛ be tɛmɛ sugow ni yeliw fɛ ka mɔgɔw lafili. Mɔgɔ minw b’a ɲini ka kuma mɔgɔ salenw fɛ, Jehova b’u jalaki.—Dutɛrɔnɔmɛ 18:10-12.