Yala diinanw bɛɛ be tiɲɛn kalan kɛ wa?

1. Ala sira minw be yen farafinna, u dɔw ye jumanw ye?

FARAFINNA, ni mɔgɔ kelen kelen tɛ, bɛɛ sɔnna ko a kɔrɔtalen be ka Ala bato. Nka bɛɛ ma sɔn kelen ma a batocogo koo la. Dɔw be batoli kɛ misiri la, dɔw be joo sɔn. Dɔ wɛrɛw be taga egilizi la. Nka, k’a miiri ko diinan saba dɔrɔn lo be yen farafinna, o tɛ tiɲɛn ye. Silamɛw fɛ, u ka sariyaw n’u ka lannakow tɛ kelen ye. Bɛnbaw ka sira tagamacogo faranfasiw ka ca yɔrɔ ni yɔrɔ la. Kerecɛnya siraw ka bɛnbaliya yɛrɛ ka boon ka tɛmɛ o kan. Farafinna, kerecɛnya sira kunbabaw gɛrɛ fɛ, sira misɛn waa caaman be yen, minw b’u yɛrɛw mara.

An ka diinan ka kan ka basigi tiɲɛn kan

2. (a) Tuma caaman na, mun lo b’a to mɔgɔ be diinan dɔ kɔnɔ? (b) Mun lo t’a yira ko an ka diinan ka di Ala ye?

² Mun lo be mɔgɔw bila Ala sira dɔ kan? Mɔgɔ caaman be sɔn u bangebagaw ka diinan la. Mɔgɔw ka diinan bɔra fana galen koo dɔw la. Gafe Africains: un héritage triple (angl.) b’a fɔ ko: “Saheli sanfɛla fɛ, silamɛya jɛnsɛnna kɛlɛ sababu fɛ, . . . Saheli jukɔrɔla fɛ, kerecɛnya jɛnsɛnna o cogo kelen na. Ni silamɛya jɛnsɛnna npan sababu fɛ Saheli sanfɛla fɛ, kerecɛnya jɛnsɛnna marafa sababu fɛ Saheli jukɔrɔla fɛ.” O bɛɛ n’a ta, an caaman b’a miiri ko an ka diinan ka di Ala ye. Nka diinan tɛ tiɲɛn ye sabu an bangebagaw b’a kɔnɔ dɔrɔn, wala siya wɛrɛ lo y’an bɛnbaw waajibiya ka sɔn a la.

3-5. Ɲɛyirali juman b’an dɛmɛ k’a faamu ko diinanw bɛɛ tɛ tiɲɛn kalan kɛ?

³ Hali ni diinanw bɛɛ b’a fɔ k’u be Ala ka baara kɛcogo sira sɔbɛ yira mɔgɔw la, u ka hakilinataw be dan na dan na. U ka kalan faranfasiw ka ca nin kan: Ala ye jɔn ye, ani a be mun ɲini an fɛ. I ka miiri nin kan: N’a kɛra komi i ye baara sɔrɔ baaradaba dɔ kɔnɔ. I tagara baara la loon fɔlɔ min na, i y’a mɛn ko patɔrɔn be kɔnze la. O la, i be baarakɛla saba ɲininga i ka ɲi ka baara min kɛ. Fɔlɔ b’a fɔ i ye ko patɔrɔn b’a fɛ i ka boon kɔnɔna jɔsi. Filanan ko a b’a fɛ i ka boon pɛntiri kɛ. Sabanan b’a fɔ i ye k’i ka lɛtɛrɛw tilan ka di mɔgɔw ma.

⁴ O kɔ, i be patɔrɔn cogoya koo ɲininga baarakɛlaw fɛ. Fɔlɔ b’a fɔ i ye ko patɔrɔn ka jan, kamalen lo, ani a ka fari. Filanan ko a ka surun, mɔgɔ kɔrɔ lo, ani a ka ɲi. Sabanan ko patɔrɔn tɛ cɛɛ ye fewu, muso lo. N’a sɔrɔ, i laban bena a fɔ i yɛrɛ ye k’o baarakɛla saba bɛɛ tɛ tiɲɛn fɔra. N’i b’a fɛ k’i ka baara kura mara, siga t’a la, i bena sɛgɛsɛgɛri kɛ k’a ɲini ka lɔn patɔrɔn be cogo min na, ani a b’a fɛ i ka min kɛ.

⁵ Ka taga diinan koo fan fɛ, o kelen lo. Ala ye mɔgɔ min ye, ani a be min ɲini an fɛ, hakilinataw ka ca o kan. O kama, an ka kan ka sɛgɛsɛgɛri kɛ ka la a la ko an ka batocogo basiginen be tiɲɛn kan. Nka an be se ka tiɲɛn lɔn Ala koo la cogo di?