I be se ka tiɲɛn lɔn Ala koo la cogo di?

1, 2. Ɲɛyirali juman b’a yira ko an mako be ɲɛyirafɛn dɔ la walisa ka diinan koow latigɛ?

MUN lo be se k’an dɛmɛ ka Ala lɔn? Yala waajibi lo ka diinan caaman ka kalansiraw bɛɛ sɛgɛsɛgɛ wa? O tɛ se ka kɛ. Hali n’an tun be se k’o kɛ, cogo juman na an bena se k’a lɔn min ye kalansira bɛrɛbɛrɛ ye?

² Komi hakilinataw ka ca Ala koo la, ani u be dan na dan na, an mako be fɛɛrɛ dɔ la walisa ka tiɲɛn lɔn: ɲɛyirafɛn dɔ, bɛɛ be se ka sɔn min na. An ka ɲɛyirali dɔ ta: N’a kɛra ko mɔgɔw be sɔsɔli kɛra fani dɔ ka kupɔn janya kan lɔgɔfɛ la. Fani feerela ko kupɔn janya ye mɛtɛrɛ saba ye, nka a sanbaga ko a ma se o ma. O koo be se ka ɲɛnabɔ cogo di? U ka kan k’o fani suma ni mɛtɛrɛ ye.

3. Bibulu sɛbɛra mun kama?

³ Walisa ka diinan koow latigɛ, yala mɛtɛrɛ, ɲɛyirafɛn, dɔ be yen wa? Ɔwɔ, o ye Bibulu ye. Ala ye mɔgɔw bila k’a sɛbɛ walisa mɔgɔw ka tiɲɛn lɔn ale koo la yɔrɔ bɛɛ. Deen miliyari caaman lo sɛbɛra. A kuturu bɛɛ, wala a yɔrɔ dɔw dɔrɔn, bayɛlɛmana kaan 2 100 ni kɔ na. O cogo la, ka mɔgɔ damanin niin bɔ a la, bɛɛ be se ka tiɲɛn kalan Ala koo la a yɛrɛ ka kaan na.

4. Kunnafoni jumanw be sɔrɔ Bibulu kɔnɔ?

⁴ Bibulu ye sɔnnifɛn ɲumanba ye, min bɔra Ala yɔrɔ. A be koo dɔw ɲɛfɔ. N’ale tun tɛ, an tun tɛ se k’o koow lɔn cogoya wɛrɛ la. A b’a yira mɔgɔ minw be ɲɛnamaya kɛra duniɲa yebali kɔnɔ. A be Ala ka miiriyaw n’a jogow n’a sagonata yira an na. A b’a yira Ala ye mɔgɔw minɛ cogo min na kabini saan waa caaman. A be koo nataw kofɔ. Ani, a b’a yira cogo min na an be se ka ɲɛnamaya banbali sira sɔrɔ.

Fɛɛn min kama i be se ka la Bibulu la

5. Ɲɛyirali juman b’a yira ko Bibulu ni lɔnnikow be ɲɔgɔn ta?

⁵ Daliluw ka ca, minw b’an bila ka la a la ko Bibulu ye Ala ka Kuma ye tiɲɛn na. O dalilu kelen b’a yira ko Bibulu ni lɔnnikow be ɲɔgɔn ta. Galen, duniɲa yɔrɔ caaman na, mɔgɔw tun b’a miiri ko dugukolo sigilen be fɛɛn dɔ kan. Afiriki tileben na, mɔgɔw tun b’a miiri ko dugukolo sigilen be saa koorilen dɔ kan: a koorili 3 500 tun be dugukolo san fɛ, ani koorili 3 500 tun be dugukolo jukɔrɔ. K’a masɔrɔ, a saan 3 500 ye nin ye, ka kɛɲɛ ni lɔnnikow ye, Bibulu sɛbɛbaga dɔ y’a sɛbɛ ko Ala “bɛ dugukolo dulon k’a sɔrɔ a ma dulon fɛn kan.”—Job 26:7.

6. Daliluba juman b’a yira ko Bibulu bɔra Ala fɛ?

⁶ Daliluba min b’a yira ko Bibulu bɔra Ala fɛ tiɲɛn na, o ye nin ye: a ka kan ni jigidali ye n’a be kɔn ka sini koow fɔ. Faranfasi be yen Ala ni hadamadenw cɛ. Ala be sini koow lɔn tigitigi. A mana koo o koo fɔ, o be dafa ka kɛ tiɲɛn ye tuma bɛɛ.

7. Bibulu ka ciraya kuma jumanw dafara ka tɛmɛ fɔlɔ la?

⁷ Bibulu ka ciraya kuma kɛmɛ caaman dafara ka tɛmɛ fɔlɔ la. Ɲɛyirali fɛ, saan 700 ɲɛ, Bibulu tun kɔnna k’a fɔ tigitigi ko Yesu bena bange Bɛtilehɛm dugu la. Ani, o lo kɛra (Mise 5:2; Matiyu 2:3-9). Bibulu kɔnna ka koo wɛrɛ caaman kofɔ Yesu koo la fana: a dɔ ye ko a tun bena bange npogotigi lo fɛ, ani u tun bena laban k’a janfan warijɛ bisaba kama. O ciraya kumaw dafara fana. Siga t’a la, hadamaden si tun tɛ se ka kɔn k’o koow fɔ!—Esayi 7:14; Zakari 11:12, 13; Matiyu 1:22, 23; 27:3-5.

8. Bibulu ka ciraya kuma dɔw jumanw be dafara bi, ani u be mun lo yira?

⁸ Bibulu ka ciraya kuma caaman be dafara an ka wagati la. U dɔw ye nin ye:

• “Siya dɔ na wuli siya dɔ wɛrɛ kama [kɛlɛ la]. Masaya dɔ na wuli masaya dɔ wɛrɛ kama. Dugukolo yɛrɛyɛrɛbaw na kɛ yɔrɔ dɔw la, fiɲɛbanaw ni kɔngɔbaw na kɛ yɔrɔ caman na.”—Luka 21:10, 11.

• “Juguya na caya yɔrɔ bɛɛ.”—Matiyu 24:12.

• “Laban donw na . . . mɔgɔw na kɛ u yɛrɛw fɛ, nafolo negetɔw, . . . bangebagaw kan bilabagaw, . . . yɛrɛ minɛbaliw, farinmaw, u tɛ ko ɲumanw fɛ, . . . u falen bɛ kuncɛbaya la, ɲɛnajɛ kow ka di u ye ka tɛmɛ Ala ko kan.”—2 Timote 3:1-5.

Yala i ma sɔn k’o koow be kɛra bi wa? Bibulu ka ciraya kumaw be tiɲɛntigiya kɛ, ani u tilennen be. O b’a yira ko Bibulu tɛ kitabu gwansan ye. Ala ka Kuma senuman lo!—2 Timote 3:16.

Yala Bibulu yɛlɛmana wa?

9, 10. Mun lo b’a yira ko Ala m’a to hadamadenw ka Bibulu yɛlɛma?

⁹ N’a tun kɛra ko i ye izini dɔ tigi ye, ani i ye sariya dɔw bɔ i ka baaradenw kama. I ye min sɛbɛ, n’i jugu dɔ y’a yɛlɛma, i bena mun lo kɛ? A ye min yɛlɛma, yala i tɛna a latilen ka bila a nɔɔ na wa? O cogo kelen na, tiɲɛn min be yen a ka Kuma, Bibulu kɔnɔ, Ala t’a to mɔgɔw k’a yɛlɛma.

¹⁰ Mɔgɔ minw y’a ɲini ka Ala ka Kuma kalansiraw yɛlɛma, u dɛsɛra k’a kɛ. N’an ye bi ka Bibuluw suma ni fɔlɔ taw ye, u bɛɛ ye kelen ye. O b’a yira ko Bibulu ma yɛlɛma wagati tɛmɛnen kɔnɔ.