Yezu suu kununa

Yezu sanin kɔ, nafolotigi dɔ ye Pilati deli ko a k’a to ale be Yezu suu jigi ka bɔ gwengwenyiri kan. O cɛɛ tɔgɔ ko Yusufu. Yusufu ye Yezu suu meleke lenfu fani kura kɔnɔ ani a ye tulu kasadiman kɛ a la. O kɔ, a y’a suu don kaburu kura kɔnɔ. A y’a kɛ u ye kabakuruba dɔ kɛ k’a datugu. Sarakalasebagaw kuntigiw y’a fɔ Pilati ye ko: ‘An be siranna ko Yezu ka kalanden dɔw kana na a suu ta ani k’a fɔ ko a kununa.’ O kama, Pilati y’a fɔ u ye ko: ‘ A’ ye kaburu daa tugu ka ɲɛ ani a’ y’a kɔrɔsi.’

Tile saba o kɔ, muso dɔw tagara kaburuda la sɔgɔmada joona ani u y’a ye ko dɔ ye kabakuru bɔ kaburu daa la. Mɛlɛkɛ dɔ tora kaburu kɔnɔ k’a fɔ o musow ye ko: ‘Aw kana siran. Yezu suu kununa. A’ ye taga a fɔ a ka kalandenw ye k’u ka taga a kunbɛn Galile.’

Magadala Mariyamu teliyara ka taga a fɔ Piyɛri ni Zan ye ko: ‘Dɔ ye Yezu suu ta!’ Piyɛri ni Zan bolila ka taga kaburuda la. U y’a ye ko foyi t’a kɔnɔ minkɛ, u kɔsegira u ka soo.

Mariyamu kɔsegira kaburuda la. A ye mɛlɛkɛ fila ye a kɔnɔ ani a y’a fɔ u ye ko: ‘ N’ m’a lɔn u tagara ni n’ Matigi ye yɔrɔ min na.’ O kɔ, a ye cɛɛ dɔ ye. A tun b’a miiri ko nankɔtigi lo. A y’a fɔ o cɛɛ ye ko: ‘Sabari k’a fɔ n’ ye i y’a bila yɔrɔ min na.’ Nka o cɛɛ ko: “Mariyamu!” O tuma na, Mariyamu y’a lɔn ko Yezu lo. A kulera ko: “Karamɔgɔ!” O kɔ, a nɔrɔla Yezu la. Yezu y’a fɔ a ye ko: ‘Taga a fɔ n’ balimaw ye ko i ye ne ye.’ Mariyamu sinna ka boli ka taga a fɔ kalandenw ye ko a ye Yezu ye.

O loon wulafɛ, kalanden fila tun bɔra Zeruzalɛmu ka to ka taga Emayusi. Cɛɛ dɔ nana fara u kan sira kan k’u ɲininga u be min fɔra. U ko: ‘Koo min kɛra, e t’o kala ma wa? Sarakalasebagaw kuntigiw ye Yezu faga a tile saba lo ye nin ye. Sisan, muso dɔw b’a fɔra ko a kununa!’ Cɛɛ y’u ɲininga ko: ‘Aw lanin tɛ kiraw ka kumaw na wa? Olu tun ko Krista bena sa ani ka kunu.’ A tora ka Ala ka Kuma ɲɛfɔ u ye. U sera Emayusi tuma min na, u ye cɛɛ deli ko a ka to n’olu ye. Suradumuni tuma na, cɛɛ ye delili kɛ ka Ala fo o dumuni kosɔn. O tuma na le kalandenw y’a lɔn ko Yezu tun lo. O kɔ, a tununa.

Cidenw y’u yɛrɛ lajɛn boon min kɔnɔ Zeruzalɛmu, o kalanden fila teliyara ka taga a fɔ u ye min kɛra. K’u to o boon kɔnɔ, Yezu y’a yɛrɛ yira u bɛɛ la. A daminɛ na, cidenw tun ma la a la ko Yezu lo. O tuma na, a ko: ‘ A’ ye n’ bolow filɛ, a’ ye maga n’ la. A tun sɛbɛra ko Krista bena kunu ka bɔ saya la.’