KALANSEN 55
I be se k’i ka kafo dɛmɛ cogo minw na
Duniɲa kuru bɛɛ kɔnɔ, mɔgɔ miliyɔn caaman be Jehova bato ninsɔndiya la kafo waa caaman kɔnɔ. U be kalan ni fɔrɔmasɔn minw sɔrɔ, u ninsɔn ka di o kosɔn ani u b’u yɛrɛ di ka kafo dɛmɛ cogo caaman na. Yala i b’o ninsɔndiya ɲɔgɔn lo sɔrɔla i ka kafo kɔnɔ wa?
1. Cogo jumanw na i be se k’i ka wagati n’i ka fanga kɛ ka kafo dɛmɛ?
An bɛɛ be se ka dɛmɛ kɛ kafo kɔnɔ. Misali la, mɔgɔkɔrɔbaw wala farikolo dɛsɛbagatɔw b’i ka kafo kɔnɔ wa? Yala i be se k’u dɛmɛ walisa u ka se ka taga lajɛnw na wa? Wala i be se k’u dɛmɛ cogoya wɛrɛw la wa? I be se k’u ka ciramisɛnw kɛ u ye wala k’u ka boon saniya (Zaki 1:27 kalan). An be se fana k’an yɛrɛ di ka Masaya Boon saniya ani k’a ladon. Mɔgɔ si t’an waajibiya k’o koow kɛ. An be ni kanuya min ye Jehova ani an balimaw koo la, o lo b’an lasun k’an “yɛrɛ di ni diyanye ye.”—Zaburuw 110:3, NW.
Minw batizera, u be se ka kafo dɛmɛ cogoya wɛrɛw la. Balimacɛ minw be saratiw dafa, olu be se ka kɛ kɔrɔsigi cidenw wala diinan mɔgɔkɔrɔw ye. Balimacɛw ni balimamusow be se ka kɛ piyɔniyew ye walisa ka dɛmɛ don bɛrɛbɛrɛ waajuli baara la. Balima dɔw be se k’u yɛrɛ di ka dɛmɛ don an ka batolibonw lɔli koo la. U be se fana ka yɛlɛma yɔrɔ minw na weleweledalaw man ca.
2. Cogo juman na an be se k’an bololafɛnw kɛ ka kafo dɛmɛ?
An be se ka Jehova “boɲa n’[an] bolofɛnw ye.” (Talenw 3:9). Nɛɛma lo an fɛ k’an ka wari n’an bololafɛn wɛrɛw di ka dɛmɛ don kafo ka koow la ani duniɲa kuru bɛɛ waajuli baara la (2 Korɛntikaw 9:7 kalan). Balawow kɛra yɔrɔ minw na, baara be kɛ n’an ka niliw ye fana ka dɛmɛ don o yɔrɔw la. Mɔgɔ caaman b’a latigɛ ka “fɛɛn dɔ. . . mara gɛrɛfɛ” tuma o tuma walisa ka se ka nili kɛ (1 Korɛntikaw 16:2 kalan). An be se k’an ka niliw don nilibuwatiw kɔnɔ Masaya Boonw na, wala ka nili kɛ ɛntɛrɛnɛti kan yɔrɔ nin na: donate.jw.org. O nili kɛcogow bɛɛ fɛ, an b’a yira ko an be Jehova kanu.
A ƝINI KA DƆ LƆN TUGUN
An be se k’an ka kafo dɛmɛ cogo minw na, an k’u dɔw lajɛ.
3. An be se k’an bololafɛnw di
Minw be nili kɛ ni ninsɔndiya ye, o tigiw koo ka di Jehova ni Yezu ye. Misali la, Yezu ye firiyamuso dɔ kɔrɔsi min ye nili kɛ k’a sɔrɔ fantan tun lo. Luka 21:1-4 kalan. O kɔ, a’ ye ɲiningali nunu kɛ ani ka baro kɛ u kan:
An ka ɲi ka wariba lo di walisa an koo ka diya Jehova ye wa?
N’an b’an tɛgɛ labila ka nili kɛ, o be mun lo kɛ Jehova ni Yezu la?
N’i b’a fɛ k’a lɔn baara min be kɛ n’an ka niliw ye, a’ ye VIDEWO filɛ. O kɔ, a’ ye ɲiningali nin kɛ ani ka baro kɛ o kan:
An be nili minw kɛ, u be kafow nafa cogo di duniɲa kuru bɛɛ kɔnɔ?
4. An be se k’an yɛrɛ di ka dɛmɛ kɛ
Galen, Jehova sagokɛlaw tun be wari di u ka batolikɛyɔrɔw kama. Nka u tun tɛ dan o dɔrɔn ma. U tun b’u yɛrɛ di ka baaraba kɛ walisa k’o boonw ladon. 2 Tilew Kibaru 34:9-11 kalan. O kɔ, a’ ye ɲiningali nin kɛ ani ka baro kɛ o kan:
Israɛlden kelen kelen bɛɛ ye dɛmɛ don cogo di Jehova batoso ladonko la?
A’ ye VIDEWO filɛ walisa k’a lɔn Jehova Seerew b’o ɲɔgɔn kɛ cogo min na bi. O kɔ, a’ ye ɲiningali nunu kɛ ani ka baro kɛ u kan:
Mun na a kɔrɔtanin lo an k’an ka Masaya Boon saniya ani k’a ladon tuma o tuma?
Cogo jumanw na i be se ka dɛmɛ don o la?
5. Balimacɛw be se k’a ɲini ka sarati dɔw dafa walisa ka kunkanbaaraw sɔrɔ
Bibulu be balimacɛw jija u k’u seko bɛɛ kɛ ka se ka kafo dɛmɛ. A’ ye VIDEWO nin filɛ o koo la. O kɔ, a’ ye ɲiningali nin kɛ ani ka baro kɛ o kan:
Ryan ye mun lo kɛ walisa k’a yɛrɛ labila ka kafo dɛmɛ bɛrɛbɛrɛ?
Bibulu b’a yira balimacɛw ka ɲi ka sarati minw dafa walisa ka kɛ kɔrɔsigi cidenw wala diinan mɔgɔkɔrɔw ye. 1 Timote 3:1-13 kalan. O kɔ, a’ ye ɲiningali nunu kɛ ani ka baro kɛ u kan:
Balimacɛ minw b’a fɛ ka kɛ kɔrɔsigi cidenw wala diinan mɔgɔkɔrɔw ye, u ka ɲi ka sarati jumanw lo dafa?
U ka denbayaw ka ɲi ka sarati jumanw lo dafa?—Vɛrise 4 ani 11 lajɛ.
Ni balimacɛw be banba k’o saratiw dafa, o be bɛɛ nafa cogo di kafo kɔnɔ?
NI MƆGƆ DƆ Y’I ƝININGA KO: “Jehova Seerew be wari sɔrɔ min u ka baaraw kama?”
I bena a tigi jaabi cogo di?
MIIRIYA JƆNJƆN
N’an b’an ka wagati, n’an bololafɛnw n’an fanga kɛ ka kafo dɛmɛ, o ka di Jehova ye kosɔbɛ.
I ye mun lo faamu?
An be se k’an ka wagati n’an fanga kɛ cogo di ka kafo dɛmɛ?
An be se k’an bololafɛnw kɛ cogo di ka kafo dɛmɛ?
A bena diya i ye ka kafo dɛmɛ cogo jumanw na?
NUNU LAJƐ FANA
A filɛ fɛɛn min kama Ala t’a ɲini tugun a sagokɛlaw fɛ u ka jaka bɔ ale ka batolikow kama.
“La dîme : Que dit la Bible à ce sujet ?” (A be sɔrɔ jw.org kan)
Ka saratiw dafa kunkanbaaraw kama kafo kɔnɔ: a filɛ o kɔrɔ ye min ye.
Balimacɛ jagwɛlɛ dɔw, minw be jijaliba kɛ ka taga gafew di u kerecɛnɲɔgɔnw ma.
An b’an ka musakaw sara cogo min na, a filɛ cogo min na o be dan na diinan tɔɔw ta la.
“Jehova Seerew be wari sɔrɔ min u ka baaraw kama?” (A be sɔrɔ jw.org kan)