4. Mɔgɔw tɛ ɲɔgɔn kanu

“Adamadenw bɛna kɛ . . . jusukungbɛlɛnw ye.”—2 TIMOTE 3:1-3, Biblu Ala ta Kuma.

● Chris be baara kɛ jɛnkulu dɔ kɔnɔ Pays de Galles jamana na. Fariyako min be kɛ denbayaw kɔnɔ, o jɛnkulu b’o kɛlɛ. Chris y’a fɔ ko: “N’ hakili b’a la ko loon dɔ muso dɔ nana bɔ an ye. N’ tun b’o muso lɔn. Nka, u tun y’a bugɔ ka juguya fɔɔ n’ yɛrɛ m’a lɔn. O koo ɲɔgɔn be muso dɔw hakili ɲagami fɔɔ u yɛrɛ tɛ sɔn k’u ɲɛɛ kɔrɔta ka mɔgɔ wɛrɛ filɛ.”

KOOW BE MUN LO YIRA? Afiriki jamana dɔ la, muso 3 kan, u benna kelen kan ka cɛnimusoko kɛ n’a ye a denmisɛn tuma na. O jamana kelen nin na, cɛɛ 3 kan, cɛɛ kelen b’a miiri ko koo jugu tɛ k’i muso bugɔ. Nka, fariyakow tɛ kɛ musow dɔrɔn lo la denbaya kɔnɔ. Misali la Kanada jamana na, cɛɛ 10 kan, cɛɛ 3 furuɲɔgɔn b’u bugɔ wala k’u niin tɔɔrɔ.

MƆGƆW KA TELI KA SƆSƆLI JUMAN LO KƐ? Fariyako minw be kɛ denbaya kɔnɔ, u ma daminɛ bi. Nka komi mɔgɔw ka teli ka kuma o koo la bi, o lo y’a to a be mɔgɔw ɲɛɛ na ko bi, fariyakow ka ca denbaya kɔnɔ ka tɛmɛ fɔlɔ ta kan.

TIƝƐN B’U FƐ WA? A saan caaman ye nin ye, u y’a daminɛ ka mɔgɔw ladi kosɔbɛ walisa u kana fariya u furuɲɔgɔnw ma. Nka yala dɔ bɔra fariyakow la denbayaw kɔnɔ wa? Ayi dɛ! Sisan ka tɛmɛ sanga ni wagati bɛɛ kan, mɔgɔw tɛ ɲɔgɔn minɛ ka ɲɛ denbaya kɔnɔ.

E BE MUN LO MIIRI? Min fɔra 2 Timote 3:1-3 kɔnɔ, yala o be dafara bi wa? An b’a lɔn ko denbaya mɔgɔw ka ɲi ka ɲɔgɔn kanu. Nka aw m’a kɔrɔsi ko mɔgɔ caaman t’u ka denbaya mɔgɔw kanu wa?

An bena kiraya kuma 5nan min lajɛ sisan, o ɲɛsinna dugukolo koo lo ma. O kiraya kuma fana be dafara an ɲɛɛ na. Barokun nata la, aw ben’a ye Bibulu tun kɔnna ka min fɔ o koo la.

[Kumaw ɲɛɛ 7 kan]

“Mɔgɔw man teli ka koo jugu minw fɔ polisiw ye, u la dɔ ye fariyakow ye minw be kɛ denbaya kɔnɔ. Tuma caaman na n’i y’a ye muso dɔ be polisiw weelela, o y’a sɔrɔ a cɛɛ y’a bugɔ siɲɛ 35 bɛɛ.”—MUSO DƆ, MIN BE MƆGƆW DƐMƐ TELEFƆNI NA N’U YE FARIYAKO KƐ U LA DENBAYA KƆNƆ (PAYS DE GALLES).