5. Dugukolo tiɲɛni koo

“Dugukolo tiɲɛbaaw halaki tuma fana sera.”—YIRALI 11:18, Bible senuma.

● Cɛɛ dɔ tɔgɔ ko Pirri. A be Kpor, Nizeriya jamana na ani a ka baara ye ka banji bɔ. A ka jagoko nagasira pewu tuma min na tulu finman dɔ jɛnsɛnna Nizɛri baji yɔrɔ dɔ la min be weele ko Delta du Niger. O cɛɛ y’a fɔ ko: “[O tulu] b’an ka jɛgɛw faga, k’an fari tiɲɛ, ani ka bajiw nɔgɔ. Baloɲini baara tɛ n’ fɛ tugun.”

KOOW BE MUN LO YIRA? Ka kɛɲɛ ni lɔnnikɛla dɔw ka fɔta ye, mɔgɔw be ɲamaɲama tɔni miliyɔn 6 ni tilan lo bɔn kɔgɔji kɔnɔ saan o saan. O ɲamaɲamaw tilancɛ ye manaw lo ye ani u be saan caamanba lo kɛ ka sɔrɔ ka toli. Adamadenw be dugukolo nagasira. Nka o dɔrɔn tɛ, u be dugukolo ka nafolofɛnw tiɲɛna yɛrɛ le. Adamadenw be min dumu saan kelen kɔnɔ, sɛgɛsɛgɛri dɔ y’a yira ko dugukolo mako be saan kelen ni kalo 5 lo la walisa k’o ɲɔgɔn labɛn. Ɔsitarali ka zurunali dɔ y’a sɛbɛ ko: “Ni adamadenw tora ka dugukolo ka nafolofɛnw tiɲɛ joona joona ten, yanni saan 2035, an mako bena kɛ dugukolo fila wɛrɛw lo la.”—Sydney Morning Herald.

MƆGƆW KA TELI KA SƆSƆLI JUMAN LO KƐ? Adamadenw hakili ka di. An be se k’o gwɛlɛyaw ɲɛnabɔ ani ka dugukolo tanga halakili ma.

TIƝƐN B’U FƐ WA? Mɔgɔw ani jɛnkulu caaman ye jijalibaw kɛ walisa ka mɔgɔw lasɔmi dugukolo latangali koo la. O n’a ta bɛɛ, mɔgɔw be dugukolo halakira ka taga.

E BE MUN LO MIIRI? Yala an mako t’a la Ala ka dugukolo tanga halakili ma i ko ale yɛrɛ y’a daa di ko a bena o kɛ cogo min na wa?

An ye kiraya kuma 5 lo lajɛ. Nka ka fara olu kan, Bibulu tun kɔnna ka kuma koo ɲumanw dɔw koo la, minw bena kɛ laban loon nunu na. An k’u la dɔ lajɛ kiraya kuma 6nan na.

[Kumaw ɲɛɛ 8 kan]

“A be n’ ɲɛɛ na ko n’ be yɔrɔ min na, a bɔnin tɛ Alijɛnɛ ma tugun. Nka a bɔnin be ɲamanton lo ma.”—ERIN TAMBER, A BE GOLFE DU MEXIQUE YƆRƆ LA, ETAZINI JAMANA NA ANI A B’A ƝƐFƆRA FƐƐN MIN KƐRA TUMA MIN NA U YE TULU NƆGƆNIN BƆN YEN, SAAN 2010 LA.

[Koorilen ɲɛɛ 8 kan]

Ala nɔɔ lo wa?

Koo jugu minw be kɛra bi, komi Bibulu tun kɔnna k’u kofɔ, yala an be se k’a fɔ ko u ye Ala nɔɔ lo ye wa? Yala ale lo b’a kɛ an be tɔɔrɔ wa? I be se k’o ɲiningaliw jaabili ɲuman sɔrɔ gafe nin kalansen 11nan na: Kalan tigitigi juman be Bibulu kɔnɔ? Jehova Seerew lo y’o gafe sɛbɛ.

[Jaa ɲɛɛ 8 kan]

U.S. Coast Guard photo