Waajuli baara kɛtɔ, an ka Krista ladegi

¹ Yesu ye ɲɛyirali di an ma an ka tugu min kɔ an ka cidenya baara la. Siɲɛ caaman na ani cogoya caaman na, a y’a yira ko a be Ala ni mɔgɔw kanu kosɔbɛ. A ye mɔgɔ majigilenw kalan tiɲɛn koo la ka ɲumanya koow kɛ mɔgɔ tɔɔrɔlen dusukasilenw ye.—Mat. 9:35.

² Yesu ka ɲɛyirali n’a ka kalan: Yesu m’a yɛrɛ bila ɲɛmalɔbaliya la a kɛtɔ k’a sen don politikikow la, wala k’a jija ka ɲumanya kɛ mɔgɔw ye walisa k’u cogoya fisaya dɔrɔn. A ye wale minw kɛ ni ŋaniya ɲuman ye, a m’a to o si k’a ɲɛɛ bɔ a ka baara kunbaba kan k’o bila kɔfɛ (Luka 8:1). A y’a hakili sigi ka Ala ka Masaya kibaro duman waaju: O Masaya kelenpe lo bena hadamadenw ka kunkow ɲɛnabɔ kudayi kama. Baaraba tun be Yesu fɛ k’a kɛ wagati fitinin kɔnɔ. Tuma min na Kapɛrnaum mɔgɔw tun b’a fɛ Yesu ka to olu fɛ yen, a y’a fɔ a ka kalandenw ye ko: ‘An ka taa [yɔrɔ wɛrɛ] . . . walisa ne ka waajuli kɛ o yɔrɔ la fana, k’a masɔrɔ o de ye ne nakun ye.’—Marka 1:38.

³ Yesu kɛnen kɔ k’a ka kalandenw degi baara la, a ye cikan nin di u ma ka gwɛ, ani a y’u ci ko: A’ ye “waajuli kɛ ko sankolo masaya surunyara.” (Mat. 10:7). A ye a ka kalandenw kalan ko Masayakow ka kan ka bila koo bɛɛ ɲɛ u ka ɲɛnamaya kɔnɔ (Mat. 6:33). Yesu ye kuma laban minw fɔ ka sɔrɔ ka taga sankolo la, u b’a yira ka gwɛ kalandenw tun ka kan ka min kɛ. A y’a fɔ u ye ko: “A’ ye taa siyaw bɛɛ la ka u kɛ ne ka kalandenw ye.”—Mat. 28:19.

⁴ Mun na Masaya kɔrɔtalen be? Ala ka Masaya tun ye Yesu ka barokun fɔlɔ ye. Ani, a y’a ka kalandenw jija u k’ale ladegi. Hadamadenw ka jijali kɛli tɛ se ka duniɲa nin ka kunkow ɲɛnabɔ (Jer. 10:23). Ala ka Masaya kelenpe lo bena Ala tɔgɔ saniya ka lafiya di hadamadenw ma kudayi kama (Mat. 6:9, 10). Mɔgɔ “minnu bɛ ŋunan ka kasi ko haramulen kɛlenw bɛɛ kosɔn”, n’an b’u kalan Masaya tiɲɛnkow la, o b’u dɛmɛ ka hɛɛrɛ ni sanga sɔrɔ u ka ɲɛnamaya kɔnɔ sisan, ani ka kɛ ni jigiya bɛrɛbɛrɛ ye siniɲasigi ta fan fɛ.—Ezek. 9:4.

⁵ Hali bi, Yesu sen be Ala ka Masaya waajuli baara la. A b’an jigi sigi ko a bena an dɛmɛ (Mat. 28:20). A ye ɲɛyirali min to an ye, an ka cidenya baara be bɛn o ma fɔɔ ka se hakɛ juman ma? (1 Piɛrɛ 2:21). Laban loon ninw kɔrɔtalen be kosɔbɛ. O kama, an k’an seko bɛɛ kɛ ka Yesu ka ɲɛyirali ladegi cidenya baara la.