Kerecɛnya baara: o ye an ka ɲɛnako fɔlɔ ye
1 Baara kɛta sifa caaman be an kelen kelen bɛɛ fɛ. K’i janto i somɔgɔw ka makow la, o ye Ala ka koo waajibiyalen ye (1 Tim. 5:8). Nka, o baloɲini baara man kan ka bila Masaya waajuli ni mɔgɔw kalanni baara ɲɛ.—Mat. 24:14; 28:19, 20.
2 Yesu ye ɲɛyirali dɔ di an ma, an ka tugu min kɔ: A ye “Masaya ni a ka tilennenya ɲini fɔlɔ.” (Mat. 6:33; 1 Piɛre 2:21). Hali n’a ka bololafɛnw tun man ca, a ɲɛɛ gwannen tun be a Faa ka baara kɛli la (Luka 4:43; 9:58; Yuh. 4:34). A y’a jija ka seereya di cogoya bɛɛ la (Luka 23:43; 1 Tim. 6:13). A ye dusu don a ka kalandenw la u fana k’u mako don sɔbɛ la suman tigɛ baara la.—Mat. 9:37, 38.
3 An ka Yesu ladege bi: An be se ka Yesu ka ɲɛyirali ladege n’an b’an jija ka ɲɛnamaya kɛ cogo nɔgɔman na, ani ka kerecɛnya baara bila koo bɛɛ ɲɛ. Ni balofɛnw b’an fɛ, an k’an janto Bibulu ka ladili la. O ladili ko an kana to ka duniɲa ka bololafɛnw lajɛn ka fara ɲɔgɔnw kan ka bila (Mat. 6:19, 20; 1 Tim. 6:8). An k’a ɲini ka dɔ fara an ka waajuli baara kan. O ka fisa an ma dɛ! N’an be gwɛlɛyaw kunbɛnna, an k’an jija i n’a fɔ Yesu y’a kɛ cogo min na. An kana a to haminankow ka tɛmɛ an ka baara fɔlɔ ɲɛ: ka Masaya kibaro waaju.—Luka 8:14; 9:59-62.
4 Hali minw ka kunkanbaaraw ka ca, u be waajuli baara bila koo bɛɛ ɲɛ. Balimacɛ dɔ ka gwamɔgɔw ka ca. A fana ye baara dɔ ɲɛmɔgɔ ye, ani diinan mɔgɔkɔrɔ lo kafo kɔnɔ. A y’a fɔ ko: “Ne be waajuli baara jati i ko ne ka baara fɔlɔ.” Balimamuso piyɔniye dɔ y’a fɔ ko: “Piyɔniye baara ka fisa kosɔbɛ ni baloɲini baara ye.”
5 An ka koow cogoya bɛɛ n’a ta, an ka Yesu sennɔ ta. Cogo di? An kɛtɔ ka kerecɛnya baara kɛ an ka ɲɛnako fɔlɔ ye.