Saan 2015 la, Ala ka Mara cidenyabaara lakɔli bena an dɛmɛ k’an ka kalan kɛcogo fisaya

¹ Zaburu sɛbɛbaga Dawuda y’a sɛbɛ ko: “E ka sɔn ne ka kuma ni n ka miiri ma, Masaba, ne tangakabakuru ni n kunmabɔbaga.” (Zab. 19:15). An fana b’a fɛ an ka kumaw ka diya Jehova ye sabu nɛɛma min dira an ma ka kuma tiɲɛn koo la kafo kɔnɔ ani waajuli la, an b’o jati fɛɛnba ye. Ala ka Mara cidenyabaara lakɔli ye fɛɛrɛ dɔ ye Jehova be tɛmɛ min fɛ ka fɔrɔmasɔn di an ma waajuli kama. O fɔrɔmasɔn be di lɔgɔkun o lɔgɔkun duniɲa kuru bɛɛ la, kafo 111000 ni kɔ kɔnɔ. Hali k’a sɔrɔ balimaw ka koow cogoya tɛ kelen ye, o lakɔli ye u dɛmɛ u ka se koɲuman kibaro diiman waajuli la, ka mɔgɔw kalan u ka sɔn u ka fɔtaw ma. A y’u dɛmɛ fana k’o kɛ nɛmɛnɛmɛ ni jagwɛlɛya ye.—Kɛw. 19:8; Kɔlɔs. 4:6.

² Saan 2015 la, lakɔli porogramu ka kalan dɔw bɔra gafe nunu kɔnɔ: Introduction à la Parole de Dieu, Étude perspicace des Écritures ani La Tour de Garde. Ka fara o kan, wagati min tun latigɛra Bibulu kalangwɛ yɔrɔ diimanw ani kalansen fɔlɔ kama, yɛlɛmani dɔw kɛra o la. Dakun nɔfɛtaw la, an bena o yɛlɛmaniw lajɛ. Cikan minw dira kalan kelen kelen bɛɛ kɛcogo la an bena olu fana lajɛ.

³ Bibulu kalangwɛ yɔrɔ diimanw: Balimacɛ min b’o kalan kɛ, miniti fila dira ale ma walisa a ka yɔrɔ diiman kelen lajɛ ka bɔ lɔgɔkun kɔnɔ Bibulu kalangwɛ yɔrɔ la min be se ka kafodenw nafa. N’a y’a yɛrɛ labɛn koɲuman, a bena se ka yɔrɔ nafaman dɔ tilan ni kafodenw ye wagati latigɛnin kɔnɔ. I ko fɔlɔ la, a ka kan ka miniti 6 to jama ye walisa u ka lakalitaw kɛ k’a yira yɔrɔ minw diyara olu ye Bibulu kalangwɛ kɛtɔ lɔgɔkun kɔnɔ. U ka lakalitaw kana tɛmɛ sekɔndi bi saba-saba kan. Walisa ka lakalita ɲuman kɛ sekɔndi 30 kɔnɔ, fɔɔ an k’an yɛrɛ labɛn ani ka banba ka wagati labato. Nka n’an b’o kɛ, o ye fɔrɔmasɔn ɲuman ye an fɛ. O fana be wagati to mɔgɔ wɛrɛw ye u ka se ka lakalitaw kɛ k’a yira u ye sɛgɛsɛgɛri kɛ ka min faamu.

⁴ Kalansen n^o 1: Dɔ bɔra Bibulu kalangwɛ wagati la. A man kan ka tɛmɛ miniti saba kan. A bena basigi yɔrɔ min kan, dɔ bɔra o hakɛ la. Mɔgɔ minw b’o kalangwɛ kɛ, olu ka kan k’a kɛ ka filɛ siɲɛ caaman na ni kaanba ye ani k’u janto koo nunu na: kumadenw ka fɔ ka ɲɛ, kuma ka nɔgɔya u daa walisa miiriyaw ka se ka faamu. Jehova sagokɛlaw bɛɛ ka kan k’u jija ka se kalangwɛ la koɲuman sabu kalangwɛ ye an ka batoli faan dɔ ye min kɔrɔtanin lo kosɔbɛ. An ninsɔn ka di k’a ye ko an ka denmisɛn caaman be se kalangwɛ la koɲuman. Bangebagaw be jijali minw kɛ k’u deenw dɛmɛ ni kanuya ye walisa u ka kɛ kalankɛla ɲumanw ye, an b’u fo o kosɔn.

⁵ Kalansen n^o 2: Balimamuso dɔ lo b’o kalan kɛ miniti duuru kɔnɔ. Barokun min dira a ma, a ka kan ka baara kɛ n’o lo ye. Ni kalan basiginin be gafe Introduction à la Parole de Dieu wala La Tour de Garde kan, lakɔliden ka kalan ka kan ka ɲɛsin waajuliko ma ka kɛɲɛ ni kafo ka kiinw cogoya ye. N’o barokun be kuma mɔgɔ dɔ koo la min kofɔra Bibulu kɔnɔ ani gafe Étude perspicace kɔnɔ, lakɔliden ka kan ka kunnafoniw sɛgɛsɛgɛ a tigi koo la a tɔgɔ jukɔrɔ. A ka kan ka vɛrise dɔw sugandi k’a yira an be se ka ladili minw sɔrɔ o tigi koo la. Ni vɛrise wɛrɛw be yen minw ɲɛsinna o barokun ma, a be se ka baara kɛ n’olu ye fana. Lakɔli kɔrɔsibaga lo bena barokɛɲɔgɔn dɔ sugandi a ye.

⁶ Kalansen n^o 3: Balimacɛ wala balimamuso dɔ lo b’o kalan kɛ miniti duuru kɔnɔ. N’o cii dira balimamuso dɔ ma, a k’o kalan kɛ kalansen n^o 2 kɛcogo la. Nka ni balimacɛ lo, ani n’a be kumana mɔgɔ dɔ koo la min kofɔra Bibulu kɔnɔ ani gafe Étude perspicace kɔnɔ, a k’o kalan kɛ forobakalan kɛcogo la. Barokun min dira a ma, a ka ɲi k’o lo walawala. A ka vɛrise bɛnnin dɔw sugandi ani k’a yira an be ladili minw sɔrɔ o tigi koo la.

⁷ Kalansen n^o 3 kɛcogo kura: Ni kalan basiginin be gafe Introduction à la Parole de Dieu wala La Tour de Garde kan ani n’a dira balimacɛ dɔ ma, a ka kan k’a kɛ gwa kɔnɔ batoli kɛcogo la wala waajuli kɛcogo la. Tuma caaman na, lakɔli kɔrɔsibaga lo bena kalan kɛyɔrɔ ani lakɔliden ka barokɛɲɔgɔn sugandi. Lakɔliden ka barokɛɲɔgɔn ka kan ka kɛ a somɔgɔ wala balimacɛ dɔ ye. Ni vɛrise wɛrɛw ɲɛsinna a ka barokun ma, lakɔliden be se k’u sugandi hali n’u tɛ sɔrɔ a ka kalan bɔyɔrɔ la. Tuma kelen kelen, o kalan be se ka di diinan mɔgɔkɔrɔ dɔ ma. A be se k’a ka kalan kɛyɔrɔ n’a ka barokɛɲɔgɔn sugandi a yɛrɛ ma. O cogo la, ni diinan mɔgɔkɔrɔw be gwa kɔnɔ batoli wala waajuli kɛcogo ɲɛyira kafo la, siga t’a la o bena kafodenw jija.

⁸ Ladiliw: Kalanden kelen kelen bɛɛ ka kalan bannin kɔ, lakɔli kɔrɔsibaga bena miniti fila ta ka kalanden tando ani ka ladili ɲuman dɔw di ka bɔ gafe École du ministère kɔnɔ. Ni lakɔli kɔrɔsibaga be kalan barokun kofɔra, lakɔliden ka kalan basiginin be kumacogo fɛɛrɛ min kan, lakɔli kɔrɔsibaga man kan k’o fɔ. Ni lakɔliden tilara kalan na, lakɔli kɔrɔsibaga ka kan k’a kɔnɔ gwɛ k’a tando. O kɔ, a ka ɲi k’a yira lakɔliden ka kalan tun basiginin be kumacogo fɛɛrɛ min kan. A ka ɲi k’a ɲɛfɔ fɛɛn tigitigi min kama o kumacogo fɛɛrɛ ɲɛna. A be se fana k’a ɲɛfɔ ni ɲumanya ye fɛɛn min kama nafa b’a la lakɔliden k’a yɛrɛ degi o kumacogo fɛɛrɛ la halibi.

⁹ Lakɔliden ka ladili sɛbɛ be sɔrɔ a ka gafe École du ministère kɔnɔ, ɲɛɛ 79-81. Lajɛn bannin kɔ, lakɔli kɔrɔsibaga bena kunnafoni bɛnnin dɔ sɛbɛ lakɔliden ka gafe kɔnɔ. O kɔ, a bena lakɔliden ɲininga a dan na n’a ye degeli baara kɛ min ɲɛsinna a ka kumacogo fɛɛrɛ ma. Lajɛn bannin kɔ wala wagati wɛrɛ la, lakɔli kɔrɔsibaga be se ka lakɔliden tando ani ka ladili ɲuman wɛrɛw di a ma. Ni lakɔli kɔrɔsibaga b’a janto lakɔliden kelen kelen bɛɛ la, o bena u lasun ka ɲɛtaga kɛ Alako ta fan fɛ.—1 Tim. 4:15.

¹⁰ Ni lakɔliden ka wagati banna, lakɔli kɔrɔsibaga walima a dɛmɛbaga ka ɲi ka mankan dennin dɔ kɛ k’a yira ko wagati sera. O la, lakɔliden ka kan ka tila a ka kumasen na ani ka jigi ka bɔ tintin kan.—Gafe École du ministère, ɲɛɛ 282 § 4 lajɛ.

¹¹ Mɔgɔ minw bɛɛ be Ala ka Mara cidenyabaara lakɔli saratiw dafa, an b’u jija u k’u sendon o lakɔli la (Gafe École du ministère, ɲɛɛ 282 § 6 lajɛ). Jehova sagokɛlaw ye fɔrɔmasɔn min sɔrɔ o lakɔli sababu fɛ, o ye u dɛmɛ ka Masaya kibaro diiman fɔ ani ka mɔgɔw kalan ni jigisigi, danbe ani kanuya ye. O lakɔli be mɔgɔ minw bɛɛ nafara bɛrɛbɛrɛ, siga t’a la a ka di Jehova ye k’a ye k’olu bɛɛ b’a tandora!—Zab. 148:12, 13; Ezayi 50:4.