Ele be Bibulu jati mun lo ye?

BIBULU B’A FƆ KO:

“Ala ka kuma bɛɛ sɛbɛnna Ala yɛrɛ ka sebagaya barika la.”​—2 Timote 3:16, ALA KA KUMA, ABBF.

I BE SE KA NAFA MIN SƆRƆ O LA:

Ɲiningali minw be mɔgɔ dabali ban, a b’olu jaabi koɲuman.​—Talenw 2:1-5.

A be ladili sɔbɛw di an ma an ka loon o loon ɲɛnamaya koo la.​—Zaburuw 119:105.

A be jigiya sɔbɛ di an ma siniɲasigi koo la.​—Ɔrɔmukaw 15:4.

BIBULU BE MIN FƆ, AN BE SE KA LA O LA SƆBƐ LA WA?

An be se ka la o la kuun saba ɲɔgɔn kama:

• A t’a yɛrɛ sɔsɔ yɔrɔ si. Cɛɛ 40 ɲɔgɔn lo ye Bibulu sɛbɛ saan 1 600 ni kɔ kɔnɔ. U caaman ma ɲɔgɔn kunbɛn ka ye. Nka Bibulu kɔnɔna kuma si tɛ ɲɔgɔn sɔsɔ, barokun jɔnjɔn kelen dɔrɔn lo b’a kɔnɔ!

• A kɔnɔkow ye tiɲɛn ye. Galen, jamanaw tun mana dɛsɛ kɛlɛ la, u tun man teli k’o koo sɛbɛ u ka kitabuw kɔnɔ. Nka Bibulu sɛbɛbagaw tun b’u kɔnɔ gwɛ k’u yɛrɛ ka filiw n’u ka jamana taw sɛbɛ.​—2 Tilew Kibaru 36:15, 16; Zaburuw 51:3-6.

• A ka kiraya kumaw bɛɛ be dafa. Bibulu tun kɔnna ka Babilonɛ dugu halakili kofɔ saan 200 ɲɔgɔn sanni o koo yɛrɛ ka kɛ (Ezayi 13:17-22). Bibulu y’a yira cogo min na o dugu tun bena minɛ. A ma dan o ma. Masacɛ min tun bena o kɛ, a y’o tɔgɔ fɔ fana.​—Ezayi 45:1-3.

  Bibulu ka kiraya kuma caaman wɛrɛw dafara, u si tɔɔ ma to. Yala o t’a yira ka gwɛ k’o kumaw bɔra Ala yɔrɔ wa?​—2 Piyɛri 1:21.