U y’u daa di Jehova ma

Israɛldenw bɔnin kɔ Ezipiti kalo fila ɲɔgɔn, u sera Sinayi kulu yɔrɔ la ani u sigira yen. Jehova ye Musa weele ka na kulu kan ani a y’a fɔ a ye ko: ‘Ne ye Israɛldenw kisi. N’u ye mɛnni kɛ ne fɛ ani ka ne ka sariyaw labato, u bena kɛ ne ka mɔgɔ ɲɛnatɔmɔninw ye.’ Jehova ye min fɔ, Musa jigira ka taga o fɔ Israɛldenw ye. U ye mun lo fɔ do? U y’a jaabi ko: ‘Jehova ye min fɔ, an bena o bɛɛ kɛ.’

Musa yɛlɛla kulu kan tugun ani Jehova y’a fɔ a ye ko: ‘Yanni tile saba, ne bena kuma i fɛ. Jama lasɔmi u kana a ɲini ka yɛlɛ Sinayi kulu kan.’ Musa jigira k’a fɔ Israɛldenw ye k’u ka u yɛrɛ labɛn walisa ka Jehova lamɛn.

Tile saba o kɔ, Israɛldenw ye sanyɛgɛyɛgɛ ni sankabafin ye kulu kan. U fana ye sanpɛrɛnkan ni buru fiyɛkan mɛn. O kɔ, Jehova nana kulu kan tasuma na. Israɛldenw siranna kosɔbɛ fɔɔ u tun be yɛrɛyɛrɛ. Kulu tun be yɛrɛyɛrɛla ni fanga ye ani sisi tun y’a yɔrɔ bɛɛ ta. Buru fiyɛkan tun be bonyana dɔrɔn. O kɔ, Ala y’a fɔ ko: ‘Ne ye Jehova ye. Aw man kan ka ala wɛrɛw bato.’

Musa segira ka yɛlɛ kulu kan. Jehova ye sariyaw di a ma k’a yira jama ka ɲi k’ale bato cogo min na ani u tagamacogo ka ɲi ka kɛ min ye. Musa y’o sariyaw sɛbɛ ani a y’u kalan Israɛldenw ye. U y’u daa di ko: ‘Jehova ye min fɔ, an bena o bɛɛ kɛ.’ U kɔni y’u daa di Ala ma. Nka, yala u bena o layidu dafa wa?