“Yala ne ka kan ka sigiyɔrɔ yɛlɛma wa?”
1 Komi u ye Yesu ka ci ta sɔbɛ la ‘ka taga ani ka mɔgɔw kɛ kalandenw ye siyaw bɛɛ la’, Jehova ka baarakɛla caaman y’u ka sigiyɔrɔ yɛlɛma walisa ka taga baara kɛ yɔrɔ minw na weeleweeledalaw dɛsɛnen be (Mat. 28:19). U be Pol sennɔ ta, ale min ye nin weelekan jaabi: “Tɛmɛ Masedwanɛ jamana na ka an dɛmɛ.” (Kɛwɛlew 16:9). O sira be ta cogo di?
2 A’ ye senda yɔrɔw tigɛ kelen kelen: Yala kiin dɔw be yen aw ka kɔngeregasiyɔn kɔnɔ, baara ma deli ka kɛ minw kɔnɔ wa? N’o lo, mun na i tɛ jijali kɛ o yɔrɔw la? Sanni i k’a latigɛ ka taga yɔrɔ wɛrɛ, diinan mɔgɔkɔrɔw ɲininga n’olu ka miiri la e labɛnnen lo k’i sigiyɔrɔ yɛlɛma. Sirikɔnsikiripsiyɔn (circonscrip-tion) kɔrɔsibaga fana ɲininga n’a be kɔngeregasiyɔn dɔ lɔn i sigida la yɔrɔ min na i be se k’i ka cidenyabaara yiriwa. O bɛɛ n’a ta, i mana a sɔngɔ jatiminɛ koɲuman, i ben’a ɲini k’i ka dɛmɛ lase jamana yɔrɔ wɛrɛ ma wala jamana wɛrɛ ma. N’o nege b’i la, sɛbɛ ci, i ka kɔngeregasiyɔn diinan mɔgɔkɔrɔw jɛkulu fana ka sɛbɛ ci, o jamana ka bolofara (filiale) ma. I ye ɲɛnamaya min kɛ Alako la, o lakali. Ka wagati kunkurunnin kɛ o yɔrɔ la sanni i k’a latigɛ ka taga i sigi kudayi yen, o ye hakilitigiyako ye.
3 I miiri a la sanni ka wili ka taga jamana wɛrɛ: Balima minw be wili ka taga i sigi jamana wɛrɛ walisa k’u baloko nɔgɔya wala ka boli nintɔɔrɔ ɲɛ, u hakɛ be cayara ka taga. Nanbaramɔgɔw ye u dɔw lafili, u kɛlen ka dajuru ta ko u bena u dɛmɛ ka sigiyɔrɔ sɔrɔ o jamana kura kɔnɔ, nka u ye u ka wari wɔrɔ u la ani ka kɔ di u ma. Tuma dɔw la o mɔgɔw b’a ɲini ka jamana wɛrɛ tagabagaw bila cɛnimusoko jɔnya la. Minw be ban o la, u b’u fili u yɛrɛ ma o jamana kura kɔnɔ ani u cogo be juguya ka tɛmɛ u bɔyɔrɔ jamana ta kan. Tuma dɔw la u waajibiyalen yɛrɛ lo ka siyɔrɔ deli balimaw fɛ wala k’u deli u k’u dɛmɛ cogo wɛrɛw la, o min be kɛ doni waajibiyalen ye denbaya dɔw kun k’a masɔrɔ olu yɛrɛ ma tila u ka gwɛlɛya la fɔlɔ. Hakilitiya ma sɔrɔ sigiyɔrɔ yɛlɛmali la minkɛ, somɔgɔ dɔw farala, ani denbaya dɔw ka hakilimaya barika dɔgɔyara.—1 Tim. 6:8-11.
4 N’i b’a ɲini k’i sigiyɔrɔ yɛlɛma walisa k’i ka ɲɛnamaya fisaya, i kana ɲinɛ ko ɲɛnamaya kɛyɔrɔ mana kɛ yɔrɔ o yɔrɔ ye, i bena kunkow kunbɛn yen. I be yɔrɔ min kaan n’a delinankow lɔn, a ka nɔgɔ ka se sɔrɔ o yɔrɔ ka kunkow kan ka tɛmɛ i ka koow daminɛ kokura sigiyɔrɔ lɔnbali dɔ la.