Yala i be se ka taga Masedwanɛ wa?

1. Mun lo y’a to Pol n’a tagamaɲɔgɔnw tagara Masedwanɛ?

¹ Saan 49 wagati la, ciden Pol bɔra Antiose, Siri mara la k’a ka misɔndenya tagama filanan daminɛ. A ka laɲinita tun ye ka taga bɔ Efese ani dugu wɛrɛw la, Azi mara tileben fan fɛ. Nka, hakili senu y’a weele ko a ka “na Masedwanɛ jamana la.” A diyara ale n’a tagamaɲɔgɔnw ye ka taga yen, ani u ye nɛɛma sɔrɔ ka kafo fɔlɔ juu sigi o jamana na (Kɛw. 16:9, 10; 17:1, 2, 4). Bi, jamana dɔw makoyaba be sumantigɛla caaman na (Mat. 9:37, 38). Yala see b’i ye ka taga u dɛmɛ wa?

2. Mun na dɔw ma jatiminɛ kɛ k’a filɛ n’u be se ka yɛlɛma yɔrɔ wɛrɛ la?

² N’a sɔrɔ a b’i kɔnɔ ka kɛ misɔnden ye i n’a fɔ Pol, nka i ma miiri sɔbɛ la k’a filɛ n’i be se ka taga sigi yɔrɔ wɛrɛ la min makoyaba be waajulikɛlaw la. N’a sɔrɔ i lanin t’a la ko i be se ka kaan wɛrɛ degi. A fana be se ka kɛ ko wariko lo y’a to i bɔra i faso la ka na sigi i be yɔrɔ min na sisan, o kama i be sigasigara ka taga yɔrɔ wɛrɛ la. Nka n’i ye delili kɛ o koow la, i bena a ye k’u man kan k’i bali i ka yɛlɛma yɔrɔ wɛrɛ la min makoyaba be weleweledalaw la.

3. Mun na waajibi tɛ i ka misɔndenw ka fɔrɔmasɔn ɲɔgɔn sɔrɔ walisa ka se ka waajuli kɛ bɛrɛbɛrɛ yɔrɔ wɛrɛ la?

³ Yala waajibi lo ko i ka misɔndenw ka fɔrɔmasɔn ɲɔgɔn sɔrɔ wa? Mun lo y’a to Pol n’a tagamaɲɔgɔnw ye sanga sɔrɔ? U y’u jigi la Jehova n’a ka hakili senu lo kan (2 Kɔr. 3:1-5). O kama, hali n’i ka koow cogoya kosɔn i tɛ se ka fɔrɔmasɔn kɛrɛnkɛrɛnnin sɔrɔ, i bele be se ka waajuli kɛ bɛrɛbɛrɛ yɔrɔ min na makoyaba be yen. I hakili to a la fana ko Ala ka Mara cidenyabaara lakɔli ani waajuliko lajɛn sababu fɛ i be fɔrɔmasɔn sɔrɔla. O bena i nafa waajuli la i mana kɛ yɔrɔ o yɔrɔ.

4. Mun na mɔgɔkɔrɔbaw man kan k’a miiri k’olu tɛ se abada ka taga waajuli kɛ yɔrɔ min na makoyaba be yen?

⁴ Mɔgɔkɔrɔbaw: Mɔgɔkɔrɔba dɔw ye kerecɛn kɔgɔninw ye Alako ta fan fɛ ani u ka kɛnɛ. Yɔrɔ minw makoya be weleweledalaw la, u be se k’olu dɛmɛ kosɔbɛ. Yala i tagara antɛrɛti la wa? Dɔw ka pansɔn man ca kosɔbɛ, nka u be se ka taga sigi jamana yɔrɔ wɛrɛw la minw be yiriwali sira kan. O yɔrɔw la, musakaw man ca ka se duguba ta ma ani u be se k’u yɛrɛ fura kɛ koɲuman.

5. Balimacɛ dɔ ye mun kɛ a taganin kɔ antɛrɛti la?

⁵ Balimacɛ dɔ ye diinan mɔgɔkɔrɔ ni piyɔniye ye ani a tagara antɛrɛti la. A bɔra angilikan dugu dɔ la ka yɛlɛma yɔrɔ min na lonan caaman ka teli ka na. A y’o kɛ walisa ka se ka weleweledala kɔnɔntɔn dɛmɛ o minw be angilikan fɔ. Lonan 30000 minw siginin be o mara la, u ye olu waaju. Saan fila o kɔ, mɔgɔ 50 y’a daminɛ ka taga lajɛnw na. Balimacɛ y’a sɛbɛ ko: “Ne nana sigi yan minkɛ, o y’a to ne ye duga caaman sɔrɔ ne ma deli ka minw ɲɔgɔn sɔrɔ. U ka ca fɔɔ a tɛ se ka fɔ yɛrɛ!”

6. Balima sungurunin dɔ ye mun lo kɛ?

⁶ Balimamuso minw ma furu: Yɔrɔ minw makoyaba be waajulikɛlaw la, Jehova tɛmɛna balimamusow fɛ cogo barikaman na ka kibaro diiman jɛnsɛn yen (Zab. 68:12). Balima sungurunin dɔ tun b’a fɛ ka taga dɔ fara a ka waajuli baara kan yɔrɔ dɔ la min mako be dɛmɛ na. Nka a bangebagaw tun be siran ko koo dɔ kana a sɔrɔ, ani tiɲɛn b’u fɛ. O kama a y’a latigɛ ka yɛlɛma yɔrɔ min na politikiko ani wariko ɲagaminin tɛ. A ye lɛtɛrɛ ci Betɛli ma, ani a ye kunnafoni jɔnjɔn dɔw sɔrɔ minw y’a dɛmɛ. A ye saan wɔɔrɔ kɛ o yɔrɔ la ani a ye duga caaman sɔrɔ yen. A y’a fɔ ko: “Ne faso la, sababu bɛrɛ tun tɛ ne fɛ ka bibulukalanw sɔrɔ. Nka komi ne tagara yɔrɔ min na makoyaba be yen, ne sera ka bibulukalan caaman sɔrɔ ani k’an ka kalan kɛcogo fisaya.”

7. A’ ye denbaya dɔ ka wale lakali.

⁷ Denbayaw: Ni denmisɛnw b’i fɛ, yala o b’i bali ka taga kibaro diiman jɛnsɛn yɔrɔ wɛrɛ la wa? Denbaya dɔ y’a latigɛ k’o kɛ ka filɛ k’a sɔrɔ u be ni deen fila ye minw be ni saan 8 ani saan 10 ye. Bamusoman y’u ka wale lakali ko: “An dusu ka di k’an deenw lamɔ yan sabu u sera ka jɛnɲɔgɔnya kɛ ni dan na piyɔniyew ani misɔndenw ye. Komi an be baara kɛra yɔrɔ min na makoyaba be yen, o y’an nafa kosɔbɛ.”

8. Yala mɔgɔ be se ka taga waajuli kɛ yɔrɔ wɛrɛ la n’i ma kaan wɛrɛ degi wa? A’ y’a ɲɛfɔ.

⁸ Kaan wɛrɛ degiko siranya: N’i be miiri kaan wɛrɛ degiko la, yala o b’i bali ka yɛlɛma yɔrɔ wɛrɛ la wa? E be kaan min fɔ, n’a sɔrɔ o be fɔ fana yɔrɔ wɛrɛw la minw makoya be Masaya waajulikɛla caaman na. Balimacɛ dɔ n’a muso be angilikan fɔ. Nka u yɛlɛmana ɛsipaɲɔli jamana dɔ la, yɔrɔ min na lonan caaman be angilikan fɔ. Angilikan be fɔ kafo minw na ani u mako be dɛmɛ na, Betɛli ye kunnafoniw di u ma olu caaman koo la. O la, u ye kafo kelen sugandi ani u tagara bɔ yen siɲɛ fila. U kɔsegira u faso la, u ye dɔ bɔ u ka kalo o kalo musakaw la walisa ka se ka wari mara saan kelen kama. U yɛlɛma tuma sera tuma min na, o yɔrɔ la balimaw y’u dɛmɛ ka boon sɔrɔ sɔngɔ nɔgɔman na.

9, 10. Minw bɔra u faso la wala u ka dugu la, u ka ɲi ka jatiminɛ kɛ mun lo la? Mun na do?

⁹ Minw tagara sigi jamana wɛrɛ la: Yala i tagara sigi jamana wɛrɛ la ka sɔrɔ ka tiɲɛn lɔn wa? N’a sɔrɔ i faso mako be sumantigɛla caaman na. Mun na i t’a filɛ n’i be se ka kɔsegi ka na dɛmɛ kɛ? N’a sɔrɔ baara ni boon sɔrɔko bena nɔgɔya e fɛ ka tɛmɛ lonanw kan. Ani, kaan min be fɔ i faso la, n’a sɔrɔ i yɛrɛ b’o mɛn ka ban. Ka fara o kan, n’a sɔrɔ mɔgɔw bena sɔn ka Masaya kibaro lamɛn e fɛ ka tɛmɛ mɔgɔ wɛrɛ kan u be min jati lonan ye. Minw tagara antɛrɛti la ani u be duguba kɔnɔ, n’a sɔrɔ waajuli ka teli ka kɛ u ka kiinw kɔnɔ ani kerecɛn setigiw ka ca u ka kafo kɔnɔ. N’a sɔrɔ u be se ka taga kafodennin dɔw wala jɛnkulu dɔw dɛmɛ u yɛrɛ ka dugu kɔnɔ wala dugu wɛrɛ la u ye min lɔn u ka baara kɛtuma na.

¹⁰ Cɛɛ dɔ bɔra Albani ka taga a yɛrɛ kalifa Itali. A ye baara ɲuman sɔrɔ yen ani a tun be to ka wari ci a somɔgɔw ma a faso la Albani. A nana tiɲɛn lɔn. O kɔ, a y’a daminɛ ka Itali ka dan na piyɔniye dɔw kalan alibanɛkan na sabu olu tun b’a fɛ ka taga ale faso la min makoyaba be waajulikɛlaw la. Balimacɛ y’a sɛbɛ ko: “Ne bɔra yɔrɔ min na, olu tun b’u yɛrɛ labɛnna ka taga waajuli kɛ yen. U tun tɛ alibanɛkan mɛn nka u ninsɔndiyanin tun lo ka taga yen. Ne do ye alibanɛ ye ani ne b’o kaan mɛn. Ne do, ne be mun lo ɲɛna Itali?” Balimacɛ y’a latigɛ ka kɔsegi Albani walisa ka taga u dɛmɛ ka kibaro diiman jɛnsɛn yen. A ko: “Ne banna n’ ka baara ni wari la Itali. Yala ne nimisara o la wa? Ne ma nimisa o la fewu! Ne ye baara nafaman sɔrɔ Albani. Ne kɔni fɛ, kuun be baara min na ani a be mɔgɔ ninsɔndiya bɛrɛbɛrɛ, o ye ka baara kɛ Jehova ye n’i seko bɛɛ ye!”

11, 12. Minw b’a fɛ ka yɛlɛma yɔrɔ wɛrɛ la, u ka kan ka mun lo kɛ?

¹¹ A be kɛ cogo min na: Sanni Pol n’a tagamaɲɔgɔnw ka taga Masedwanɛ, a tun b’u kɔnɔ ka taga tileben fan fɛ, nka “Ni Senu tun ye u bali.” O kama, u y’u ɲɛsin Saheli fan fɛ (Kɛw. 16:6). K’u to Bitini jamana gɛrɛfɛ, Yesu ma sɔn u ka don yen (Kɛw. 16:7). Bi, Jehova bele b’a la ka waajuli baara ɲɛminɛ Yesu barika la (Mat. 28:20). O kama, n’i b’a fɛ ka yɛlɛma yɔrɔ dɔ la min mako be waajulikɛla caaman na, i ka dɛmɛ ɲini Jehova fɛ delili la.—Luka 14:28-30; Yak. 1:5.

¹² A ɲini diinan mɔgɔkɔrɔw ani kerecɛn kɔgɔnin dɔw fɛ u k’u kɔnɔ gwɛ k’a fɔ i ye n’i be se ka yɛlɛma yɔrɔ wɛrɛ la (Ntal. 11:14; 15:22). An ka gafew be min fɔ o koo la, i k’o kalan. A b’i kɔnɔ ka yɛlɛma yɔrɔ min na, i ka taga wagati dɔɔni kɛ yen ka filɛ. N’i b’a fɛ sɔbɛ la ka yɛlɛma yɔrɔ wɛrɛ la, i be se ka sɛbɛ ci Betɛli ma walisa ka kunnafoni wɛrɛw sɔrɔ. Nka, kana sin k’i ka lɛtɛrɛ ci Betɛli ma. A di kafo ka diinan mɔgɔkɔrɔw ma walisa u k’u ka miiriya fara a kan ka sɔrɔ k’a ci.—A filɛ gafe Organisés pour faire la volonté de Jéhovah kɔnɔ, ɲɛɛ 111-112.

13. Betɛli bena mun lo kɛ k’i dɛmɛ, nka e yɛrɛ lo ka kan ka mun lo kɛ?

¹³ Betɛli bena kunnafoni nafamanw di i ma o yɔrɔ koo la walisa k’i dɛmɛ ka koow latigɛ. Nka sira ma di Betɛli ma ka lɔ n’i kunko ye. U fana tɛ se ka boon yaala i ye. E yɛrɛ lo ka kan k’o koow sɛgɛsɛgɛ ani k’u ɲɛnabɔ ka ɲɛ ka sɔrɔ ka yɛlɛma. Minw b’a fɛ ka yɛlɛma, u ka kan ka se u yɛrɛ kɔrɔ.—Gal. 6:5.

14. Minw tɛ se ka yɛlɛma yɔrɔ wɛrɛ la, cogo juman na u be se ka dɔ fara u ka waajuli baara kan u sigiyɔrɔ la?

¹⁴ N’i tɛ se ka yɛlɛma yɔrɔ wɛrɛ la: N’i tɛ se ka yɛlɛma yɔrɔ wɛrɛ la, kana i fari faga. N’a sɔrɔ ‘daba wɛrɛ yɛlɛla i ɲɛ ka baara caaman kɛ.’ (1 Kɔr. 16:8, 9). Kafokulu kɔrɔsibaga be se k’a fɔ i ye yɔrɔ min makoya be waajulikɛlaw la i sigiyɔrɔ gɛrɛfɛ. Ni kaan wɛrɛ be fɔ kafo wala jɛnkulu dɔ kɔnɔ i sigiyɔrɔ gɛrɛfɛ, n’a sɔrɔ i be se k’u dɛmɛ. I yɛrɛ be se ka to i ka kafo kɔnɔ ani ka dɔ fara i ka waajuli baara kan. I ka koow cogoya mana kɛ min o min ye, min kɔrɔtanin lo, o ye ko i k’i ka batoli kɛ n’i niin bɛɛ ye.—Kol. 3:23.

15. Ni dɔw b’a fɛ ka yɛlɛma yɔrɔ wɛrɛ la, an ka kan k’o koo ta cogo di?

¹⁵ Yala i be kerecɛn kɔgɔnin dɔ lɔn min b’a fɛ ka yɛlɛma yɔrɔ dɔ la min mako be waajulikɛla caaman na wa? I k’a dɛmɛ ani k’a jija. Tuma min na Pol bɔra Antiose, o dugu tun ye Ɔrɔmɛkaw ka masaya duguba 3nan ye Ɔrɔmu ani Alɛkisandiri duguw kɔ. Komi Antiose tun ka bon ten, kafo min tun b’a kɔnɔ, ale mako tun be Pol ka dɛmɛ na. Ni Pol tun tagara k’u to yen, o tun bena ɲɛnafinba bila u la. Nka, Bibulu t’a yira ko balimaw y’a ɲini ka Pol fari faga a kana taga. Sanni u ka miiri u yɛrɛ ka mara dɔrɔn koo la, u y’u hakili to a la ko “foro, o ye diɲɛ ye.”—Mat. 13:38.

16. Mun na kuun b’a la i ka miiri k’a filɛ n’i be se ka yɛlɛma yɔrɔ wɛrɛ la?

¹⁶ Pol n’a tagamaɲɔgɔnw sɔnna ka taga Masedwanɛ minkɛ, u ye duga caaman sɔrɔ o la. K’u to Filipe dugu kɔnɔ Masedwanɛ jamana na, u ye Lidi sɔrɔ yen. Jehova y’o muso “dusu dayɛlɛ, fo a y’a tulo majɔ Paul ka kuma la.” (Kɛw. 16:14). Tuma min na Lidi n’a somɔgɔw bɛɛ batisera, i ka miiri k’a filɛ Pol n’a tɔɲɔgɔn misɔndenw ɲagalila cogo min na! Yɔrɔ caaman na, Lidi ɲɔgɔnna mɔgɔ kɔnɔgwɛw bele be yen. U ma Masaya kibaro mɛn fɔlɔ. N’i sɔnna ka taga Masedwanɛ, o kɔrɔ yɔrɔ wɛrɛ la, n’a sɔrɔ i bena ninsɔndiya k’u sɔrɔ ani k’u dɛmɛ.