“Sanbakulu kura: Siniɲasigi be mun lo mara i ye?”
1 Duniɲa kuru bɛɛ kɔnɔ, mɔgɔw be o ɲiningali bila u yɛrɛ ye. Hali ni hadamadenw ye ɲɛtaga kabakomanw sɔrɔ, u jigi tigɛnen be sabu kunko jɔnjɔn minw be mɔgɔw sɛgɛnna kabini sanbakulu caaman, u be yen hali bele (Job 14:1; Zaburuw 90:10). Hadamadenw bena dɛmɛ sɔrɔ ka bɔ min?
2 Ɔkutɔburu ni novanburu kalow la, an bena kɛ ni danna fɛɛrɛ ye k’o ɲiningali jaabili lase an mɔgɔɲɔgɔnw ma. Cogo juman na? Masaya Kibarow no 36 jɛnsɛnni sababu fɛ. O sɛbɛnin tɔgɔ ko “Sanbakulu kura: Siniɲasigi be mun lo mara i ye?” Ɔkutɔburukalo tilan fɔlɔ la, an bena La Tour de Garde ni Réveillez-vous! kofɔ mɔgɔw ye. Ani k’a ta ntɛnɛlon, ɔkutɔburukalo tile 16 la ka tag’a bila jumanlon, novanburukalo tile 17 la, an bena an sendon Masaya Kibarow no 36 jɛnsɛnniba la. O kanpaɲi wagati la, an bena Masaya Kibarow no 36 jɛnsɛnni lo kɛ baara fangaman ye lɔgɔkun kɔnɔ. Lɔgɔkunw labanw na, an bena u yira ni kalola periyodikiw ye.
3 Yala aw bena aw sendon o la ɲɛɛ bɛɛ la wa? Diinan mɔgɔkɔrɔw, kɔrɔsigi cidenw, ni piyɔniyew ka fɛta bena kɛ ka kɛ kanpaɲi ɲɛminɛlaw ye sabu olu lo be baara ɲɛfɛ. Weeleweeledala caaman ye u yɛrɛ labɛn janko ka kɛ piyɔniye kɔrɔsigiw ye kalo kelen wala o kalo fila o kanpaɲi wagati kɔnɔ. Dɔ wɛrɛw b’a ɲini ka wagati caaman kɛ cidenyabaara kɔnɔ ka tɛmɛ u delinanta kan.
4 Kitabukalan ɲɛminɛbagaw be ni lɔyɔrɔ ɲuman ye k’u ka jɛkuluden kelen kelen bɛɛ jagwɛlɛya a k’a sendon ɲɛɛ bɛɛ la Masaya Kibarow no 36 jɛnsɛnni baara la. I be taga a sɔrɔ weeleweeledala dɔw sumana waajulibaara la. Diinan mɔgɔkɔrɔw ka kan ka taga bɔ u ye walisa k’a filɛ min be se ka kɛ k’u dɛmɛ. N’a sɔrɔ labɛn be se ka kɛ walisa weeleweeledala kolɔnbaga dɔ ka mɔgɔ sumalen dɔ bila sira waajulikɛyɔrɔ o kanpaɲi kalo kɔnɔ. Komi Masaya Kibarow no 36 yirali ka nɔgɔ, o be se ka waajuli diya don kura ye o weeleweeledalaw la.
5 O fana be se ka kɛ sababu ye Bibulu kalanden minw ye ɲɛtaga ɲuman sɔrɔ gafe Dɔnniya kɔnɔ ani u ka koow dafara ka kɛ weeleweeledalaw ye, minw ma batɛmu ta fɔlɔ, u k’a daminɛ k’u sendon cidenyabaara la. Denmisɛnw fana bena se k’u sendon o farifoni baara la.
6 Yirali nɔgɔman b’a ɲɛ. An be se k’a fɔ ko:
◼ “Ne ye n ka wagati ta walisa ka nin ciraba lase denbaya kelen kelen bɛɛ ma [dugu wala jamana tɔgɔ] kɔnɔ. Aw ta ye nin ye. Hakɛto k’a kalan.” N’a sɔrɔ a bena fisaya ka Masaya Kibarow no 36 jɛnsɛn ni sakɔsi t’an bolo.
7 Waajulibaara lajɛnw labɛnnen ɲuman: Diinan mɔgɔkɔrɔw ka kan k’u janto walisa labɛn minw tara waajuli kama o ka kɛ labɛn nɔgɔmanw ye minw sira ta ka di. Waajulibaara kɔrɔsibaga kɔni ka ɲi ka kiin caaman labila waajuli kama soo ni soo ani lɔgɔfɛw la walisa bɛɛ ka se k’a sendon baara la ɲɛɛ bɛɛ la. N’a be se ka kɛ yɔrɔ o yɔrɔ la, waajuli lajɛn ka kan ka kɛ loon o loon lɔgɔkun kɔnɔ, lɔgɔkun laban na ani wula fɛ. Ɲɔgɔnyew be se ka labɛn tileben tuma lakɔlidenw, izinibaarakɛlaw n’a ɲɔgɔnnaw kama.
8 Minw tɛ yen u ka soo: An ka laɲinita ye ka kuma somɔgɔ caamanba fɛ. Ni boon dɔ lakolon lo an tɛmɛtuma, an k’a ladɛrɛsi ta ani an ka segi ka na wagati wɛrɛ tile kɔnɔ. Ni kanpaɲi lɔgɔkun laban na an ma se ka o somɔgɔw kunbɛn, an ka Masaya Kibarow no 36 kelen dɔ to u ye ni tɛmɛbagaw ɲɛɛw t’a la. Diinan mɔgɔkɔrɔw be se k’a fɔ kɔngeregasiyɔn ye a ka Masaya Kibarow no 36 kelen to boon lakolonw kɔnɔ tɛmɛtuma fɔlɔ la dugudenninw kɔnɔ wala ni kiinw ka ca ani u bɛɛ tɛna se ka tagama kanpaɲi wagati kɔnɔ.
9 An k’an yɛrɛ di! Sanni kanpaɲi ka ban novanburu kalo tile 17 loon, Kɔngere-gasiyɔnw ka kan k’u jija k’u ka kiinw bɛɛ tagama. Ni aw ka kiinw ka boon, weeleweeledala dɔw be se ka waajuli kɛ u kelen n’o kɛcogo ka nɔgɔ ani farati t’a la. O labɛn bena kɛ sababu ye ka mɔgɔ labilanen ɲuman caamanba kunbɛn. A’ y’aw janto ka makodon bɛɛ sɛbɛ.
10 Kuun t’a la ka Masaya Kibarow no 36 komandi kɛ sabu u bena ci kɔngeregasiyɔn kelen kelen bɛɛ ma. Danna, ni kudayi piyɔniyew ani piyɔniye kɔrɔsigiw kelen kelen bɛɛ bena deen 250 sɔrɔ ka jɛnsɛn. Weeleweeledalaw bena deen 50 sɔrɔ. Yala aw labɛnnen be ka aw yɛrɛ di o danna baara la wa? Ala ye min lahidu ta siniɲasigi kama, k’o ɲɛfɔ an mɔgɔɲɔgɔnw bɛɛ ye, o ye nɛɛma ye an fɛ dɛ!