Kanpaɲi kɛrɛnkɛrɛnnin Ka ta ɔkutɔburu 16, ka taga se novanburu 12 ma!
1 “Ngalon diinan laban ka surun!” O lo ye Masaya kibarow no 37 ka barokun ye. An bena a jɛnsɛn duniɲa kuru bɛɛ kɔnɔ ka ta kalo nata ma. Ɔkutɔburu tilan fɔlɔ la, an bena La Tour de Garde ni Réveillez-vous! kofɔ mɔgɔw ye. Ka ta ntɛnɛlon ɔkutɔburu 16, ka taga se dimansi novanburu 12 ma, an bena an sen don baaraba la ka Masaya kibarow no 37 jɛnsɛn. Kanpaɲi wagati la, an bena a fara zurunali kuraw kan k’u yira mɔgɔw la samedi ni dimansi.
2 Jɔn lo be se k’a sen don o baara la: Minw bɛɛ sen be kibaro duman waajuliko la, u ka ɲi k’a ɲini k’u seko bɛɛ kɛ o kanpaɲi nin na. Dɔw bena se ka kɛ piyɔniye kɔrɔsigiw ye. Yala denmisɛnw ni Bibulu kalandenw b’i fɛ minw be ɲɛtaga kɛra Alako ta fan fɛ wa? I k’u dɛmɛ u ka magwɛrɛ diinan mɔgɔkɔrɔw la walisa k’a filɛ n’u ka koow dafara ka kɛ waajulikɛlaw ye minw ma batise fɔlɔ. Diinan mɔgɔkɔrɔw ka kan k’a bɔ u yɛrɛw la ka waajulikɛla sumalenw jagwɛlɛya u k’u sen don o baara la. N’a sɔrɔ u be se ka baara kɛ ni weleweledala kolɔnbagaw ye.
3 Masaya kibarow no 37 hakɛ dɔ bena ci kafow bɛɛ ma walisa weleweledalaw ni kudayi piyɔniyew ka deen 50 ɲɔgɔn sɔrɔ. Makodon mɔgɔ minw tɛ weleweledalaw ye fɔlɔ, u be se ka deen 5 sɔrɔ ka tilan u somɔgɔw n’u teriw cɛ. Bɛɛ ye Masaya kibarow hakɛ min di mɔgɔw ma, u ka kan k’u daa sɛbɛ u ka rapɔɔri sɛbɛ kɔɔ kan ɔkutɔburu ni novanburu kalow laban na. Sekeretɛri ka kan k’u bɛɛ kafo ani k’u mumɛ ci Betɛli ka biro la kalosa o kalosa. Kanpaɲi banni kɔ, baara be se ka kɛ ni Masaya kibarow tɔɔw ye cidenya baara faan bɛɛ la.
4 A yiracogo: I k’a yiracogo surunya walisa i ka se k’a jɛnsɛn caaman-caaman. I be se k’a fɔ ko: “Ne be foroba baara dɔ kɛra. A kun ye ka kibaro gɛlɛn dɔ jɛnsɛn duniɲa kuru bɛɛ kɔnɔ. Aw ta ye nin ye. Gwansan lo. A’ ye hakɛ to k’a kalan.” N’a sɔrɔ a bena fisaya an kana sakɔsi ta an bolo soda ni soda. Mɔgɔ minw y’u mako don, a’ ye aw janto k’u tɔgɔ ta.
5 Aw be se ka aw ka kiinw boli-boli cogo min na: Sanni ka Masaya kibarow jɛnsɛn siradaw la, a’ ye aw seko kɛ ka aw jija k’a jɛnsɛn soo ni soo ani jagokɛyɔrɔw la kafo ka kiin caaman kɔnɔ. Mɔgɔ ma sɔrɔ soo minw kɔnɔ, a’ y’u ladɛrɛsi ta, ani a’ y’a ɲini ka segi ka na wagati wɛrɛ la wala loon wɛrɛ la lɔgɔkun kɔnɔ. Ka ta novanburu tile 6 ma, n’an ma mɔgɔ sɔrɔ soo dɔ kɔnɔ, an be se ka sɛbɛ kelen to yen. Nka ni kafo tɛna se k’a ka kiinw bɛɛ boli-boli wagati latigɛnen kɔnɔ, kanpaɲi daminɛtɔ yɛrɛ, diinan mɔgɔkɔrɔw be se k’a filɛ ni Masaya kibarow tɛ se ka to mɔgɔw fɛ minw ma sɔrɔ u ka soo kɔnɔ.
6 “Babilonɛba” halakili wagati ka surun kosɔbɛ. Mɔgɔw ka kan ka bɔ a kɔnɔ sanni a ka halaki pewu-pewu (Jir. 14:8; 18:8). I k’i labɛn kabini sisan k’i sen don bɛrɛbɛrɛ o kanpaɲi la, min bena kɛ duniɲa kuru bɛɛ kɔnɔ, walisa bɛɛ k’a lɔn ko ngalon diinan laban ka surun!