Kanpaɲi kɛrɛnkɛrɛnnin dɔ bena kɛ ka sɛbɛnin dɔ jɛnsɛn: Ɔkutɔburu tile 20nan-Novanburu tile 16nan!
1 K’a daminɛ ntɛnɛlon ɔkutɔburu tile 20nan ma, ani lɔgɔkun naani kuru bɛɛ kɔnɔ, an bena an seen don sɛbɛnin kura dɔ jɛnsɛnni kɛrɛnkɛrɛnnin na. A kuun ko: Yala i b’a fɛ ka tiɲɛn lɔn wa? An jigi b’a la ko duniɲa kuru bɛɛ kɔnɔ, o kanpaɲi bena mɔgɔ caaman lasun u k’u mako don Bibulu la, tiɲɛn be sɔrɔ o min dɔrɔn kɔnɔ.—Yuh. 17:17.
2 O sɛbɛnin be ɲiningali kɔrɔtalen wɔɔrɔ ka jaabili gwɛnenw di: “Yala Ala b’i janto an na tiɲɛn na wa?” “Yala marifakɛlɛw ni tɔɔrɔw bena ban loon dɔ wa?” “Mun lo be yen saya kɔ?” “Yala suuw be ni jigiya ye wa?” “Ne be se ka Ala deli cogo di walisa a ka ne jaabi?” ani “Ne be se ka hɛɛrɛ sɔrɔ cogo di?” Kerecɛn tɔgɔtigiw ka Egiliziw ma se abada k’o ɲiningaliw jaabi ka mɔgɔ wasa. Hali minw tɛ kerecɛn diinan kɔnɔ, o ɲiningali ɲɔgɔnna delila ka kɛ u caaman kɔnɔ nka u t’a kala ma ko Bibulu b’o ɲiningaliw jaabi bɛrɛbɛrɛ. O kama an jigi b’a la k’o kibaro ka kan ka diya mɔgɔ caaman ye.
3 A’ y’a jɛnsɛn aw ka kiinw bɛɛ kɔnɔ: A’ ye aw jija ka aw seko bɛɛ kɛ k’a jɛnsɛn aw ka kiinw caamanba kɔnɔ soo ni soo. Ni aw ka kiinw ka ca, n’a sɔrɔ diinan mɔgɔkɔrɔw be se ka aw jija ko aw ka sɛbɛnin kelen to mɔgɔw fɛ minw tɛ u ka soo aw tɛmɛko fɔlɔ yɛrɛ la. Aw kana ɲina ka dɔ di aw sigiɲɔgɔnw ma, somɔgɔw, baarakɛɲɔgɔnw, lakɔli filankuruw ani aw be to ka mɔgɔ minw kunbɛn ka kuma u fɛ. N’a sɔrɔ aw be se k’aw ka koow labɛn walisa ka kɛ piyɔniye kɔrɔsigi ye ɔkutɔburu wala novanburu la. Yala aw ka deen wala Bibulu kalanden dɔ be ɲɛtaga kɛra Alako ta fan fɛ ani a ka koow dafara ka jɛn n’an ye nin kanpaɲi na i ko weleweledala min ma batise fɔlɔ wa? Ni o lo, a’ y’o fɔ diinan mɔgɔkɔrɔw ye.
4 A yiracogo: Walisa cii ka lase mɔgɔ caamanba ma, a ka fisa aw k’a yiracogo kɛ nɔgɔman na. Ɲiningali wɔɔrɔ minw be sɛbɛnin ɲɛɛ fɔlɔ kan, aw be se k’u la kelen kɛ lamɛnnikɛlaw ye dɔrɔn, ani k’a jaabili yira u la a kɔnɔ. O bena a to weleweledalaw bɛɛ k’u ka yiracogo makɛɲɛ kiin mɔgɔw ka makoyaw ma. Ni mɔgɔ dɔ y’a mako don, a’ ye o tigi tɔgɔ sɛbɛ ani a’ ye segi ka na. Samedi ni dimansi, zurunali kuraw be se ka fara sɛbɛnin kan k’u di mɔgɔw ma. Kanpaɲi bannen kɔ novanburu tile 16nan, an bena gafe Qu’enseigne la Bible ? yira mɔgɔw la. Sɛbɛnin tɔɔ min tora, an bena baara kɛ n’olu ye i ko sɛbɛnin wɛrɛ minw be kafo kɔnɔ.
5 A’ ye bibulukalanw daminɛ: Nin sɛbɛnin labɛnna tigitigi k’an dɛmɛ ka bibulukalanw daminɛ. Viziti kura kɛtɔ makodon mɔgɔ dɔ fɛ, an be se k’a tigi ɲininga ko Bibulu ka tiɲɛn kuma juman lo y’a dusu saalo wala k’a jigi tugu. A’ ye sɛbɛnin kɔɔ yira a la yɔrɔ min na bibulukalan kofɔra ani a’ ye gafe Qu’enseigne la Bible ? dɔ di a ma wala gafe min kofɔra yen. Kunnafoni caaman be sɔrɔ sapitiri min kɔnɔ ka ɲɛsin a ka barokun sugandili ma, a’ ye o sapitiri dakun kelen wala fila lajɛ dɔɔni n’a be se ka kɛ.
6 Jehova be mɔgɔw ɲinina minw bena a bato “ni la ani tiɲɛ la” (Yuh. 4:23). An bɛɛ k’an seen don o kanpaɲi kɛrɛnkɛrɛnnin na walisa ka mɔgɔw dɛmɛ u ka tiɲɛn lɔn.