Aw Ka ƝIningaliw Jaabiliw

◼ Mɔgɔ min ye waajulikɛ dabila kabini wagati jan, o tigi be se ka dɛmɛ cogo juman na k’a ka koow dafa walisa ka kɛ weeleweeledala ye kokura?

N’an tagamaɲɔgɔn sumalen dɔ y’a ka ŋaniya yira ni kɔnɔgwɛ ye ka baara kɛ Jehova ye, o be an ɲagali (Luka 15:4-6). I be taga a sɔrɔ a tun y’a to kɔrɔbɔli wala ɲɛnamaya ka gwɛlɛyaw k’a degun fɔɔ k’a bali ka wagati sɔrɔ ka kelenna kalan kɛ, ka taga lajɛnw na, ani k’a sendon waajulibaara la. A dɛmɛcogo fisaman ye juman ye walisa a ka ɲɛtaga sɔrɔ hakili senu ka koow fan fɛ?

An kelen kelen bɛɛ ka kan ka dɔ kɛ walisa k’a hakili sigi an ka kerecɛnya kanuya koo la ni kɔnɔgwɛ ye. Diinan mɔgɔkɔrɔw ka kan ka teliya k’a ka makow lɔn hakili ta fan fɛ (Yak. 5:14, 15). N’o tigi sumana wagati kunkurunin dɔrɔn kɔnɔ, weeleweeledala kolɔnbaga dɔ ka dɛmɛ b’a ɲɛ k’a dɛmɛ k’a sendon waajulibaara la tugun. Nka n’o y’a sɔrɔ o sumalen y’a seen bɔ kɔngeregasiyɔn la kabini wagati jan, a mako bena kɛ dɛmɛ bɛrɛbɛrɛ la n’a sɔrɔ. Walisa k’a ka lanaya n’a ka waleɲumanlɔnniya jɔ, a bena fisaya ka Bibulu kalan kɛ n’a ye gafe kɛɲɛnen dɔ kɔnɔ. O la, waajulibaara kɔrɔsibaga bena a ɲini weeleweeledala setigi dɔ fɛ a k’o kalan ɲɛminɛ (Heb. 5:12-14; barokun “Aw ka ɲiningaliw jaabiliw” filɛ An ka Masaya Cidenyabaara kɔnɔ, saan 1998 novanburukalo ta). N’i be mɔgɔ dɔ lɔn min mako be o ɲɔgɔnna dɛmɛ na, a fɔ kɔngeregasiyɔn waajulibaara kɔrɔsibaga ye.

Sanni ka wagati jan mɔgɔ sumalen dɔ weele a k’a sendon waajulibaara la kokura, a ɲininen be diinan mɔgɔkɔrɔ fila fɛ u k’a kunbɛn walisa k’a filɛ n’a ka koow dafalen be ka kɛ Masaya weeleweeledala dɔ ye. U ka kan k’o koo sira tagama i n’a fɔ n’u tun be mɔgɔ kuraw kunbɛnna minw b’u jijara ka koow dafa walisa ka kɛ kibaro duman weeleweeledalaw ye (a filɛ 1988, La Tour de Garde kɔnɔ a ɲɛɛ 17). Ŋaniya gwɛ ka kan ka kɛ o kerecɛn sumalen na k’a yira k’a b’a fɛ ka kibaro duman lase mɔgɔ wɛrɛw ma. Koo waaajibiyalen jɔnjɔn minw be gafe Notre ministère ɲɛɛ 99 kɔnɔ, a ka kan k’olu dafa ani ka timinandiya kɔngeregasiyɔn ka lajɛnw tagali la.

Mɔgɔ min segira ka kɛ wale kɛbaga ye, delinanko ɲuman hakilikow fan fɛ, o lo bena a dɛmɛ kosɔbɛ ka jɛɲɔgɔnya nafamanba sabati ani k’a mara ale ni Jehova cɛ, ani ka tagama ɲɛnamaya banbali sira kan (Mat. 7:14; Heb. 10:23-25). N’o ɲɔgɔnna mɔgɔ ye “jijali sɔbɛ bɛɛ” kɛ, ani ka kerecɛnya jogo mɛɛntaw sɛnɛ, a tɛna kɛ ka ye kerecɛn kalanden ‘sumalen wala nafantan ye’ tugun abada.—2 Piɛre 1:5-8, NW.