“An ka koo ɲuman kɛ mɔgɔw bɛɛ ye”

¹ “Ala ka Kuma waaju ka dafa”, ani “I ka nafolotigiya . . . kɛwale ɲumanw kɛli la”. O barokunw tun be sɔrɔ An ka Masaya Cidenyabaara lankana kɔnɔ (saan 2002, feburu ni marisi kalow ta). (Kolos. 1:25; 1 Tim. 6:18). O sɛbɛw kɔnɔ, u tun ye an jagwɛlɛya ko: An k’an jija ka makodon mɔgɔw dɛmɛ u ka na Hakilijigi seli la. Ko an ka sumalenw dɛmɛ u k’u sendon kokura kafo ka koow la. Ani, ko an k’an denmisɛnw ni Bibulu kalandenw dɛmɛ ka koow dafa walisa k’a daminɛ ka kibaro duman weleweleda. Siga t’a la, an ka jijali sɔbɛ denna. Sisan, “ni cogo bɛ an fɛ, an ka [to ka] koo ɲuman kɛ mɔgɔw bɛɛ ye.” —Gal. 6:10.

² U weele, u ka segi ka na: Lakalitaw b’a yira ko salon, Afiriki tileben n’a cɛmancɛ jamanaw na, mɔgɔ waa kɛmɛ wɔɔrɔ ni kɔ nana Hakilijigi seli la, minw tɛ weleweledalaw ye. Komi u nali b’a yira k’u b’u mako don, ‘minw labɛnnen be ka sɔn ɲɛnamaya banbali la’, an ka kan ka mun lo kɛ walisa k’u lasu u ka kɛ “dannabagaw”ye? (Kew. 13:48). U jagwɛlɛya u ka segi ka na kafo ka lajɛnw na joona.

³ Mun na i tɛ makodon mɔgɔ dɔ weele ka na kafo ka Kitabukalan na walisa a ka kalan duman dɔ sɔrɔ Esayi ka ciraya kuma koo la? A tigi be se ka kɛ i somɔgɔ wala i lɔnbaga dɔ ye. N’i bena kalan dɔ di Ala ka Mara Cidenya lakɔli la, i be se k’a weele ka na i ka kalan lamɛn. Foroba kalan minw bena di lɔgɔkun nataw la, a to a tigi k’u kalankun lɔn. (Foroba kalanw labɛnsira nɔrɔnen ka kan ka sɔrɔ kunnafoniw walaka kan.) Fɛɛrɛ o fɛɛrɛ ɲini, min be se ka nege don o mɔgɔ la ka Jehova bato. Ani, n’a tɛ Bibulu kalan kɛra fɔlɔ ni kafoden dɔ ye, i be se ka nisɔn diya ka kalan kofɔ a ye.

⁴ To ka sumalenw jagwɛlɛya: Mɔgɔ minw be na Hakilijigi seli la, u dɔw y’u yɛrɛkun di Jehova ma ka ban. Nka wagati dɔ la, u ye kibaro duman waajuli dabila. K’amasɔrɔ, Pol y’an jija ko an ka ‘koo ɲuman kɛ . . . janko an balima dannabagaw ye.’ (Gal. 6:10). O kama, o ɲɛsinna sumalenw lo ma fɔlɔ.

⁵ N’a sɔrɔ u dɔw sɔnna ka ban diinan mɔgɔkɔrɔw ni mɔgɔ wɛrɛw ka jagwɛlɛya kumaw la k’u sendon kokura waajuli la. Ni sumalen dɔ segira ka kisɛya, ani diinan mɔgɔkɔrɔw y’a ɲini i fɛ i ka baara kɛ n’a ye, i k’a lɔn ko Jehova kanu ani waajuli baara kanu minw be ile yɛrɛ la, o bena o sumalen jigi sabati. A yira a la cogo min na i b’i sendon waajuli baara faan sifaw la. O la, a bena se ka ɲagali sɔrɔ o la, ka timinandiya waajuli kɛli la, ani a ka Jehova ka duba sɔrɔ.

⁶ Weleweledala kuraw dɛmɛ ka koow daminɛ koɲuman: Muso dɔ y’a mako don kura ye. Tuma min na a bɔra a kalama ko a ye Ala ka ɔriganisasiyɔn sɔbɛ sɔrɔ, a y’a ɲini ka waajuli daminɛ kelen. Koo minw waajibiyalen be a ma, a y’u lɔn minkɛ, a ko: “Ne b’a fɛ k’a daminɛ kelen.” Ni sira dira i ka kalanden dɔ ma ka waajuli daminɛ sisan, a dɛmɛ a ka faamuya ko a ka kan k’a “daminɛ kelen”. O la, a bena koow daminɛ koɲuman. A dɛmɛ a ka deli k’a yɛrɛ labɛn waajuli baara kama, ani k’a sendon a la lɔgɔkun o lɔgɔkun.

⁷ N’i yɛrɛ ka deen lo kɛra weleweledala ye min ma batise fɔlɔ, a dɛmɛ a ka ɲɛtaga sɔrɔ ka kɛɲɛ n’a sanda n’a see ye. I ka dɛmɛ fitinin sababu fɛ, a bena bari i la k’a ye ko a ka nɔgɔ o deen fɛ ka baro daminɛ ni mɔgɔw ye, ka vɛrise kalan Bibulu kɔnɔ, ani ka gafew kofɔ mɔgɔw ye. A mana makodon mɔgɔw sɔrɔ waajuli kɛtɔ, a dege viziti kura kɛcogo la, ani makodon magwɛncogo la.

⁸ Dɔ fara i yɛrɛ ka waajuli baara kan: Yala i ka koow cogoya be sira di i ma ka dɔ fara i ka waajuli baara kan Hakilijigi wagati tɛmɛnen kɔ wa? I tun delila ka wagati min kɛ waajuli la, yala i be se ka lɛri kelen wala fila fara o kan wa? Yala i be filɛri kɛ kalandiriye kɔnɔ walisa ka kalow kɔrɔsi, minw kɔnɔ i be se ka kɛ piyɔniye kɔrɔsigi ye tugun wa? Walima, yala i be se ka yɛlɛmaniw don i ka ɲɛnamaya kɛcogo la walisa k’i sendon kudayi cidenyabaara la wa? An be jijali minw bɛɛ kɛ waajuli la, u be se ka mɔgɔ dɔ dɛmɛ ka sɔn tiɲɛn la! (Kew. 8:26-39). An kɛtɔ ka loon nataw mafilɛ, an ka ‘tugu koo ɲuman kɛli la an ni ɲɔgɔn cɛ, ani an ni mɔgɔw bɛɛ cɛ tuma bɛɛ.’ —1 Tes. 5:15.

To ka dɛmɛ lase nunuw ma:

□✔ Minw nana Hakilijigi seli la

□✔ Sumalen minw segira ka kisɛya

□✔ Weleweledala kura minw ma batise fɔlɔ