An kana ɲinɛ sumalenw kɔ
1 Yala i be weleweledala sumalen dɔ lɔn wa? N’a sɔrɔ a y’a seen tigɛ kafo ka koow la ani gwɛlɛyaw ye see sɔrɔ a kan. N’a sɔrɔ i y’o tigi kunbɛn waajuli kɛtɔ soo ni soon. An ka kan k’a to an hakili la k’o tigi ye an balima dɔ ye Alako ta fan fɛ hali bi. An b’a fɛ k’a yira a la ko an b’a kanu hali bi. Ani, an b’a fɛ k’a dɛmɛ a ka segi ka na kafo kɔnɔ, a ka segi an Dɛndɛbaga ni an kɔrɔsibaga ma.—1 Piɛrɛ 2:25.
2 An k’an mako don u la: An be se k’a yira sumalenw na ko an ma ɲinɛ u kɔ an kɛtɔ ka telefɔni ci u ma wala an kɛtɔ ka taga bɔ u ye wagati dɔɔni kɔnɔ. An be se ka mun lo fɔ u ye? An k’u jaa gwɛlɛya an kɛtɔ k’a fɔ ko an be miiri u koo la dɔrɔn. An k’a to an ka kuma ka diya k’u sabati (Fil. 4:8). An be se ka lajɛn tɛmɛnen dɔ ka miiriya fɔ min diyara an ye. An fana be se k’u weele u ka na lajɛn nata dɔ la wala lajɛnba dɔ la, ani an k’a fɔ u ye ko an bena sigiyɔrɔ dɔ mara u ye wala an bena u ta ka taga yen.
3 Waajuli kɛtɔ kiin kɔnɔ, weleweledala dɔ ye balima-muso dɔ kunbɛn min ye sumalen ye kabini saan 20 ni kɔ. Hali n’a ma sɔn ka bibulukalan kɛ kokura, weleweledala tora ka taga bɔ a ye ani ka zurunali kuraw di a ma. Tile saba lajɛnba kɛnen kɔ, weleweledala tagara o kalan ka miiriya diiman dɔw tilan n’a ye. A laban, o sumalen y’a daminɛ ka waajuli kɛ kokura.
4 Sumalen dɔ mana kɔsegi kafo kɔnɔ: Sumalen dɔ mana a daminɛ ka na lajɛnw na kokura, an ka kan k’o tigi minɛ cogo di? Ayiwa, Yesu y’a ka kalandenw minɛ cogo di u kɛnen kɔ ka ale bila tuma dɔɔni? A y’a dusu diya k’u weele ko ale “balimaw” ani a y’a yira ko a lanen be u la. A yɛrɛ ye ciiba dɔ kalifa u ma (Mat. 28:10, 18, 19). A ma mɛɛn, u ɲɛɛ gwannen tun be baara la, u ma “Kibaru Duman fɔli dabila.”—Kɛw. 5:42.
5 Ni mɔgɔ dɔ kɛra sumalen ye kabi wagati jan, sanni an ka bibulukalan kofɔ a ye, wala sanni an k’a weele a k’an bila sira waajuli la, an ka ladiliw ɲini diinan mɔgɔkɔrɔw fɛ fɔlɔ. N’an bɔra sumalen dɔ kan kiin kɔnɔ, an ka kan k’o fɔ diinan mɔgɔkɔrɔw ye walisa u ka dɛmɛ lase a tigi ma a mako be min na.
6 Bibulu b’a yira ka gwɛ ko minw be ɲɔgɔndan boli kɛ ka a ban, olu dɔrɔn bena kisili sɔrɔ (Mat. 24:13). O kama, an k’an janto mɔgɔw la minw kunnatiɲɛna, wala gwɛlɛyaw ye see sɔrɔ u kan. N’an be muɲu ka Jehova ka kanuya ladegi k’an janto u la ni kɔnɔgwɛ ye, n’a sɔrɔ an bena ɲagali k’a ye ko u y’u ka baara senuman daminɛ kokura an gɛrɛ fɛ.—Luka 15:4-10.
[Study Questions]
1. Minw kɛra sumalenw ye, mun na an ka kan k’a ɲini k’u jaa gwɛlɛya?
2. An be se ka sumalenw jaa gwɛlɛya cogo di?
3. Balimamuso sumalen dɔ segira ka waajuli daminɛ cogo di?
4. Mɔgɔ dɔ mana a daminɛ ka na lajɛnw na kokura, an ka kan k’o tigi minɛ cogo di?
5. Koo jumanw ka kan k’an lasun ka kuma diinan mɔgɔkɔrɔw fɛ sumalenw koo la?
6. An be se ka ninsɔndiya juman sɔrɔ an kɛtɔ ka sumalenw dɛmɛ?