Laɲinita nafamanba cidenya baara saan kura kɔnɔ
1 N’an b’a fɛ ka ɲɛtaga sɔrɔ Alako ta fan fɛ an ka kan ka laɲinitaw latigɛ. Ile ye laɲinita juman latigɛ i yɛrɛ ye cidenya baara saan kura kama? Laɲinita ɲumanba dɔ ye ka kɛ piyɔniye kɔrɔsigi ye kalo kelen wala kalo damanin kɔnɔ. Tuma caaman na, o baara diiman tɛ ɲɛ n’an ma kɔn k’an yɛrɛ labɛn. O kama, sisan lo ye wagati ɲuman ye k’a daminɛ ka miiri o kan. Mun na an ka kan ka piyɔniye kɔrɔsigi baara kɛ an ka laɲinita ye?
2 Kuun min b’a la ka kɛ piyɔniye kɔrɔsigi ye: O baara b’a to an koo be diya an sankolola Faa ye bɛrɛbɛrɛ sabu an be wagati caaman kɛ cidenya baara la (1 Tes. 4:1). N’an be miiri Jehova ye koo minw bɛɛ kɛ an ye, an dusukun b’an lasun k’a koo fɔ mɔgɔw ye (Zab. 34:2, 3). An be jijaliba minw kɛ walisa ka dɔ fara an ka cidenya baara kan, Jehova b’o kɔrɔsi ani o ka di a ye (Heb. 6:10). An be ɲagali kosɔbɛ sabu an b’a lɔn ko an ka baara sɔbɛ be Jehova dusu diya.—1 Til. Kib. 29:9.
3 Tuma caaman na, n’i ka teli ka koo dɔ kɛ, a kɛli be nɔgɔya i ma ani dɔ be fara a diya kan. I kɛtɔ ka wagati caaman kɛ waajuli la, i bena jasigi sɔrɔ i tagatɔ soo ni soo. I bena se baro daminɛcogo la ani baara kɛcogo la ni Bibulu ye bɛrɛbɛrɛ. N’i be to k’i ka limaniya kofɔ mɔgɔw ye, o bena to ka dɔ fara a barika kan. Bibulukalan tun tɛ weleweledala dɔw fɛ fɔlɔ la. Nka u caaman sera ka dɔ daminɛ tuma min u kɛra piyɔniye kɔrɔsigi ye.
4 Piyɔniye kɔrɔsigi baara fana be se k’an lasun ka timinangoya dabila Alako ta fan fɛ. Kudayi piyɔniye kɔrɔ dɔ y’a ye ko baloɲini baara be ale ka wagati ta kojugu. A y’a latigɛ ka kɛ piyɔniye kɔrɔsigi ye kalo kelen kɔnɔ. A b’a fɔ ko: “Ne kabakoyara k’a ye ko o kalo kelen ka baara ye barika don ne la Alako ta fan fɛ! Ne y’a latigɛ ka kɛ piyɔniye kɔrɔsigi ye kalo o kalo. O kɛra sababu ye ne segira ka kɛ kudayi piyɔniye tugun.”
5 An ka gwɛlɛyaw sago: Dɔw be se ka sigasiga k’u tɔgɔ di ka kɛ piyɔniye kɔrɔsigiw ye sabu u b’a miiri k’u tɛ se waajuli la koɲuman. N’o lo b’i balila, Jehova be se k’i dɛmɛ i ko a ye Jeremi dɛmɛ cogo min na (Jer. 1:6-10). Musa tun ‘tɛ se kuma la. A nɛnkun fana tun ka girin.’ Nka Jehova tɛmɛna ale lo fɛ k’a ka sago dafa (Ekis. 4:10-12). N’i b’a miiri ko see t’i ye, i ka Jehova deli a k’i jagwɛlɛya.
6 Yala i be sigasiga k’i tɔgɔ di sabu kɛnɛyako b’i kan wala i bolo degunnen lo wa? N’i ye namara ye, i be se ka kɛ piyɔniye kɔrɔsigi ye n’i be baara kɛ ka kɛɲɛ n’i yɛrɛ cogoya ye. N’i bolo degunnen lo, i k’a filɛ baara minw tɛ kɔrɔtɔ koo ye, i k’olu bila kalo wɛrɛ kama. Dɔw be baloɲini baara kɛ tile kuru bɛɛ kɔnɔ. Nka u sera ka wagati kunmabɔ piyɔniye kɔrɔsigi baara kama u kɛtɔ ka tile kelen wala tile fila kɔnze ta.—Kol. 4:5.
7 A kɛcogo: N’a nege b’i la ka kɛ piyɔniye kɔrɔsigi ye i ka delili kɛ o kama. I be jijali minw kɛra ka dɔ fara i ka cidenya baara kan i ka Jehova deli a k’u duga (Rom. 12:11, 12). A be se k’i dɛmɛ ka hakili sɔrɔ ka yɛlɛmani dɔw don i ka porogramu kɔnɔ (Yak. 1:5). N’a nege t’i la ka kɛ piyɔniye ye, i ka Jehova deli a k’i dɛmɛ walisa waajuli baara ka diya i ye.—Luka 10:1, 17.
8 A’ ye baro kɛ ɲɔgɔnw fɛ piyɔniye kɔrɔsigi baara koo la gwa kɔnɔ (Ntal. 15:22). N’a sɔrɔ mɔgɔ kelen be se ka kɛ piyɔniye kɔrɔsigi ye gwamɔgɔ tɔɔw ka dɛmɛ sababu fɛ. I ka baro kɛ o kan fana ni dɔw ye kafo kɔnɔ, minw kɔni be i ka cogoya ɲɔgɔn na. O be se ka dusudiya don mɔgɔ wɛrɛw la ka kɛ piyɔniye kɔrɔsigi ye.
9 I k’i ka cidenya baara porogramu lajɛ saan kura kama. I be se ka kɛ piyɔniye kɔrɔsigi ye tuma juman? N’a sɔrɔ i be baloɲini baara kɛ tile kuru bɛɛ kɔnɔ, wala i be taga lakɔli la. I be se k’a filɛ kalo minw kɔnɔ selilonw be yen wala samedi ni dimansi looru be yen. Ɲɛyirali fɛ, samedi ni dimansi looru be yen sɛtanburu, desanburu, marisi ani uti kalow kɔnɔ. Samedi looru be yen mɛkalo kɔnɔ, ani dimansi looru be yen zuwɛn kɔnɔ. Ni kɛnɛyako b’i kan, i k’a filɛ kalo minw kɔnɔ saan ɲɛɛ ka ɲi. I fana be se k’a filɛ n’i be se ka kɛ piyɔniye kɔrɔsigi ye kalo min kɔnɔ kafokulu kɔrɔsibaga bena bɔ aw ka kafo ye. O lɔgɔkun kɔnɔ, nɛɛma wɛrɛ bena di i ma: i bena se ka kɛ kudayi piyɔniyew ka lajɛn yɔrɔ fɔlɔ la. Komi Hakilijigi lajɛn bena bɛn marisi tile 22nan ma saan wɛrɛ, marisi ni awirili ni mɛ kalow bena kɛ sababu ɲumanw ye ka piyɔniye kɔrɔsigi baara kɛ. I mana a latigɛ kalo min(w) na i b’a fɛ ka kɛ piyɔniye kɔrɔsigi ye, i k’a daminɛ k’a sɛbɛ porogramu min bena i dɛmɛ k’i ka lɛriw sɔrɔ k’u dafa.
10 Hali n’i b’a jati ko i tɛ se ka kɛ piyɔniye kɔrɔsigi ye cidenya baara saan nata kɔnɔ, i be se ka kɛ ni piyɔniye miiriya ye hali bele. I ka to k’i seko bɛɛ kɛ cidenya baara la. I ka la a la ko i be i seko dama-yira min kɛ Jehova ka baara la o ka di a ye (Gal. 6:4). See be minw ye ka kɛ piyɔniye kɔrɔsigi ye, i k’u dɛmɛ ani i k’u jaa gwɛlɛya. N’a sɔrɔ i bena se k’i ka porogramu makɛɲɛ ka waajuli kɛ ni piyɔniyew ye loon wɛrɛ la lɔgɔkun kɔnɔ.
11 Jehova sagokɛlaw be koow kɛ ni kɔrɔtɔ miiriya ye. Baara dɔ ka kan ka kɛ ka dafa: o ye kibaro duman waajuli ye. Mɔgɔw niinw be farati la, ani wagati tɔɔ man ca tugun (1 Kɔr. 7:29-31). N’an be Ala n’an mɔgɔɲɔgɔn kanu, o lo bena an lasun k’an seko bɛɛ kɛ cidenya baara la. N’an y’an labɛn ka ɲɛ, ani n’an b’an jija, n’a sɔrɔ an bena se ka kɛ piyɔniye kɔrɔsigi ye kalo kelen kɔni kɔnɔ cidenya baara saan nata la. O ye laɲinita nafamanba ye dɛ!
[Study Questions]
1. An be se ka jatiminɛ kɛ laɲinita juman kan cidenya baara saan nata kɔnɔ?
2. Mun na an ka kan ka piyɔniye kɔrɔsigi baara kɛ an ka laɲinita ye?
3, 4. Piyɔniye kɔrɔsigi baara be nafa juman di an ma?
5. N’an b’a miiri ko see t’an ye, an be se k’o gwɛlɛya sago cogo di?
6. Mɔgɔ be se ka kɛ piyɔniye kɔrɔsigi ye cogo di hali ni kɛnɛyako b’a kan wala n’a bolo degunnen lo?
7. Mun na nafa b’a la ka delili kɛ piyɔniye kɔrɔsigi baara koo la?
8. Ntalen 15:22 sira tagamani be se k’i dɛmɛ cogo di ka kɛ piyɔniye kɔrɔsigi ye?
9. I be se k’a latigɛ ka kɛ piyɔniye kɔrɔsigi ye kalo jumanw na?
10. Ni see t’i ye ka kɛ piyɔniye kɔrɔsigi ye, i be se ka mun lo kɛ?
11. Mun na an ka kan ka koow kɛ ni kɔrɔtɔ miiriya ye?