Ka Jehova ka kanuya waleɲuman lɔn: Duga minw be sɔrɔ o la ​—⁠Yɔrɔ 2nan

¹ Kalo tɛmɛnen, barokun nin yɔrɔ fɔlɔ kɔnɔ, an tun ye fɛɛrɛ naani kofɔ. U b’a yira cogo min na an be se ka Jehova ka kanuya waleɲuman lɔn waajuli baara la (1 Yuh. 4:​9-​⁠11). Barokun nin kɔnɔ, an bena fɛɛrɛ looru wɛrɛw yira, minw b’o kɛcogo yira. N’an b’an seko bɛɛ kɛ ka mɔgɔ wɛrɛw dɛmɛ Alako ta fan fɛ, an be duga sɔrɔ o la.

² Ka seereya kɛ, n’i ma wili a kama: Nin ye fɛɛrɛ barikaman ye walisa ka mɔgɔw sɔrɔ ani ka gafe nafamanw to u bolo. O ye mɔgɔw ye, tilennenya nege be minw na i n’a fɔ kɔngɔ ni minnɔgɔ. An ka ɲi ka ‘wagati bɛnnen kunmabɔ’ ani ka tɛmɛ cogoyaw bɛɛ fɛ walisa ka seereya kɛ ani ka mɔgɔ sifa bɛɛ kunbɛn (Efes. 5:⁠16). N’a sɔrɔ an mako b’a la k’an jagwɛlɛya sɔbɛ la ka seereya kɛ o cogo la. Nka n’an be Ala ka kanuya waleɲuman lɔn, ani n’an b’an janto mɔgɔw ka makoya la, an bena tɛmɛ cogoyaw bɛɛ fɛ ka seereya kɛ.​—⁠2 Tim. 1:​7, 8.

³ Misɔnden dɔ ye duga caaman sɔrɔ a kɛtɔ ka baro daminɛ ni mɔgɔ dɔ ye, min sigilen tun be a gɛrɛfɛ mobili kɔnɔ. O cɛɛ y’a mako don baro la. Misɔnden tagara bɔ a ye o kɔfɛ, ani Bibulukalan daminɛna. O cɛɛ sɔnna tiɲɛn na, ani a ye ɲɛtaga sɔrɔ fɔɔ ka kɛ diinan mɔgɔkɔrɔ dɔ ye kɔngeregasiyɔn kɔnɔ!

⁴ An kɛtɔ ka lɛtɛrɛw sɛbɛ: N’a sɔrɔ an tɛ se ka taga soo ni soo kɛnɛyako kosɔn, wala komi wagati ɲɛɛ man ɲi. O la, an be se ka lɛtɛrɛw sɛbɛ ka seereya surun di an lɔnbagaw ma, wala mɔgɔ minw ka mɔgɔ sɔbɛ dɔ sara, wala minw tun tɛ yen u ka soo an tɛmɛtɔ kiin kɔnɔ. Bibulu kalan duman be sɔrɔ an ka sɛbɛnin minw kɔnɔ, an be se k’u kɛɲɛnen dɔ fara lɛtɛrɛ kan. An k’o tigi jija a k’an jaabi ni ɲiningali dɔ b’a fɛ. I k’i tɔgɔla ladɛrɛsi d’a ma, wala Masaya Boon ta. Hakɛ to, kana Sosiyete ka ladɛrɛsi di.

⁵ Ka seereya kɛ telefɔni sababu fɛ: Nin ye fɛɛrɛ ɲuman ye walisa ka mɔgɔw sɔrɔ, an tɛ se ka minw kunbɛn waajuli kɛtɔ soo ni soo. N’an b’o kɛ nɛmɛnɛmɛ, ni kanuya ye, ani hakili diya ye, an be se ka jaabili ɲuman sɔrɔ.

⁶ Balimamuso dɔ tun be seereya kɛra telefɔni sababu fɛ. A ye muso dɔ ɲininga n’a miirila kosɔbɛ a yɛrɛ ka siniɲasigi koo la, an’a denbaya fana ta la. O muso ko a y’o kɛ. A ko jigitigɛ kosɔn, ale tigɛra mɔgɔw la ka sigi kelenya na a ka soo. An balimamuso y’i janto a la ni kɔnɔgwɛ ye minkɛ, a sɔnna k’a kunbɛn lɔgɔfɛ dɔ gɛrɛfɛ u sigida la. O sen fɛ, muso sɔnna ka Bibulu kalan kɛ!

⁷ An kɛtɔ ka lonanw bisimila: N’an b’an mɔgɔɲɔgɔnw kanu, an bena jantoli kɛ ka lonanw kɔrɔsi, minw be na an ka lajɛn yɔrɔ la. Ani, an bena u bisimila koɲuman (Rom. 15:⁠7). An k’a yira u la ko u be mɔgɔ minw cɛma, o mɔgɔw b’u janto u koo la Alako ta fan fɛ ni kɔnɔgwɛ ye. N’an b’an mako don u la sɔbɛ la, ani n’an be Bibulukalan kofɔ u ye, o be se k’u lasu ka sɔn an ka dɛmɛ la.

⁸ An ka tagamacogo ɲuman: An ka tagamacogo ɲuman fɛ, an be bonya la tiɲɛn kan (Tite 2:⁠10). Ni duniɲa mɔgɔw be anw, Jehova Seerew, tɔgɔ ɲuman fɔ, o be bonya la an ka Ala kan (1 Piɛre 2:⁠12). O fana be se ka mɔgɔ wɛrɛw dɛmɛ ka ɲɛnamaya sira minɛ.

⁹ Fɛɛrɛ looru ninw fɛ, an b’a yira ko an be Jehova ka kanuyaba waleɲuman lɔn. Mun na i tɛ segi k’o fɛɛrɛw lajɛ ani k’u sira tagama (1 Yuh. 4:⁠16)? O kɛtɔ, i bena duga caaman sɔrɔ.