Yala i labɛnnen lo ka seereya kɛ sababu dɔ sen fɛ wa?

1. Ka seereya kɛ sababu dɔ sen fɛ, mun lo b’a yira ko nafa be se ka sɔrɔ o la?

¹ Ka seereya kɛ sababu dɔ sen fɛ, nafaba be se ka sɔrɔ o la. O ɲɛyirali ɲɔgɔn caaman be sɔrɔ Bibulu kɔnɔ nafa sɔrɔla minw na ( Yuh. 4:7-15). An be se ka mun lo kɛ walisa k’an yɛrɛ labɛn o seereya sifa ɲɔgɔn kama?

2. An sawura cogo be se k’an dɛmɛ cogo di ka seereya kɛ?

² Fani doncogo ani sawura: N’an b’an janto an sawura cogo la tuma bɛɛ, o bena an dɛmɛ k’an ka limaniya kofɔ mɔgɔw ye n’an tɛ sigasiga (1 Tim. 2:9, 10). N’an sawura be maloya bila an na, an bena sigasiga ka seereya kɛ. Nka, n’an sawura saniyalen lo ani a bɛnnen lo, o yɛrɛ be se ka mɔgɔw lasun ka ɲiningali kɛ. Ɲɛyirali fɛ, balimacɛ dɔ n’a muso tun be tagama na, u sawura tun ka ɲi ani u sigilen tun be silamɛcɛ dɔ kɔrɔ. Silamɛcɛ y’u sawura kɔrɔsi minkɛ, a y’u ɲininga n’u ye kerecɛnw ye. O kɛra sababu ye ka baro kɛ Bibulu kan fɔɔ lɛri saba.

3. Aw kɛtɔ ka Yesu ladegi, aw sera ka baro daminɛ cogo di?

³ Baro daminɛcogo: Tuma min na Yesu ye Samarika muso kunbɛn Yakuba ka kɔlɔnda la, a ye baro daminɛ a kɛtɔ ka jii minta deli a fɛ dɔrɔn. O cogo kelen na, an be se ka baro daminɛ ni kuma fitinin dɔ ye wala ni ɲiningali nɔgɔman dɔ ye dɔrɔn. Hali n’an be sigasiga k’o kɛ tuma dɔ la, Jehova ka dɛmɛ sababu fɛ an be se k’an ‘jaa gwɛlɛya’ ka baro daminɛ.—1 Tes. 2:2.

4. Cogo di an labɛnnen be se ka to ka seereya kɛ sababu dɔw sen fɛ?

⁴ An ka sababuw ɲini ka seereya kɛ: Weleweledala caaman ye sababu sɔrɔ ka seereya kɛ koo dɔw sen fɛ. An k’an ka cogoya sɛgɛsɛgɛ ani ka miiri mɔgɔw koo la an ka teli ka minw kunbɛn loon o loon. An ka Bibulu fitinin ani gafe bɛnnen dɔw ta an bolo. An ka kɔrɔsili kɛ ani an k’an mako don an gɛrɛfɛ mɔgɔw la. An be se ka sababu minw sɔrɔ tile kɔnɔ, n’an be kɔn ka miiri u la, o bena an dɛmɛ an labɛnnen ka to ka seereya ɲuman kɛ.—Fil. 1:12-14; 1 Piɛrɛ 3:15.

5. Ka seereya kɛ sababu dɔw sen fɛ, mun na an ka kan ka labɛn kɛ o kama?

⁵ Kuun bɛrɛbɛrɛ fila b’a to an be tɛmɛ sababuw fɛ ka seereya kɛ: Ala kanuya ani an mɔgɔ ɲɔgɔn kanuya (Mat. 22:37-39). Kɔrɔtɔ be waajuli baara la minkɛ, an k’an yɛrɛ labɛn ka seereya kɛ sababu dɔw sen fɛ sanni k’o koo kɛ an kuun fɛ. An labɛnnen ka kan ka to walisa ka tɛmɛ sababu ɲumanw fɛ ka Masaya kibaro duman kofɔ mɔgɔw ye sanni wagati ka tɛmɛ.—Rom. 10:13, 14; 2 Tim. 4:2.