Ka fani don ani ka kuun masiri ni majigilenya ye
1 “Cɛɛw bɛɛ ye karavati don, hali denmisɛnw. Musow ni sunguruw, ani musoden fitininw bɛɛ ye ɔrɔbu wala zipu don. Mɔgɔ si ma pantalɔn jean don, wala dereke min kan yɛlɛnen be. Bɛɛ nisɔn ka di.” O ye zurunali dɔ ka lakalita ye. A tun be jama juman lo lakalila? Politiki ɲɔgɔnye dɔ wala farikolo ɲɛnagwɛ dɔ tun lo wa? Rɔku (rock) dɔnkili dala dɔw tun lo wa? O si tun tɛ! A tun be balimacɛw ni balimamusow ka tile saba lajɛnba dɔ lakalila salon.
2 Dugu wɛrɛ kɔnɔ, lajɛnba dɔ tun be kɛra. Zurunali sɛbɛbaga dɔ ye Jehova Seerew lakali nin cogo la: “Cɛɛw bɛɛ saniyalen be. U ye vɛsti (costume) ni karavati don. Musow ye fani don ni majigilenya ye, nka a cɛ ka ɲi.” Dɔ wɛrɛ, garadi dɔ, y’a fɔ ko: “Aw kɛcogo ka ɲi, aw be mɔgɔ bonya, aw saniyalen be, ani aw ferekelen tɛ. Ne ɲɛɛ be min na, o cɛ ka ɲi. Aw sera ka kɛ daan na duniɲa nɔgɔlen nin kɔnɔ!” Nin ye seereya ɲumanw ye dɛ! O tandoli minw kɛra an balimaw koo la, yala o t’an nisɔn diya wa? Tiɲɛn na, kafodenw bɛɛ ka fani doncogo ɲuman lo nana n’o lakalita ɲumanw ye.
3 Duniɲa kuru bɛɛ kɔnɔ, a lɔnnen be ko an cogoya be daan na (Mal. 3:18). Mun na? Sabu an be tugu Bibulu ka ladili kɔ. A b’an jija an k’an ‘masiri cogo bɛnnen na ka fini bɛnnen don minw be an sutara, . . . an k’an masiri ni kɛwale ɲumanw ye. Mɔgɔ minw ko u be siran Ala ɲɛ, o be bɛn ni olu cogo ye.”—1 Tim. 2:9, 10.
4 I ka fani doncogo n’i kuun masiri cogo be mun lo yira? An ka faniw, ani u doncogo be kuma ka gwɛ an koo la: an ka lannakow, an ka miiriyaw, ani an ka ŋaniya. An be tugu sangawili min kɔ, o b’a yira an ye mɔgɔ sifa min ye. Duniɲa ka kɛcogo n’a ka miiriya kolonw minw jɛnsɛnnen be, an t’a fɛ abada k’u wangola. An tɛ jɔrɔ ni fani doncogo dɔ be sanga la. An b’a fɛ k’a lɔn n’a bɛnnen be mɔgɔw ma minw b’a fɔ ko olu ye Ala ka cidenw ye (Rom. 12:2). Sanni ka tugu sangawili dɔ kɔ, min be yɛrɛta hakili wala kakalaya kɛcogo dɔ yira, an b’a fɛ k’a yira ko an be “Ala tanu” tiɲɛn na.—1 Piɛre2:12.
5 Mɔgɔ min ye mɔgɔ kura ye, wala min ka hakilitigiya ma bon, wala min ka hakilimaya barika ka dɔgɔ, o tigi be se ka sɔn duniɲa ka fani doncogo ni kuun masiri cogo sifa bɛɛ la n’a yɛrɛ m’a miiri ko o be se ka nɔɔ to Jehova n’a ka jɛkulu kan. An bɛɛ ka kan k’an yɛrɛ sɛgɛsɛgɛ k’a filɛ ni duniɲa ka miiriya nɔɔ tɛ an kan. An be se ka magwɛrɛ balimacɛ wala balimamuso sɔbɛ dɔ la, min kɔgɔra Alako ta fan fɛ. Ani, an k’a ɲini a fɛ a ka an ka fani doncogo n’an ka kuun masiri cogo filɛ, ani a ka gwɛ k’a ka fɛta fɔ an ye. O kɔ, an ka miiri kosɔbɛ a ka ladiliw kan.
6 Dɔw be sɔn joona a la k’u ka kan k’u janto u ka fani doncogo la u tagatɔ lajɛnba la. Nka kalan bannen kɔ, ani ɲɛnagwɛ kɛtɔ, u tɛ jantoli kɛ tugun sɔbɛ la. Kɛcogo kɔrɔtalen minw bɛnnen be kerecɛn cidenw ma, an k’u mara (2 Kɔr. 6:3, 4). An mana taga foroba yɔrɔ o yɔrɔ la, an ka lajɛnba tagamasiɲɛ ani an ka fani doncogo n’an ka kuun masiri cogo ɲumanw b’a yira ko an ye Jehova Seerew ye. O kama, an ka kan ka fani don ka ɲɛ ni majigilenya ye tuma bɛɛ. A doncogo ka kan k’a yira ko an “tɛ dinyɛ taw ye.”—Yuh. 15:19.
7 Tile saba lajɛnba “Masaya ka weleweledala kisɛmanw” kɛtɔ ɲinan, an k’an seko bɛɛ kɛ k’a yira ko an ye “siya senuma ye Matigi [an] ka Ala ye.” Sereya ɲuman min bena sɔrɔ o la, o bena dɔ fara Jehova ka “tanuli ni tɔgɔba ni bonya” kan.—Dut. 26:19.
[Picture on page 6]
Nɔɔrɔ be la Jehova kan cogo min na:
■ Cogo min bɛnnen be Ala ka baarakɛla ma, fani don o cogo la.
■ Sangawili minw be duniɲa ka miiriya yira, fara u la.
■ Majigilenya yira,
min b’a yira ko i ye
mɔgɔ hakilitigi ye.