Aw Ka Ɲiningaliw Jaabiliw

◼ Fani doncogo juman lo bɛnnen be n’an be taga Jehova Seerew ka batosow n’u ka baarakɛbonw filɛ?

Duniɲa kuru bɛɛ kɔnɔ, Masaya Boonw, lajɛnba boonw, Betɛliw, ani tɔnbolo ka boon wɛrɛw ye yɔrɔ kɛrɛnkɛrɛninw ye minw dira Jehova ma a ka baara kama. U lɔra cogo nɔgɔman na. U saniyalen be, u ladonnen be ka ɲɛ ani danbe be u kan. U be dan na ni an delila ka min ye Sitanɛ ka duniɲa kɔnɔ fɔɔ ka taga ka na. N’an be taga o yɔrɔw filɛ, mɔgɔw ka kan k’a ye ka gwɛ ko an ye Jehova taw ye, minw b’a sago kɛ.

An minw ye kerecɛnw ye, “an b’an yɛrɛw jira ko an ye Ala ka baarakɛla ɲumanw ye fɛn bɛɛ la” hali fani doncogo ɲuman ani kuun masiri cogo la (2 Kɔr. 6:3, 4). A fana ɲinina an fɛ an k’an yɛrɛ minɛ koɲuman. Tuma bɛɛ, an ka fani doncogo n’an kuun masiri cogo ka kan k’an sutara ani ka danbe la an kan i ko Jehova Ala sagokɛlaw. O kɔni ye tiɲɛn ye sanko n’an be tagara New York ka sigiyɔrɔsoba filɛ ani tɔnbolo minw be duniɲa kɔnɔ.

Baro kɛtɔ fani doncogo ni kuun masiri cogo ɲuman kan, gafe Organisés pour faire la volonté de Jéhovah y’a yira ko n’an be taga waajuli la wala kafo ka lajɛnw na, a kɔrɔtalen lo k’an farikolo saniya, ka fani don ni majigilenya ye ani k’an kuun masiri ka ɲɛ. A ɲɛɛ 138, dakun 3nan na, a fɔra ko: “I hakili to a la ko Betɛli kɔrɔ ko ‘Ala ka soo.’ O kama n’an be taga yen, an ka kan ka fani don, k’an kuun masiri ani k’an yɛrɛ minɛ i n’a fɔ an be tagara lajɛnw na Masaya Boon na.” Masaya weleweledalaw ka kan k’o saratiba dafa n’u be taga Betɛli filɛ u ka jamana na wala jamana wɛrɛ la. O cogo la u b’u ka waleɲumanlɔn n’u ka bonya yira cogo bɛnnen na.—Zab. 29:2.

An ka fani doncogo ka kan k’a yira ko an ye mɔgɔw ye minw b’a fɔ “ko u bɛ siran Ala ɲɛ.” (1 Tim. 2:10). N’an be fani don k’an kuun masiri ka ɲɛ, o b’an filɛbagaw lasun u ka Jehova ka batoli jati sɔbɛko ye. Nka a kɔrɔsira ka ye ko ni balimaw be taga Jehova ka batosow n’a ka baarakɛbonw filɛ, u dɔw b’u yɛrɛw labila kojugu, u ka fani doncogo ferekelen lo wala a b’u farikolo cogoya yira. O fani doncogo man kan ni kerecɛnw ye wagati si la. Nin koo nin na, ani an ka kerecɛnya faan bɛɛ la, an b’a fɛ ka sariyakolo kɔrɔtalenw bato minw b’an kɛ dan na ni duniɲa mɔgɔw ye, ani ka koo bɛɛ kɛ Ala bonyali kosɔn.—Rom. 12:2; 1 Kɔr. 10:31.

O kama n’an ye labɛn kɛ ka taga Jehova Seerew ka sigiyɔrɔsoba ni Betɛli filɛ New York mara la, n’an be taga tɔnbolo wɛrɛ filɛ wala n’an be vakansi la ani an be dugu yɔrɔ dɔw yaalala, an k’an yɛrɛ ɲininga ko: ‘Ne b’a fɛ ka taga yɔrɔ min filɛ, yala ne ka fani doncogo ni ne kuun masiri cogo bɛnnen be o yɔrɔ lɔcogo dama kɛɲɛnen n’a saniya cogo n’a danbe ma wa? Ne be Ala min bato, yala a be ale danbe yira wa? Kɔni ne sawura tɛna mɔgɔw bila ɲɛmalɔbaliya la k’u kɔnɔgwan dɛ?’ An k’a to an ka fani doncogo n’an kuun masiri cogo ka “an Kisibaa Ala ka kalan bonya ko bɛɛ la” tuma bɛɛ!—Tite 2:10.