Fani doncogo saniman, min ka kan ni tandoli ye
1 “Jehova Seerew ɲɔgɔnw tɛ yen! Aw ka mɔgɔw nisɔn ka di, u fani doncogo ka ɲi, ani u be mɔgɔ bonya kosɔbɛ.” Lotɛli tigi dɔ y’o lo fɔ an balimaw koo la salon ka tile saba lajɛnba dɔ la. Lajɛnba wɛrɛ la, lotɛli baarakɛla dɔ y’a fɔ ko: “A gwɛnen be ko aw ka mɔgɔw be fani don walisa ka diya Ala ye.” Tiɲɛn na, mɔgɔw ɲɛɛ be lajɛnba tagabagaw kan. O kama, an b’a fɛ ka fani don ‘ka bɛn ni Kibaru Duman ye.’ Tuma dɔw la, o be kɛnɛma mɔgɔw lasun u k’an fo, ani o b’a yira ka gwɛ ko an ye Ala ka baarakɛlaw ye (Filip. 1:27). An kɛtɔ k’an labɛn tile saba lajɛnba kama, a ka ɲi an ka kɔn ka miiri an ka fani doncogo koo la.
2 Kalanden Yakuba y’a sɛbɛ ko “hakilitigiya min bɛ na ka bɔ sankolo la, fɔlɔ, o senuma don.” ( Yaku. 3:17). Ka senumanya yira an ka fani doncogo la, o be se ka gwɛlɛya. Sitanɛ ka kakalaya duniɲa be mɔgɔ lasun u ka sɔn fani modɛli dɔw la, minw majigilen tɛ, u be cɛko ni musoko nege bila mɔgɔ la, u ka waga, ani u bɛnnen tɛ (1 Yuh. 2:15-17). O kama, sanni an ka sɔn fani doncogo ni kuun masiricogo dɔw la, an ka kan k’an janto fɔlɔ Bibulu ka lasɔmini na ka “ban Ala ɲɛsiranbaliya ni nin diɲɛ nege juguw ma, ka taama nin waati la ni hakili sigilen . . . ye.” (Tite 2:12). An t’a fɛ abada an ka fani doncogo ka mɔgɔ wɛrɛw kɔnɔ gwan, a ka kɛ an balimaw, wala an filɛbaga wɛrɛw ye.—1 Kɔr. 10:32, 33.
3 A majigilen be, ani a cogo bɛnnen be: Labɛn kɛtɔ lajɛnba kama, an k’an yɛrɛ ɲininga ko: ‘Yala ne ka fani doncogo majigilen be, wala yala a be mɔgɔw ɲɛɛ sama ka la ne yɛrɛ lo kan kojugu wa? Yala a b’a yira ko ne be n’ janto mɔgɔ wɛrɛw ka fɛtaw la wa? Yala ne ka dereke kaan be ne disi dayɛlɛnen to kojugu, wala yala a ka surun kojugu wa? Yala ne ka ɔrɔbu be ne farikolo cogoya yira wala a be ne degun wa? Yala ne ka faniw saniyalen be, ani u kasa tɛ mɔgɔw degun wa? Lajɛnba kalan banni kɔ, ni ne be lafiyara, yala ne ka fani doncogo bena bɛn ani a bena saniya ka kɛ ciden ta ye wa? Wala, yala ne ka fani doncogo bena fereke, a bena tugu sangawili kɔ, ne bena a labila, ani a tɛna bɛn ciden ma, lajɛnba tagamasiɲɛ sɛbɛ nɔrɔnen be min kan wa? Ne bena fani minw don lafiya tuma na, yala u bena ne bali ka sen fɛ seereya di mɔgɔw ma wa?’—Rom. 15:2, 3; 1 Tim. 2:9.
4 Kerecɛn kɔgɔnenw ka ladiliw be se k’an nafa. Musow ka kan k’a ɲini u cɛɛw fɛ u k’a fɔ u ye cogo juman na mɔgɔw bena u ka fani doncogo jati. Kerecɛn bangebagaw be se k’u ka kamalendenw ni sungurudenw dɛmɛ o fan fɛ. Ka fara o kan, balimamuso kɔrɔ minw masirilen be Ala la, u be se ka “muso misɛnw kalan . . . ko u ka kɛ muso hakilimanw jɛlenw ye” u ka fani doncogo ta fan fɛ, “walisa Ala ka kuma tɔgɔ kana tiɲɛ.” (Tite 2:3-5). Ɲɛyiraliw be sɔrɔ an ka gafew kɔnɔ, minw be fani doncogo majigilen, bɛnnen yira. U be se k’an dɛmɛ.
5 An ka bonya la Jehova kan: Tile saba lajɛnba be sababu ɲuman di an bɛɛ ma an ka Jehova tando, kalankɛlaw dɔrɔn ka koo tɛ. Siga t’a la, an bena a bonya an ka kerecɛnya tagamacogo n’an ka kumaw fɛ. Nka an filɛbaga caaman be fɛɛn fɔlɔ min kɔrɔsi an kan, o ye an ka fani doncogo n’an kuun masiricogo ye. An bɛɛ ka tandoli lase Jehova ma an ka fani doncogo sababu fɛ, min saniman lo, ani a ka kan ni tandoli ye.—Zab. 148:12, 13.
[Study Questions]
1. An kɛtɔ k’an labɛn tile saba lajɛnba kama, mun na a kɔrɔtalen be an ka miiri an ka fani doncogo la?
2. Mun na a ka gwɛlɛ ka fani don ani ka kuun masiri cogo senuman na?
3. Ɲiningali jumanw bena an dɛmɛ an k’an janto an ka fani doncogo la?
4. Cogo juman na mɔgɔ wɛrɛw be se k’an dɛmɛ walisa an ka senumanya yira an ka fani doncogo fɛ?
5. Lajɛnba wagati la, cogo juman na an bɛɛ be se ka tandoli lase Jehova ma?
[Box on page 4]
Dɛmɛ, walisa an ka fani doncogo ka kɛɲɛ ni tandoli ye
◼ Ala ka Kuma
◼ An k’an yɛrɛ sɛgɛsɛgɛ
◼ Mɔgɔ wɛrɛw ka fɛtaw
◼ An ka gafew