An ka kaan fɔbaga sifaw bɛɛ lajɛn

¹ Ala ka Kuma be dafara! “Kan fɔbaaw ni siyaw bɛɛ” be sɔnna tiɲɛn batoli la (Zak. 8:23). Cogo juman na Jehova Seerew be ‘bɔnsɔnw bɛɛ ni mɔgɔ sifaw bɛɛ ni kaanw bɛɛ’ dɛmɛna walisa u ka saniya Jehova ɲɛ kɔrɔ, ani u ka kisi “tɔɔrɔba” ma?—Jira. 7:9, 14.

² Ala ka ɔriganisasiyɔn be dɛmɛ kɛ: Koow Ɲɛnabɔla Jɛkulu ye labɛn kɛ walisa Bibulu gafew labilanen ka sɔrɔ kaan 380 ɲɔgɔn na. O cogo la, dugukolo kan mɔgɔw bɛɛ be se ka kibaro duman nafa faamuya ka gwɛ. Ka gafew labɛn ani k’u sɛbɛ o kaan caaman ɲɔgɔn na, o ye baaraba ye. O kɔrɔ ko gafe bayɛlɛmabaga setigi jɛkuluw ka kan ka labɛn. Baarakɛminanw ka kan ka di u ma walisa gafew ka sɛbɛ o kaanw bɛɛ la, ani u ka ci kafow ma. Nka baara faan belebeleba be sɔrɔ Masaya weleweledalaw kelen kelen lo bolo: Ka Bibulu ka cira lase mɔgɔw ma. O cira be kisili kɛ.

³ Ka see sɔrɔ o gwɛlɛya kan: Bi, yɔrɔ caaman na, kaan wɛrɛ fɔbagaw ka ca. Walisa ka kibaro duman lase o mɔgɔw ma, Ala ka baarakɛla caaman b’u jijara ka kaan wɛrɛ dege i n’a fɔ: sinuwa, irisi, ɛsipaɲɔli, wala kaan wɛrɛ min be fɔ u sigida la. Dɔ wɛrɛw be Ameriki wala Faransi bobow ka kumacogo dege. Farafinna, kibaro duman waajuli be kɛra kaan caaman na. Fɔlɔ la, mɔgɔ dɔw tun ma Jehova koo mɛn ka ye, wala u tun tɛ foyi lɔn Bibulu koo la. Sisan, u be sɔnna Ala ka Kuma tiɲɛn kalan na.—Rom. 15:21.

⁴ Siya wɛrɛ minw be an sigida la, yala an be se ka dɔ fara an ka jijali kan walisa ka kibaro duman fɔ u ye wa? (Col. 1:25) Kafo caaman be waajuli kɛ lonanw sigiyɔrɔw la u ka kiinw kɔnɔ. Weleweledalaw b’a daminɛ ka kuma dɔɔni dege o kaan na walisa ka se ka seereya di cogo nɔgɔman na, i n’a fɔ: “A ni sɔgɔma. Kibaro duman dɔ filɛ nin ye. [O kɔ, sɛbɛnin dɔ wala kitabunin dɔ di a ma a ta kaan na.] Ka an bɛn.” Tiɲɛn na Jehova b’o daminɛni fitininmanw duga!

⁵ Mɔgɔ minw bɔyɔrɔ n’u kaan tɛ kelen ye, Masaya kibaro b’u bɛɛ dusukun sama. Cogoya dira an ma k’a lase u ma. An k’o cogoya minɛ.