Aw Ka Ɲiningaliw Jaabiliw

◼ An ka kan k’an hakili to mun na n’an be baara kɛ ni telefɔni selilɛri ani bipɛr ye?

O fɛɛrɛw sababu fɛ, an be se ka mɔgɔ weele hali n’an be yɔrɔ o yɔrɔ. Hali ni nafa b’o fɛɛrɛw la, an ka kan k’an janto u kana an hakili bɔ an ka cidenyabaara ani kerecɛn lajɛnw na. O koo be se k’an sɔrɔ cogo di?

I miiri k’a filɛ, a be se ka nɔɔ min to mɔgɔ kan ni waajuli kɛtɔ, an ka telefɔni selilɛri wala bipɛr y’a daminɛ ka kule. An lamɛnbaga bena mun miiri? Nɔɔ juman bena to a kan n’an ye baro tigɛ walisa ka taga weeleli jaabi? An kɔni t’a fɛ ka koo si kɛ, koo min be se ka mɔgɔ bali ka Masaya kibaro lamɛn (2 Kɔr. 6:3). O kama, ni telefɔni selilɛri wala bipɛr b’an fɛ, an k’a koo ɲɛnabɔ walisa a kana an lalɔ, wala mɔgɔ wɛrɛ lalɔ, n’an be waajuli kɛra.

Sisan, n’an be kɔnɔni kɛra tuma min na dɔ wɛrɛw be seereya kɛra do? N’an ye wagati dɔ latigɛ waajuli kama, yala a man fisa an k’an hakili jɔlen to o baara kan wa? An ka baara senuman ka kan ni bonya ye. O kosɔn, an k’an janto k’an tɔgɔla koɲɛw ɲɛnabɔ wagati wɛrɛ la n’i kɔrɔtɔba koow tɛ (Rom. 12:7). Ayiwa, o man kan k’an bali ka tɛmɛ telefɔni fɛ ka seereya di mɔgɔ ma, wala ka ɲɔgɔnye loon di a tigi ma waajuliko kama.

An ka kan ka kɔrɔsiliba kɛ ni mobili bolitɔ telefɔni selilɛri b’an bolo. Sɛgɛsɛgɛriw y’a yira ko akisidan farati ka bon n’an b’o kɛ. Sariya dɔw be daan sigi telefɔni selilɛri kan mobili bolitɔ. An ka kan k’o sariyaw bato tigitigi.

An be taga kerecɛnya lajɛnw na ani lajɛnbaw la walisa ka Jehova bato ani ka kalan a fɛ. N’an b’o wagatiw senumanya waleɲuman lɔn, yala an tɛna an ka telefɔni selilɛri wala bipɛr ɲɛnabɔ janko a kana anw, ani mɔgɔ wɛrɛw, hakili bɔ kalan na wa? N’an ka ɲi ka kɔrɔtɔ koo dɔ ɲɛnabɔ, an ka kan ka bɔ kɛnɛma o kama. An ka kan ka labɛn kɛ k’an tɔgɔla koɲɛ wɛrɛw ɲɛnabɔ wagati wɛrɛ la: min tɛ batoli wagati ye.—1 Kɔr. 10:24.

N’an be baara kɛ ni telefɔni selilɛri wala a ɲɔgɔnna fɛɛrɛ wɛrɛw ye, an k’a yira tuma bɛɛ ko an b’an janto mɔgɔ tɔɔw la, ani ko, an be Alakow waleɲuman lɔn sɔbɛ la.