Aw Ka Ɲiningaliw Jaabiliw

◼ N’an be kafo ka lajɛnw na wala waajuli la, Bibulu kɔnɔ miiriya jɔnjɔn jumanw ɲɛsinna telefɔni selilɛri koo ma?

“Fɛn bɛɛ ni a waati don.” (Waaj. 3:1): Telefɔni selilɛri sababu fɛ, mɔgɔw be se ka kuma ɲɔgɔn fɛ wala ka sms ci ɲɔgɔn ma wagati bɛɛ. Nka kerecɛn sɔbɛw t’a fɛ u ka telefɔni k’u hakili ɲagami wagati dɔw la. Ɲɛyirali fɛ, lajɛnw wagati latigɛra ka Jehova bato, ka kalan sɔrɔ a fɛ ani ka ɲɔgɔn jija n’an balimaw ye (Dut. 31:12; Zab. 22:23; Rom. 1:11, 12). O kama, n’an sera lajɛnw na, an ka telefɔniw faga. An bɔnin kɔ lajɛnw na, an be se k’an ka sms lajɛ kɔfɛ. N’an y’an ka telefɔni mɛnɛnin to sabu an ka kan ka kɔrɔtɔko dɔ ɲɛnabɔ, an k’a labɛn cogo dɔ la walisa a kana mɔgɔw kɔnɔ gwan.

An ka “fɛn bɛɛ kɛ Kibaru Duman kosɔn” (1 Kɔr. 9:23): Tuma dɔw la, kuun bɛrɛ b’a la ka baara kɛ n’an ka telefɔni selilɛri ye waajuli la. Ɲɛyirali fɛ, waajuli kɛtɔ kiin kɔnɔ, balimacɛ min be jɛnkulu ɲɛminɛna, ale be se ka tɛmɛ a ka telefɔni fɛ k’a ka jɛnkulu mɔgɔ dɔw weele k’a filɛ u be faan min fɛ. Tuma dɔw la weleweledala dɔw b’u ka vizitiw wala Bibulu kalandenw weele telefɔni na k’a filɛ n’u be yen ka sɔrɔ ka taga bɔ u ye janko n’o tigilamɔgɔw yɔrɔ ka jan. N’an be kumana mɔgɔ dɔ fɛ waajuli la ani telefɔni b’an kun, an k’an janto a kana kule k’a to an be baro tigɛ (2 Kɔr. 6:3). A be se ka kɛ ko an be weleweledala dɔw kɔnɔna waajuli la. Sanni an ka to ka weeleli kɛ telefɔni na wala ka sms ci an teri dɔ ma, a ka fisa an k’an janto waajuli baara koo la ani an ka waajulikɛɲɔgɔnw koo la.

I janto tɔɔw la (1 Kɔr. 10:24; Fil. 2:4): An ka kɛ lɛri la waajuliko lajɛnw na tuma bɛɛ. An kana a miiri abada ko hali n’an tora kɔfɛ, an bena se ka mɔgɔ dɔ weele telefɔni na wala ka sms ci a tigi ma walisa k’a lɔn jɛnkulu mɔgɔw be yɔrɔ min na. N’an sera kɔfɛ, jɛnkulu tun ye labɛn min kɛ, tuma caaman na o ka kan ka yɛlɛma. Tiɲɛn lo, koo dɔw be se k’an bila kɔfɛ k’a sɔrɔ an bolomakotɛ. Nka n’an b’an jija ka kɛ lɛri la tuma bɛɛ, an b’a yira ko an be bonya la Jehova ka labɛn kan. Balimacɛ min be jɛnkulu ɲɛminɛna, an b’a yira ko an be bonya la ale ni jɛnkulu mɔgɔ tɔɔw fana kan.