I ka hakilimaya wasa
1 An ka lajɛnba nata “Masaya ka weleweledala kisɛmanw” be fɛɛrɛ cɛɲumanba di an ma k’an ka hakilimaya wasa. I n’a fɔ domuni ɲuman b’a kɛ cogo min na, lajɛnba kalan bena an ka hakilimaya balo ni ‘dannaya kumaw’ ye (1 Tim. 4:6). A bena an dɛmɛ an k’an magwɛrɛ kosɔbɛ Jehova la. Ani, an jigi b’a la ka ladiliw ni jagwɛlɛya sɔrɔ walisa k’an dɛmɛ ka ɲɛnamaya ka gwɛlɛyaw kɛlɛ. Jehova b’an jigi sigi ko: “Ne na hakilitigiya di i ma. I ka kan ka sira min taama, ne na o jira i la. Ne na i kalan ne ɲɛsiran ko la, ka ne ɲɛ jɔlen to i kan.” (Zab. 32:8). An ka ɲɛnamaya kɔnɔ Jehova b’an ɲɛminɛ. O ye duba ye an fɛ dɛ! Koo nɔgɔman dɔw filɛ, an be se ka minw kɛ walisa ka nafa fisaman sɔrɔ lajɛnba ka kalan na.
2 An mako b’a la k’an dusukun labɛn: An kelen kelen bɛɛ ka koo lo k’an yɛrɛ dusukun bisigilaman tanga (Ntal. 4:23). O kama, an ka kan k’an yɛrɛ kolo, ani an ka gwɛ n’an yɛrɛ ye. Lajɛnba ye wagati ye an fɛ ka miiri an ka jɛnɲɔgɔnyaw kan, minw be an ni Jehova cɛ. Wagati lo ka ‘sariya dafalen, hɔɔrɔnya sariya kɔni filɛ ni kɔrɔsili ye.’ Walisa k’an dusukun labɛn a ka ‘sɔn kuma ka dan a la’, an ka kan ka Jehova deli a k’an sɛgɛsɛgɛ k’a filɛ n’an be “sira jugu” dɔ kan: sira min ka kan ka latilen. Fana, an k’a deli a k’an ɲɛminɛ “sira banbali” kan.—Yaku. 1:21, 25; Zab. 139:23, 24.
3 Lamɛnni kɛ, ani miiri o kan: Komi Mariyama tun b’a jantora kosɔbɛ a ka kumaw la Yesu y’a tando nin cogo la: “Mariyama ye niyɔrɔ ɲuman de ɲɛnatɔmɔ, o tɛna bɔsi a la.” (Luka 10:39, 42). N’o miiriya sifa be an fana la, an tɛna a to koo misɛnw k’an hakili bɔ kalan na. An bena labɛn sɔbɛ kɛ ka sigi ani ka kalan bɛɛ lamɛn ni jantoli ye. An bena fara a la ka kuma wala ka tagama koo gwansan kama. Ka fara o kan, an ka kan ka kɔrɔsili kɛ an kana mɔgɔ wɛrɛw hakili bɔ kalan na ni telefɔni selilɛri ye, wala bipɛr, ni fototalan, ani videwo ye.
4 An kɛtɔ ka kalanw lamɛn, a ka ɲi an ka kunnafoni surunw sɛbɛ. O b’an dɛmɛ ka kalan fɔcogo jate minɛ. An be min lɔn ka ban, an be min lamɛnna, an ka kan ka jɛn sigi u cɛ. O lo bena an dɛmɛ ka hakilinataw faamuya ani k’u mara an hakili la. An ye kunnafoni minw sɛbɛ, an kɛtɔ ka segi u kan, an ka kan k’o kelen lo kɛ walisa k’a ɲini k’u sira tagama. An bɛɛ be se k’an yɛrɛ ɲininga ko: ‘Jɛnɲɔgɔnya min be ne ni Jehova cɛ, hakilinata nin be se ka nɔɔ juman lo to o kan? Ne mako b’a la ka yɛlɛmani juman don ne ka ɲɛnamaya kɔnɔ? Ne mana jɛn ni mɔgɔ wɛrɛw ye, ne be se ka kunnafoni nin sira tagama cogo di? Ne be se ka baara kɛ n’a ye cogo di waajuli kɛtɔ?’ Hakilinata minw diyara an ye kosɔbɛ, an ka baro kɛ u kan ni mɔgɔ wɛrɛw ye. N’an b’a kɛ o cogo la, o bena an dɛmɛ ka Jehova ka darakanw mara ‘an dusukun na.’—Ntal. 4:20, 21.
5 An be min kalan, an k’o sira tagama: Lajɛnba dɔ kɔ, balimacɛ dɔ y’a fɔ ko: “Kalan tun ɲɛsinna bɛɛ kelen kelen ma. A ye bɛɛ lasun k’a yɛrɛ dusukun sɛgɛsɛgɛ, ani k’a denbaya mɔgɔw fana ta sɛgɛsɛgɛ. A fana ye bɛɛ lasun ka Bibulu ka dɛmɛ lase tɔɔw ma ni kanuya ye. A ye ne dɛmɛ k’an ka kunkanbaara ta sɔbɛ la ka kafo dɛmɛ.” N’a sɔrɔ an caaman y’o lo miiri fana. Nka, ka jagwɛlɛya ni barika kura sɔrɔ lajɛnba la ani ka segi ka taga soo, o tɛ labɔri kɛ. Yesu y’a fɔ ko: “Sisan aw be o kow dɔn. Ni aw ye o kow kɛ, aw na kɛ dubadenw ye.” ( Yuh. 13:17). Hakilinata minw ɲɛsinna an ma, an ka kan ka timinandiya k’u sira tagama (Filip. 4:9). O ye gundo ye, min sababu fɛ an be se k’an ka hakilimaya wasa cogo dafalen na.
[Picture on page 5]
I be min lamɛn, miiri o kan:
■ Jɛnɲɔgɔnya min be ne ni Jehova cɛ, o be nɔɔ juman to o kan?
■ Jɛn min be ne ni mɔgɔ wɛrɛw cɛ, a be nɔɔ juman to o kan?
■ Ne be se ka baara kɛ n’a ye cogo di ne ka ɲɛnamaya kɔnɔ ani waajuli kɛtɔ?