An kanbɛnnen ka tugutugu ɲɔgɔn na
1 Hadamaden farikolo cɛɲiya kabako ye i minɛ siɲɛ joli (Zab. 139:14)? Farikolo yɔrɔ kelen kelen be jɛn ni tɔɔw ye ka baara kɛ. Ala ka Kuma be kerecɛnya kafo suma ni farikolo ye, min labɛnnen be koɲuman. Kuun, Kirista, jukɔrɔ kafodenw bɛɛ ‘labɛnnen be ani bɛɛ be ɲɔgɔn minɛ kolotugu yɔrɔw barika la ka kɛɲɛ ni u bɛɛ kelenkelen ka baarakɛ cogo ye’ (Efes. 4:16a). O cogo la, Jehova be se ka tɛmɛ a ka jama kanbɛnnen fɛ ka koo cɛɲumanbaw dafa.
2 Saan kɛmɛkulu fɔlɔ la, kafodenw y’u janto ɲɔgɔnw ka hakilimaya ani farikolo makow la “ni miirili kelen ye” (Kew. 2:44-47). Jehova ka dɛmɛ sababu fɛ, u ye kɔrɔbɔli farinman kunbɛn ani u ye see sɔrɔ a kan ni miirili kelen ye (Kew. 4:24-31). Yɔrɔ o yɔrɔ u tun be taga, u ye Masaya cira fɔ. O la, u ye kibaro duman jɛnsɛn o wagati la ka duniɲa bɛɛ kɔnɔ (Kolos. 1:23). Bi tile la, kerecɛn kafo y’o ɲɔgɔn kɛ ni miirili kelen ye. A yɛrɛ ye fɔlɔ ta dan. O kelenya sababu ye koo jumanw ye?
3 Ala ka kalan y’an kɛ kelen ye: An ka batoli y’an kɛ kelen ye dugukolo bɛɛ kan. Cogo di? Jehova be tɛmɛ fɛɛrɛ yeta min fɛ ka hakilimaya “dumuni ko ɲɛnabɔ a waati latigɛlen na”, an be sɔn o fɛɛrɛ la (Mat. 24:45). A fana ye cɛɛ minw kɛ “nilifɛnw” ye walisa ka kafo kalan, an b’u waleɲuman lɔn. Jehova ye labɛn kɛ walisa k’an balo hakilimaya ta fan fɛ. Komi an y’an yɛrɛ majigi ka sɔn o labɛn na, an be Ala ka Kuma faamuya cogo fisaman na. O b’an bɛɛ lasun k’a ɲini ka Yesu ladege i ko a kalandenw. An ka kan k’an jija sɔbɛ la ka ‘kɛ kelen ye dannaya la’, an kɛtɔ ka timinandiya Ala ka Kuma kalan na (Efes. 4:8, 11-13). Yala i b’i seko kɛ walisa an ka to kelenya la hakilimaya ta fan fɛ, i kɛtɔ ka Bibulu kalan loon o loon wa?
4 Kerecɛnya jɛnɲɔgɔnya b’an kɛ kelen ye: Kanuya b’a to an be magwɛrɛ ɲɔgɔnw na kerecɛnya lajɛnw na. O lajɛnw na, an be “an janto ɲɔgɔn na” (Heb. 10:24, 25). O kɔrɔ ko an ka kan k’an balimaw lɔn koɲuman, ani an man kan ka dan ɲɛfilɛri dɔrɔn ma. An k’u filɛ i n’a fɔ Jehova b’u filɛ cogo min na: mɔgɔ nafamanbaw (Agize 2:7, NW). An kɛtɔ k’u lamɛn u b’u ka lanaya lakalila, an ka ɲɔgɔn kanu be bonya ani an ka kelenya be barika sɔrɔ. Yala tɔɔw b’i lɔn i ko mɔgɔ, min be timinandiya lajɛnw tagali la wa?
5 Waajuli baarakɛɲɔgɔnw: N’an be jɛn n’an balima dannabagaw ye ka kibaro duman waajuli kɛ, o b’an kɛ kelen ye Ala ka sago kɛli la. Minw tun kɛra ciden Pol ka ‘baarakɛɲɔgɔnw ye Ala ka masaya baara la’, a tun b’u kanu kosɔbɛ (Kolos. 4:11). An kɛtɔ ka walew lakali ɲɔgɔnw ye, ani ka ɲɔgɔn dɛmɛ waajuli la, o b’an dɛmɛ k’an ka kerecɛnya cii dafa. O fana be barika don an ka kelenya jɛn na. —Kolos. 3:14.
6 Hakili senu nɔɔ b’an kɛ kelen ye: Komi an be timinandiya k’a ka sago kɛ, Jehova b’an duga a ka Hakili senu fɛ. O b’an dɛmɛ k’an ka bɛnbaliyaw ɲɛnabɔ, ani ka sigi ɲɔgɔn fɛ kelenya la (Zab. 133:1). O b’an lasun ka “Ni senu ka kelenya mara hɛrɛ sirilan na” (Efes. 4:3). N’an be ɲɔgɔn minɛ ni Hakili senu deenw cogo ye, an bɛɛ be se ka kɛ sababu ye bɛn be sɔrɔ Ala ka jama cɛ. —Gal. 5:22, 23.
7 An kɛtɔ ka baara kɛ kelenya la Kirista kuntigiya jukɔrɔ, farikolo “bɛ jiidi ka dɔ fara a yɛrɛ barika kan kanuya la.” (Efes. 4:16b). Ka fara o kan, a be nɔɔrɔ la Jehova, “Hɛrɛtigi Ala”, kan.—Rom. 16:20.