Yala i b’i seko kɛ walisa waajuli rapɔɔri ka kɛ tigitigi wa?
1 Bibulu ka lakalita caaman kɔnɔ, an be jatiden tigitigiw sɔrɔ. O b’an dɛmɛ ka koow kɛcogo tigitigi lɔn. Ɲɛyirali fɛ, cɛɛ 300 dɔrɔn sababu fɛ, Jedeɔn ye see sɔrɔ Madiyankaw ka daga kan (Kirit. 7:7). Jehova ka mɛlɛkɛ ye Asirikaw ka sɔrɔdasi 185 000 faga (2 Masak. 19:35). Saan 33 an ka tile la, Pantekɔte loon, mɔgɔ 3 000 ɲɔgɔn batisera. Ani dɔɔni o kɔ, dannabaga daa sera 5 000 ɲɔgɔn ma (Kew. 2:41; 4:4). O lakalitaw b’a yira ka gwɛ ko fɔlɔ la, Ala ka baarakɛlaw tun be jijali sɔbɛ kɛ ka rapɔɔri dafalenw ni rapɔɔri tigitigiw lajɛn.
2 Bi, Jehova ka ɔriganisasiyɔn b’a ɲini an fɛ an k’an ka waajuli baara rapɔɔri kɛ kalo o kalo. N’an be sɔn k’o kɛ ni kantigiya ye, an be kɛ sababu ye waajuli baara ka labɛn koɲuman. Rapɔɔriw be se k’a yira ko waajuli faan dɔ ka kan ka fisaya. Wala, yɔrɔ dɔ mako be waajulikɛla caaman na. Kafo kɔnɔ, rapɔɔriw be diinan mɔgɔkɔrɔw dɛmɛ k’a lɔn jɔn be se ka dɔ fara a ka baara kan, ani jɔn mako be dɛmɛ na. Ani, rapɔɔri minw be Masaya baara ka ɲɛtaga yira, u be kerecɛnw ka jɛkulu bɛɛ jagwɛlɛya. Yala i b’i seko kɛ walisa rapɔɔriw ka kɛ tigitigi wa?
3 I tɔgɔla kunkanbaara: I ye baara min kɛ waajuli la, yala a ka gwɛlɛ i ma k’i hakili jigi o la kalosa la wa? N’o lo, i mana min kɛ waajuli la, mun na i t’a sɛbɛ tuma o tuma? Dɔw b’a sɛbɛ kalandiriye wala azanda (agenda) kɔnɔ. Dɔ wɛrɛw be rapɔɔri sɛbɛ lakolon ta u bolo. Kalosa, teliya k’i ka rapɔɔri di i ka kitabukalan kɔrɔsibaga ma. Walima n’i b’a fɛ, i be se k’a bila rapɔɔriw buwati kɔnɔ Masaya Boon kɔnɔ. N’i tun ɲinɛna k’a di, teliya ka ɲɛsin i ka kitabukalan kɔrɔsibaga ma, sanni i k’a to ale lo ka na i filɛ. I kɛtɔ k’i ka baara rapɔɔri kɛ ni sɔbɛ ye, i b’a yira k’i be Jehova ka labɛn bonya, ani k’i be balimacɛw jate: cii dira olu minw ma ka rapɔɔriw lajɛn ani k’u jatidenw kafo.—Luka 16:10.
4 Kitabukalan kɔrɔsibaga ka lɔyɔrɔ: I n’a fɔ sagagwɛnna min be kɔrɔsili ni jantoli kɛ, kitabukalan kɔrɔsibaga b’a janto jɛkulu ka baara la kalo bɛɛ kɔnɔ (Ntal. 27:23). A b’a lɔn ni bɛɛ b’a sen don waajuli la tuma o tuma, bɛrɛbɛrɛ, ani ɲagali ye. Ani, minw ma waajuli kɛ kalo bɛɛ kɔnɔ, a be teliya k’u dɛmɛ. Tuma dɔw la, a ka dɛmɛ be dan jagwɛlɛya kuma wala ladili nɔgɔman dɔrɔn ma. Wala, a b’a tigi weele k’a bila sira waajuli la.
5 Kalosa la, kitabukalan kɔrɔsibaga b’a janto ko a ka jɛkulu mɔgɔw bɛɛ y’u ka kunkanbaara dafa: n’u y’u ka rapɔɔri di walisa sekeretɛri ka se ka rapɔɔri tigitigi ci tɔnbolo ka biro la kalo nɔfɛta tile wɔɔrɔ loon. Kalosa mana surunya, a be se ka jɛkulu mɔgɔw hakili jigi rapɔɔriw koo la. Ani, a be se ka rapɔɔri sɛbɛw labila kalan kɛyɔrɔ la. Ni dɔw delila ka ɲinɛ u ka rapɔɔri kɔ, a be se k’u hakili jigi ani k’u jagwɛlɛya cogo tilennen na.
6 N’an be teliya k’an ka waajuli rapɔɔri di, o be kɛ sababu ye baara min kɛra kafo kɔnɔ a rapɔɔri tigitigi be lɔn. Yala i bena i seko kɛ k’o kɛ kalo o kalo wa?