Kitabukalan kɔrɔsibagaw b’u janto an na cogo min na
1 Kitabukalan sababu la, “u be se k’u janto kosɔbɛ kafoden kelen kelen bɛɛ ka hakilimaya yiriwali la. . . . O b’a yira ko Jehova b’a ka mɔgɔw kanu, ani a b’u minɛ nɛmɛnɛmɛ” (om p. 75; Esayi 40:11). Kitabukalan kɔrɔsibaga lɔyɔrɔ ka bon o jantoli yiracogo la.
2 Kitabukalan na: U y’a dabɔ a kama ka kitabukalan jɛkuluw dɔgɔya walisa kɔrɔsibaga ka se k’a ka jɛkulu mɔgɔw bɛɛ lɔn (Ntal. 27:23). Tuma caaman na, a be se ka jɛnɲɔgɔnya kɛ n’u ye sanni lajɛn ka daminɛ, wala a banni kɔ. Kalo kelen kɔnɔ, n’a sɔrɔ a bena se ka baro kɛ n’a ka jɛkulu mɔgɔ kelen kelen bɛɛ ye. O la, a be nɔgɔya jɛkulu mɔgɔw fɛ ka magwɛrɛ a la tuma min na u be gwɛlɛyaw kunbɛnna, wala n’u mako be jagwɛlɛya la.—Esayi 32:2.
3 Kitabukalan kɛtɔ, kɔrɔsi-baga b’a ɲini ka jɛkulu mɔgɔw bɛɛ jija u k’u daa don kalan na. O kɛcogo dɔ ye: a be kalan ɲɛminɛ ni ɲumanya ani dusu suman ye (1 Tes. 2:7, 8). A be cogoyaw ɲini ka bɛɛ daa don baro la, hali denmisɛnw fana. Ni dɔw be siran ka lakalitaw kɛ, a be se k’u dɛmɛ dan na: a be kɔn k’a ɲini u fɛ u ka labɛn ka vɛrise dɔ kalan, wala ka dakun dɔ lakali. A fana be se k’u dɛmɛ ka jaabiliw di u yɛrɛw ka fɔcogo la.
4 Ni kitabukalan kɔrɔsibaga dɛmɛbaga kɛra kɔrɔsigi ciden ye, kɔrɔsibaga be labɛn kɛ walisa o ciden ka kalan ɲɛminɛ siɲɛ kelen kalo fila o kalo fila. O be kɔrɔsibaga dɛmɛ k’o ciden kɛcogo kɔrɔsi, ani ka ladili nafamanw di a ma. Nin ye labɛn ɲuman ye dɛ! A be balimaw dɛmɛ ka ɲɛtaga sɔrɔ kalan kɛcogo la.—Tite 1:9.
5 Waajulibaara la: Kitabu-kalan kɔrɔsibaga ka kunkan-baara fɔlɔ dɔ ye ka waajuli baara ɲɛmɔgɔya ta (Nɔnb. 27:16, 17). A be labɛn nɔgɔmanw kɛ walisa jɛkulu mɔgɔw ka waajuli kɛ. Ani, a b’a jija k’u bɛɛ dɛmɛ ka ɲagali sɔrɔ waajulibaara la (Efes. 4:11, 12). O kama, a b’a laɲini ka waajuli kɛ ni jɛkulu mɔgɔ kelen kelen bɛɛ ye. Jɛkulu kɔnɔ, dɔw b’a fɛ ka waajuli faan dɔ fisaya. Jɛkulu kɔrɔsibaga be jɛn ni waajulibaara kɔrɔsibaga ye ka labɛn kɛ walisa weleweledala setigi dɔw k’u dɛmɛ.
6 I n’a fɔ sagagwɛnna, kanuya be min na: Jɛkulu kɔnɔ, balima dɔw tɛ se ka caaman kɛ waajuli la u ka cogoya kosɔn: minw ka barika dɛsɛra kosɔbɛ kɔrɔya kosɔn, minw tɛ se ka bɔ u ka boon na, bana jugu be minw na, wala minw mandimina. Kitabukalan kɔrɔsibaga b’o balimaw lalɔnniya k’u be se k’u ka waajuli jate minɛ miniti tan ni looru looru, n’a ma se lɛri kelen ma kalo kɔnɔ (waajuliko ɲɛnabɔbagaw jɛkulu lo b’a latigɛ jɔn lo ka kan n’o labɛn ye). Weleweledala sumalenw minw b’a ka jɛkulu kɔnɔ, a fana b’a mako don u la: a b’a yɛrɛ jija k’u dɛmɛ u ka kafo ka baaraw daminɛ kokura.—Luka 15:4-7.
7 Kitabukalan kɔrɔsibaga minw b’u mako don an na ni kanuya ye, an b’o waleɲuman lɔn dɛ! Komi u b’u janto an kelen kelen bɛɛ la, o be bɛɛ dɛmɛ ka “kɛ kelen ye dannaya la . . . , fo ka se Krista ka dafalenya jɔ kun dama ma.”—Efes. 4:12-14.