An ka mɔgɔ wɛrɛw kalan kaan saniyalen na
1 Hali n’u bɔra ‘siyaw, bɔnsɔnw, mɔgɔ sifaw ni kaanw bɛɛ la’, Jehova Seerew ye jɛkulu ye, min kanbɛnnen be. U ye balimaya jɛkulu lakika ye duniɲa kuru bɛɛ kɔnɔ ( Jira. 7:9). O ye kabako ye bi duniɲa farafaranen kɔnɔ. O be se ka kɛ cogo di? Ayiwa, “kaan saniyalen” dira an ma.—Sofoni 3:9, NW.
2 A nɔɔ kabakomanw: O kaan saniyalen ye mun lo ye? O ye Ala ka Kuma tiɲɛn faamuyali ɲuman ye, ka ɲɛsin Jehova n’a sagonata ma. O tiɲɛn ɲɛsinna Ala ka Masaya lo ma fɔlɔ. I ko Yesu tun y’a fɔ cogo min na, o tiɲɛnko be ɲɛnabɔra fɛɛrɛ yeta dɔ bolo fɛ dugukolo kan: “Jɔnkɛ dannamɔgɔ hakiliman”. O sababu fɛ, mɔgɔw be “bɔ kan fɔbaaw ni siyaw bɛɛ la” ka sɔn tiɲɛnko la.—Mat. 24:45; Zak. 8:23.
3 Mɔgɔw kɛtɔ ka kaan saniyalen kalan, o b’u lasun k’u ka ɲɛnamaya yɛlɛma ka kɛɲɛ ni Jehova ka siraw ye. U kalanna k’u “kɔnɔ kɛ kelen ye, o kɔrɔ, ŋaniya kelen . . . ani miirili kelen” (1 Kɔr. 1:10). Ala ka kalan sababu fɛ fana, u balocogo be tilen, ani u be kuma saniyalen ni tiɲɛn kuma fɔ, sanko n’u be kibaro duman fɔra mɔgɔ wɛrɛw ye (Tite 2:7, 8; Heb. 13:15). O yɛlɛmani kabakomanw be bonya la Jehova kan.
4 Ɲɛyirali fɛ, kibaro duman fɔra cɛɛ dɔ ye. Ɲiningali caaman tun b’a fɛ. U bɛɛ jaabili dira a ma Bibulu kɔnɔ. A ye min mɛn, o y’a lasun k’a daminɛ ka Bibulukalan kɛ siɲɛ fila lɔgɔkun kɔnɔ ani ka taga lajɛnw na. U y’a bisimila teriya la cogo min na Masaya Boon na, o y’a kabakoya. Sabu, kafoden caaman tun tɛ siya kelen ye. Wagati kunkurunin kɔnɔ, ale n’a muso y’u ka ɲɛnamaya kɛcogo yɛlɛma, ani u batisera. Kabini o wagati, a ye mɔgɔ 40 ɲɔgɔn dɛmɛ u ka baara kɛ Jehova ye: hali a ka somɔgɔ caaman. Kɛnɛyako bɛɛ n’a ta, a y’a daminɛ ka piyɔniye baara kɛ a ma mɛn.
5 An ka mɔgɔ wɛrɛw kalan: Duniɲa ka koow be mɔgɔ tilennen caaman lasunna k’u ka miiriyaw n’u ka ɲɛnamaya kɛcogo jate minɛ. I n’a fɔ Yesu, an ka kan k’a ɲini k’u dɛmɛ. Viziti kura barikamanw ani Bibulukalanw fɛ, an be se ka mɔgɔ kɔnɔgwɛw dɛmɛ ka kaan saniyalen dege.
6 Mɔgɔ dɔw bolo degunnen be. Walisa ka se ka kuma u fɛ, fɛɛrɛ barikaman dɔ ye ka Bibulukalan surun kɛ n’u ye u ka boon donda la (km 5/02 ɲɛɛ 1). Yala i y’o kɛ ka filɛ wa? N’i b’i labɛnna ka taga viziti kuraw kɛ, kuma yiracogo dɔ ɲɛnatɔmɔ An ka Masaya Cidenyabaara kɔnɔ ka kɛɲɛ n’a tigi makoya ye (saan 2002, zanwiyekalo ta lankana). Kuma yiracogo minw be yen o lankana kɔnɔ, u caaman labɛnna walisa ka sin ka baro kɛ kitabunin Ɲini wala gafe Dɔnniya kɔnɔ. O kuma yiracogo ladege fɔɔ i ka se ka baro daminɛ ani ka baro yɛlɛma nɛmɛnɛmɛ ka taga dakun kelen lajɛ gafe kɔnɔ. Vɛrise kelen wala fila ɲɛnatɔmɔ dakun kɔnɔ. U kalan, baro kɛ u kan, ani baro kuncɛ ɲiningali dɔ fɛ. O bena i dɛmɛ ka dakun nɔfɛta daminɛ siɲɛ wɛrɛ, viziti nata kɛtɔ.
7 Kaan saniyalen degeli be duga caaman lasera Jehova Seerew ma. An ka timinandiya ka mɔgɔ wɛrɛw dɛmɛ u ka jɛn n’an ye ka “Matigi tɔgɔ wele” ani ka “baara kɛ a ye ni dusu kelen ye.”—Sofoni 3:9.