Dɛmɛ: min dira wagati bɛnnen na
1 Ciden Piɛre wagati la, balima dannamɔgɔ dɔw mako tun b’a la mɔgɔ dɔ ka barika don u la. Piɛre y’o ye minkɛ, a y’a janto u la: a ye jagwɛlɛya kumaw ni hakilijigi kumaw fɔ u ye kanuya la (2 Piɛre 1:12, 13; 3:1). “Minu ye niyɔrɔ sɔrɔ dannaya sɛbɛ la”, a y’u jagwɛlɛya u ka to ka yiriwa hakilimaya ta fan fɛ walisa u kana kɛ “salabaatɔw ye wala nafantanw an Matigi Yesu Krista dɔnniya la” (2 Piɛre 1:1, 5-8). U tun ye weeleli ni ɲɛnatɔmɔli sɔrɔ ka bɔ Jehova yɔrɔ. Piɛre ka laɲinita tun ye k’u dɛmɛ u k’o sabati, janko a laban, u “jɛlen jalakibaliw ka sɔrɔ [Ala] ɲɛ kɔrɔ hɛrɛ la” (2 Piɛre 1:10, 11; 3:14). Balima caaman fɛ, Piɛre ka jagwɛlɛya kumaw sɔrɔla ka kɛ dɛmɛ ye, wagati bɛnnen na.
2 Bi fana, kerecɛnw fɛ, kɔrɔsibagaw b’u janto Ala ka jama na o cogo kelen na. Bi “waati gɛlɛnw” na, Jehova ka baarakɛla caaman ka kan ka koo caaman muɲu (2 Tim. 3:1). Komi wariko, denbaya ka gwɛlɛyaw, wala tɔgɔla kunkow be mɛɛnna mɔgɔw kun, dɔw be se ka miiri i ko Dawuda: “Ko jugu caaman ye ne lamini, ne ka tilenbaliya kow ye ne kuru fo ka ne ɲɛ lafin. U ka ca ni ne kunsigi ye. Ne dusu tɛ lafiya si sɔrɔ” (Zab. 40:13). Gwɛlɛyaw be se k’o ɲɔgɔnna mɔgɔw degun fɔɔ u be se ka hakilimaya koo sɔbɛw dabila. U fana be se k’u sen bɔ kerecɛnya waajuli baara la. Nka, u ka gwɛlɛyaw bɛɛ n’a ta, u ‘ma ɲinɛ Jehova ka cifɔlenw kɔ’ (Zab. 119:176). Sisan lo ye wagati bɛnnen ye diinan mɔgɔkɔrɔw fɛ u ka dɛmɛ di o ɲɔgɔnna mɔgɔw ma ka kɛɲɛ n’u makoya ye.—Esayi 32:1, 2.
3 Walisa k’o makoya wasa, u ye diinan mɔgɔkɔrɔw jagwɛlɛya u ka jijaliba kɛ walisa ka balimaw dɛmɛ: minw ye weleweledala sumalenw ye. Jijaliba be kɛra sisan walisa k’o dafa, ani o jijali bena taga ɲɛ fɔɔ ka se marisi kalosa la. U b’a ɲinina kitabukalan kɔrɔsibagaw fɛ u ka taga bɔ sumalenw ye. Ani, u k’u dɛmɛ Alako ta fan fɛ walisa u ka jɛn ni kafo ye ka waajuli baara kɛ kokura. Labɛn be se ka kɛ walisa ka bibulukalan kɛ n’u dɔw ye ka kɛɲɛ n’u makow ye. U be se k’a ɲini balima dɔw fɛ u k’u dɛmɛ. N’o cii kalifara i ma, i ka jijali kɛli be se k’u nafa kosɔbɛ n’i kɔni b’u jagwɛlɛya ni teriya ye.
4 Kuun b’a la bɛɛ ka ɲagali ni sumalen dɔ jɛnna ni kafo ye ka waajuli baara kɛ kokura (Luka 15:6). An be jijali minw kɛra ka sumalenw jagwɛlɛya, tiɲɛn na, u bena sɔrɔ ka kɛ “kuma bɛnnen min fɔra a waati la.”—Ntal. 25:11.