An ka ɲɔgɔn lajɛn ka Jehova tando
1 Jehova ye sebagayabɛɛtigi ye. A hakilitigiya tɛ se ka sɛgɛsɛgɛ ka lɔn. A ka tilennenya dafalen be, ani a ye kanuya bisigi yɛrɛ ye. Komi a ye Danbaga, niin dibaga, ani duniɲa kuru bɛɛ Masaba ye, ale kelen ka kan n’an ka batoli ye (Zab. 36:10; Jira. 4:11; 15:3, 4). Tile saba lajɛnba nata kuun ko “An ka nɔɔrɔ la Jehova kan.” O lajɛnba bena barika don an na walisa an k’an cɛsiri k’a tando i ko tiɲɛn Ala kelenpe.—Zab. 86:8-10.
2 Labɛn ɲuman ka kan ka kɛ: Jehova ye fanaba min mara an ye, n’an b’a fɛ ka nafa bɛrɛbɛrɛ sɔrɔ o la, fɔɔ an ka labɛn ɲuman kɛ (Efes. 5:15, 16). Yala i ye labɛn kɛ ka ban walisa ka jatigiya sɔrɔ, ka taransipɔriko ɲɛnabɔ, ani ka wagati sɔrɔ baarakɛyɔrɔ la wala lakɔliso wa? O koow kɔrɔtalen be. Kana u bila ka suma. N’i ma kɔn ka wagati deli, n’a sɔrɔ i bena fɔn o nisɔndiya koo yɔrɔ dɔ la. An bɛɛ ka kan ka kɛ lajɛnba ka kalanw kelen kelen bɛɛ la.
3 A laɲini ka na joona lajɛnba kɛyɔrɔ la loon o loon. O bena i dɛmɛ ka sigiyɔrɔ ta sanni datigɛli dɔnkili ka la. Ani o bena i dɛmɛ k’i hakili sigi koɲuman walisa ka kalan lamɛn. Hakɛ to, i kana sigiyɔrɔ mara ka bila mɔgɔ wɛrɛw ye fɔɔ n’i somɔgɔw wala i tagamaɲɔgɔnw tɛ.
4 A ɲininen be bɛɛ fɛ an ka na ni domunifɛn dɔ ye an bolo tilera kama, sanni an ka bɔ lajɛnba la ka taga domuni yaala kɛnɛma. N’an be bɔ ka taga domuni san bitikiw la wala sirada la, o be se k’an bila bana farati la tuma dɔw la. A kɔni be se ka kɛ wagati ni wari tiɲɛni ye. N’i be sɔn ka ladili nin sira tagama, o bena na ni hɛɛrɛ ye bɛɛ fɛ. I fana bena wagati caaman sɔrɔ ka baro kɛ n’i balimaw ye (Zab. 133:1-3). Hakɛ to, i hakili to a la ko butelifɛnw ni dɔlɔ ma daga lajɛnba yɔrɔ la.
5 An ka lamɛnni kɛ ka lɔnniya sɔrɔ: Esdrasi tun y’a dusukun labɛn delili kɔnɔ walisa ka Ala ka Kuma sɔrɔ (Esd. 7:10). A y’a dusukun dayɛlɛ ka Jehova ka kalanw sɔrɔ (Ntal. 2:2). An be se k’a daminɛ k’an dusukun labɛn lajɛnba kama sanni an yɛrɛ ka bɔ an ka soo: an ka miiri lajɛnba barokun kan, ani an ka baro kɛ a kan n’an ka denbaya ye.
6 Jamaba yɔrɔ la, koow ni mankan caaman be se ka kɛ yen. U be se k’an bali k’an ɲɛmalɔ. U be se k’an hakili bɔ joona kalankɛla la. O mana an sɔrɔ, an be fɔn kunnafoni nafamanw la. Ladiliw filɛ koorilen kɔnɔ. U be se k’an dɛmɛ k’an ka jantoli kɛcogo fisaya.
7 An k’an janto mɔgɔ wɛrɛw la: Kalan tuma na, n’i b’a fɛ ka fotow ta, wala ka videwo filimuw kɛ, to i sigiyɔrɔ dɔrɔn na k’o kɛ walisa i kana mɔgɔw bali k’u ɲɛmalɔ. Telefɔni selilɛriw ni bipɛrw ka kan ka faga janko u kana mɔgɔw degun. Mɔgɔ si man kan k’a tɔgɔla kuranfɛn dɔ don lajɛnba boon ka kuran juru dɔ la, wala sono ka juru dɔ la.
8 Siga t’a la, an kɔrɔtɔlen be ka ɲɔgɔn lajɛn walisa ka Jehova tando! An k’an cɛsiri ka nɔɔrɔ la a kan, an kɛtɔ ka kɛ kalan kelen kelen bɛɛ la, ka lamɛnni kɛ ni jantoli ye, ani ka kalan sira tagama.—Dut. 31:12.
[Study Questions]
1. Lajɛnba kuun ye juman ye, ani mun na Jehova ka kan n’an ka tandoli ye?
2, 3. Labɛn ɲuman bena an dɛmɛ ka nafa bɛrɛbɛrɛ sɔrɔ cogo di lajɛnba la?
4. Mun na u b’a ɲini an bɛɛ fɛ an ka na ni domunifɛn dɔ ye lajɛnba la?
5. An be se k’a daminɛ k’an dusukun labɛn lajɛnba kama cogo juman na?
6. Mun lo be se k’an dɛmɛ k’an hakili sigi ka kalan lamɛn? (A filɛ koorilen kɔnɔ.)
7, 8. Cogo juman na an be se k’an janto mɔgɔ wɛrɛw la?
[Box on page 3]
An ka lamɛnni kɛ lajɛnbaw la
▪ An ka kalan barokunw lajɛ ani an ka miiri u kan
▪ Vɛrisew lajɛ Bibulu kɔnɔ
▪ Sɛbɛri kɛ ka surunya
▪ i bena baara kɛ ni hakilinata minw ye, u sɛbɛ dan na
▪ I ye min kalan, segi a kan