An k’a yira ko an be Ala ka soo bonya
1 Bibulu sɛbɛwagati la, Jehova tun ye ci di a ka mɔgɔw ma k’u ka lajɛn kɛ ale ka boon kɔnɔ tuma o tuma (Lev. 23:2). O lajɛnw tun b’u dɛmɛ u kana ɲinɛ Ala ka Kuma kɔ. Lajɛnw tun be cogoya di u ma u ka miiri, u ka jɛnɲɔgɔnya kɛ, ani u ka Jehova ka Sariya sɛgɛsɛgɛ. O cogo la, u hakili tun be fa Ala ka miiriyaw la, ani u tun be kodumanw sɔrɔ Alako ta fan fɛ. Tiɲɛn na, o lajɛnw tun ye ɲagali sababu ye. U sababu fɛ, kelenya ni batoli saniman tun be yiriwa. Ka lajɛn kɛ Ala ka boon kɔnɔ bi, o fana tɛ koo fitinin ye.
2 Cogo juman na an be se k’a yira ko an be lajɛnw nafa faamu? Kafo dɔw kɔnɔ, mɔgɔ bɛrɛ tɛ na lajɛnw na. Tuma kelen kelen na, koow cogoya be se k’an bali ka taga lajɛnw na. Nka yala an b’a to koo misɛnw b’an bali an tɛ taga lajɛnw na tuma o tuma wa? Dɔw b’a latigɛ ka to u ka soo, sabu kundimi fitinin dɔ b’u la, wala u sɛgɛnnen be u ka tilera baara kosɔn. Dɔw tɛ na lajɛnw na sabu u somɔgɔw dannabaliw b’a fɛ ka na bɔ u ye, ani u b’a jate k’u waajibiyalen be k’u ladon. Dɔ wɛrɛw yɛrɛ be fɔn lajɛnw na sabu u diyanye koo dɔ be kɛra telewisɔn na wala farikoloɲanagɛ yɔrɔ la. Nin kɛcogow ni Korɛ dencɛw ta ka jan ɲɔgɔnw na dɛ! Olu y’a fɔ ni kɔnɔgwɛ ye ko: “Ne ni barika bannen don Matigi ka so ɲɛnafin kosɔn.”—Zab. 84:3.
3 Hali ni hakilimaya domuni caaman labɛnna an kosɔn lajɛnw na, a ka gwɛlɛ kafoden dɔw fɛ u ka jantoli kɛ. U dɔw hakili be yaalayaala, u be miiri tilera haminankow kan. Dɔw yɛrɛ be sunɔgɔ. Balima caaman y’a ye ko sɛbɛri kɛli b’u dɛmɛ ka to ɲɛɛ na ani k’u hakili sigi kalan kan. O fana b’a to kalan be don kosɔbɛ u kuun na. Ka fara o kan, n’an be kɔn ka lajɛn ka kalanw labɛn koɲuman, an bena nafa bɛrɛbɛrɛ sɔrɔ u la. O la, min be fɔra lajɛn na, an bena se k’an ‘janto kosɛbɛ’ o la.—Heb. 2:1.
4 Kalan min be di lajɛnw na, denmisɛnw fana mako b’a la k’a faamu. Nka ni bangebagaw be tolonkɛfɛnw wala sɛbɛ ɲɛgɛɲɛgɛtaw di denmisɛnw ma walisa u ka baara kɛta sɔrɔ ani u ka to yɔrɔ kelen na, u tɛna faamuyali bɛrɛ sɔrɔ lajɛn ka kalan na. Ka denmisɛnw to yen u be tolon kɛ, u be kuma, u be kule, wala u be kafodenw kɔnɔgwan cogoya wɛrɛ la, o ye deen kolobaliya ye. Denmisɛnw bena ɲɛgɛn tagako ni jii minko nɔgɔya n’u y’a lɔn k’u faa wala u baa bena to k’u bila sira tuma bɛɛ.
5 A kɔrɔtalen be an ka kɛ lɛri la: Tuma kelen kelen na, bolomakotɛ koo dɔw be se k’an bali an ka se lɛri la lajɛnw na. Nka, ka deli ka to ka na dɔnkili dali kɔ ani delili kɛli kɔ, o b’a yira ko an mako tɛ lajɛnw ka senumanya koo la. O fana b’a yira ko an t’an janto mɔgɔ wɛrɛw la, minw sigilen be yen ka ban. An k’an hakili to a la ko ka jɛn n’an balimaw ye ka dɔnkili da ani ka delili kɛ, o ye an ka batoli faan dɔ ye. Minw delila a la ka na kɔfɛ, u b’a yira k’u ka koow ladonnen tɛ koɲuman. Minw kɔni be na lɛri la, u b’a yira ko lajɛnw ye sɔbɛko ye olu fɛ, ani u be lajɛnw nafa faamu.
6 Komi Jehova ka loon be surunyana, an mako b’a la ka to ka na lajɛnw na (Heb. 10:24, 25). An k’an ka waleɲumanlɔn yira, an kɛtɔ ka to ka na tuma o tuma, an k’an yɛrɛw labɛn, an ka na lɛri la, an k’an hakili sigi ka lamɛnni kɛ. Ani, an be kalan min sɔrɔ, an k’o sira tagama.