“An bɛɛ k’a tɔgɔ fɔ ɲɔgɔn fɛ”

¹ Zaburu sɛbɛbaga ye dɔnkili la ko: “Ɔwɔ, an ka jɛ ka Matigi tanu. An bɛɛ k’a tɔgɔ fɔ ɲɔgɔn fɛ.” (Zab. 34:4). Tile saba lajɛnba nata bena cogoya di an ma an ka Jehova tɔgɔ tando ɲɔgɔn fɛ n’an balimaw ye, minw bɔra kafo caaman na. A kuun ko: “An ka tagama Ala fɛ.” Yala i ye labɛn kɛ siyɔrɔ ni taransipɔri kama, ani walisa i ka wagati sɔrɔ i ka baarakɛyɔrɔ la wa? An ka hakili sɔrɔ ka kɔn k’o koow ɲɛnabɔ joona.—Ntal. 21:5.

² An nali lajɛnba kɛyɔrɔ la: An ka kan k’an janto koo caaman na n’an be taga lajɛnba la. N’an be soli ka sira ta, hali barinanko dɔ tɛna an bali ka sigiyɔrɔ ta wagati la. Ani, an dusu bɛɛ bena kɛ datigɛli dɔnkili ni delili la (Zab. 69:31). Miniti damaninw kɔnɔ, sanni kalan ka daminɛ, barokuntigi bena sigiyɔrɔ ta tintin kan. O y’a sɔrɔ Masaya dɔnkili be lara fɔlɔ. O tuma la, an bɛɛ ka kan k’an sigi walisa kalan ka daminɛ cogo bɛnnen na.—1 Kɔr. 14:33, 40.

³ Ala ka Kuma b’an lasɔmi ko ‘fɛn bɛɛ ka kɛ ni kanuya ye.’ (1 Kɔr. 16:14). Lajɛnba kɛyɔrɔ mana dayɛlɛ 8 h 00 tuma, n’an b’an janto mɔgɔ wɛrɛw la, o bena an bali an ka boli, ka girin ka don, ka mɔgɔw ɲɔndi walisa ka taga sigiyɔrɔw ta an diyanye yɔrɔ la sanni tɔɔw k’u ta. An man ɲi ka sigiyɔrɔw mara mɔgɔ wɛrɛw ye fɔɔ n’an be na lajɛnba la n’o tigiw ye bolifɛn kelen kɔnɔ, wala n’an be boon kelen kɔnɔ n’u ye.—1 Kɔr. 13:5; Filip. 2:4.

⁴ An ka na ni domunifɛn dɔ ye an bolo tilera kama, sanni an ka bɔ lajɛnba yɔrɔ la ka taga domuni san. O la, an bena se ka baro ɲuman kɛ ni balimaw ye. Ani, an bena kɛ yen tuma min na wulada kalan be daminɛna. O fana be se k’an tanga domuni dɔ ma, min saniyalen tɛ, ani n’a sɔrɔ a ma tobi ka ɲɛ. N’an mako b’a la, an be se ka na ni domuni marafɛn fitinin dɔ ye k’a bila sigilan jukɔrɔ. Minanba minw kɛra mɔgɔ caaman ka domuni marafɛn ye, butelifɛnw ani dɔlɔ ma daga lajɛnba yɔrɔ la.

⁵ Labɛnw be kɛra dan na tulogwelenw ka nafa kama, ani sigiyɔrɔ dɔw bena mara dan na olu kama.

⁶ Hakilimaya domuniba marala an ɲɛ: Masacɛ Josafat y’a “dusukun cogoya labɛn ka tiɲɛn Ala ɲini.” (2 Tilew Kib. 19:3, NW ). Cogo juman na an be se k’an dusukun cogoya labɛn ka kɔn lajɛnba ɲɛ? Barokun minw be sɔrɔ Réveillez-vous ! ɲɛɛ labanw na, u be kɔn k’a yira fɛn min bena sɔrɔ o hakilimaya domuniba nin na (Mɛkalo tile 22nan, ani zuwɛnkalo tile 8nan taw). Mun na an tɛ wagati ta ka miiri o barokunw kan walisa Jehova ye min mara an ɲɛ, o nege ka don an na? K’an dusukun cogoya labɛn, o fana kɔrɔ ko an bena kalan min sɔrɔ, an ka Jehova deli a k’an dɛmɛ k’o kɔrɔ faamu ani k’a sira tagama.—Zab. 25:4, 5.

⁷ A nege b’an bɛɛ la ka dɔ fara an ka lɔnniya kan Ala ka Kuma koo la, sabu an b’a lɔn ko an bena yiriwa ka kisili sɔrɔ o barika lo la (1 Piɛre 2:2). O kama, an ka kɛ tile saba lajɛnba, “An ka tagama Ala fɛ”, la. Ani, an ka Jehova tɔgɔ tando ɲɔgɔn fɛ.—Zab. 34:4.

[Study Questions]

1. Sababu juman bena di an ma ka Ala tɔgɔ tando, ani cogo juman na an be se k’an yɛrɛ labɛn kabini sisan yɛrɛ?

2. Mun na nafa b’a la n’an b’an labɛn ka soli ka na lajɛnba la?

3. Cogo juman na an be se k’an janto mɔgɔ wɛrɛw la n’an be sigiyɔrɔw ɲinina?

4. Labɛn jumanw ka kan ka kɛ tilera kama, ani nafa juman b’u la?

5. Labɛn jumanw kɛra tulogwelenw kama?

6. An bena kalan min sɔrɔ, cogo juman na an be se k’an dusukun cogoya labɛn o kama?

7. Mun lo nege b’an na, ani mun na?

[Box on page 3]

Ala tɔgɔ tandocogow

◼ An ka kɔn k’an labɛn

◼ An ka kanuya yira mɔgɔ wɛrɛw la

◼ An k’an dusukun cogoya labɛn