Viziti kuraw lo be taga kɛ bibulukalanw ye

¹ Yesu ma cii di a kalandenw ma u ka waajuli dɔrɔn kɛ. A ko ‘u ka mɔgɔw kɛ ale ka kalandenw ye, ka u kalan’ fana (Mat. 28:19, 20). Waajulikɛla be cira weleweleda, nka karamɔgɔ tɛ dan o dɔrɔn ma. Ale be mɔgɔ kalan, ka ɲɛfɔli kɛ, ani ka daliluw yira. An be se k’o kɛ viziti kuraw sen fɛ. Viziti kuraw kɔnɔ, an b’a laɲini ka bibulukalanw daminɛ ni makodon mɔgɔw ye.

² An ka kan ka segi ka taga bɔ jɔn lo fɛ? Mɔgɔ minw bɛɛ sɔnna ka sɛbɛ dɔ ta, wala k’u mako don hali dɔɔni kibaro duman na. Waajuli kɛtɔ jama yɔrɔ dɔ la, ni mɔgɔ dɔ y’a mako don, an k’a ɲini k’a tigi ka ladɛrɛsi ni telefɔni nimɔrɔ sɔrɔ ka ta. O la, o makodon bena se ka ladon. An k’an jigi la a kan ka bibulukalanw daminɛ. Minw bena sɔn ka kalan kɛ, an ka to k’olu ɲini. N’a sɔrɔ an bena u dɔw sɔrɔ.—Mat. 10:11.

³ An k’an mako don mɔgɔw la: Viziti kura bɛrɛbɛrɛ ka labɛn be daminɛ siɲɛ fɔlɔ lo la. Waajulikɛla setigiw b’a kɔrɔsi k’a filɛ fɛɛn min ka di u lamɛnnikɛla ye, ani u b’o sɛbɛ. U be basigi o kan ka segi ka na baro kɛ. Dɔw y’a kɔrɔsi ko nafa b’a la ka ɲiningali dɔ lawili baro laban na walisa k’a tigi lasun a k’a mako don viziti nata la. N’an b’an mako don mɔgɔw la n’an sɔbɛ ye, an bena to ka miiri u koo la hali n’an ye ɲɔgɔn bila. Ani, o b’an lasun ka segi ka taga bɔ u ye joona. N’i be se, a ɲini ka segi ka taga bɔ a tigi ye n’a makodon ma suma fɔlɔ: n’a sɔrɔ tile kelen yɛrɛ, wala tile fila o kɔ.

⁴ Viziti kura kɛtɔ, an ka basigi baro tɛmɛnen kan, ani an k’a ɲini ka dɔ fara a tigi ka lɔnniya kan. An k’a laɲini ka Bibulu ka miiriya kelen kɔni yira a la, min bena a jagwɛlɛya. Ani, n’a be kuma, an ka sɔn k’a lamɛn. An k’a ɲini k’a tigi lɔn bɛrɛbɛrɛ. O kɔ, vizitiw kɛtɔ, Bibulu ka tiɲɛn kalan minw ɲɛsinna a ka makoya ma tigitigi, an k’olu lase a ma.

⁵ An k’an janto bibulukalanw koo la: An ka viziti kuraw kɛ ni laɲinita ye: ka bibulukalanw daminɛ. O be se ka kɛ cogo di? An k’a fɔ a tigi ye k’an b’a fɛ ka miiriya diiman dɔ tilan n’a ye. An ka kitabunin Ɲini wala gafe Dɔnniya dayɛlɛ ka dakun dɔ yira: dakun min be se ka diya a tigi ye an ka miiri la. An k’o dakun kalan. An ka ɲiningali lajɛ, ani an ka dakun ka vɛrise kelen wala fila lajɛ. An be se ka sin k’o kɛ boon donda la, miniti looru wala tan kɔnɔ. An ka baro kuncɛ an kɛtɔ ka ɲiningali nɔfɛta lawili. Ani, an ka labɛn kɛ walisa ka segi ka na baro lataga ɲɛ siɲɛ wɛrɛ.

⁶ Mɔgɔ o mɔgɔ mana a mako don, an ka segi ka na a dɛmɛ. O ye an ka waajuli baara faan kɔrɔtalenba dɔ ye. O kama, an ka wagati dɔ latigɛ viziti kuraw kama lɔgɔkun kɔnɔ. N’an b’o kɛ, an ka waajuli baara bena barika sɔrɔ, ani an bena ɲagali sɔbɛ sɔrɔ.

[Study Questions]

1. Mun na viziti kuraw baara kɔrɔtalen be kosɔbɛ?

2. An ka kan ka segi ka taga bɔ jɔn lo fɛ?

3, 4. Viziti kura bɛrɛbɛrɛw be ɲɛ mun lo sababu fɛ?

5. An be se ka tɛmɛ fɛɛrɛ nɔgɔman juman fɛ ka bibulukalan daminɛ?

6. An b’a yira cogo juman na ko an b’a faamu ko a kɔrɔtalen be ka viziti kuraw kɛ?