Minw ka koow labɛnnen be, an k’olu dɛmɛ

¹ Mɔgɔ kelen kelen bɛɛ dusukun labɛnnen be cogoya dɔ la, ani o cogo sabatilen be (Mat. 12:35). Bibulu be mɔgɔ dɔ kofɔ, min dusukun labɛnnen be kɛlɛ kama (Zab. 55: 22). Dɔw dusu ka teli ka wili (Ntal. 29:22). Nka dɔ wɛrɛw “labɛnnin bɛ ka sɔn nyanamanya banbari ma.” (Kɛw. 13:48, Kibaro Diman, 1994). An tile la, minw ka koo labɛnnen be ka ɲɛ, Jehova be o ɲɔgɔnna mɔgɔw lajɛnna (Agize 2:7). Cogo juman na an be se k’u dɛmɛ u ka kɛ Jehova batobagaw ye?

² I sɔbɛ don ka segi ka taga bɔ a fɛ: A kɔrɔtalen be an ka viziti kuraw koo filɛ ni ɲɛɛ ɲuman ye walisa k’an ka cii dafa: Ka mɔgɔw kɛ kalandenw ye (Mat. 28:19, 20). An be makodon mɔgɔ minw kunbɛn, yala an be teliya ka segi ka taga u dɛmɛ wa? Mɔgɔ minw bɛɛ ye gafew ta, wala minw y’u mako don kibaro duman koo la, yala an be segi ka taga bɔ u fɛ wa? Yala an be timinandiya k’an jija k’u dɛmɛ u ka yiriwa hakilimaya ta fan fɛ wa? Komi niin dɔw be farati la, an ka kan k’a ɲini ka mɔgɔw ka makodon ladon.

³ I mana baro kɛ ni makodon mɔgɔ dɔ ye, i ka wagati ta kelen k’a tɔgɔ n’a ka ladɛrɛsi sɛbɛ sanni i ka ɲinɛ u kɔ. A’ ye baro kɛ koo minw kan, i ye vɛrise minw kalan, ani i ye gafe minw di a ma, i k’u bɛɛ sɛbɛ. O kɔ, i k’i cɛsiri ka teliya ka taga bɔ a ye kokura n’i be se.

⁴ Viziti kura kɛcogo: N’i be viziti kura kɛra, nafa b’a la i k’i dusu diya, i ka teriya kɛ n’a tigi ye, ani i k’i mako don a ka koow la ni kɔnɔgwɛ ye. A to baro ka kɛ Bibulu koo nɔgɔmanw kan. I labɛn ka baro kɛ n’a ye Bibulu ka barokun diiman dɔ kan. Viziti laban na, i ka ɲiningali dɔ lawili, i bena segi ka na min jaabi siɲɛ wɛrɛ. N’a tigi y’a ka fɛta dɔw fɔ ani u ma bɛn ni Bibulu ta ye, a ka fisa i kana sɔsɔli gwansan kɛ o kan. Aw fila bɛnnen be koo minw kan, i ka basigi o kan, ani i k’i jija k’a tigi kalan Bibulu la.—Kolos. 4:6.

⁵ Walisa ka viziti kuraw kɛ fɔɔ an ka jijaliw kɛ. Nka a tɔnɔ be mɔgɔ wasa. Zapɔn jamana na, piyɔniye dɔ y’a latigɛ ka dɔ fara a ka viziti kuraw kan kalo o kalo. A tun be mɔgɔ minw kunbɛn soo ni soo, a y’a daminɛ k’u bɛɛ tɔgɔ ta. Ani, tile wolonfila cɛ, a segira ka bɔ u fɛ tugun. A tun bena taga min fɔ u ye, a y’o labɛn koɲuman. O cogo la, a tun lanen be a yɛrɛ la waajuli kɛtɔ. Viziti kura dɔ kɛtɔ a sera ka bibulukalan daminɛ ni mɔgɔ dɔ ye. O tigi y’a fɔ ko: “Ne tun delila ka ile ɲɔgɔnna dɔw gwɛn tuma o tuma. Ne siɲɛ fɔlɔ lo be lamɛnni kɛra ten.” O piyɔniye timinandiyara ni kanuya ye minkɛ, tɔnɔ sɔrɔla a la. Kalo fɔlɔ laban na a tun ye bibulukalan tan sɔrɔ ka kɛ.

⁶ Mɔgɔw ka koow cogoya be yɛlɛma tuma bɛɛ (1 Kɔr. 7:31). Tuma caaman na walisa an ka se ka makodon mɔgɔ dɔ sɔrɔ kokura a ka soo, fɔɔ an ka taga a yɔrɔ filɛ siɲɛ caaman na. An kɛtɔ ka viziti kuraw kɛ ni sɔbɛ ye, an be se ka makodon mɔgɔw dɛmɛ u ka ɲɛnamaya banbali sira ta.—Mat. 7:13, 14.

[Study Questions]

1. An tile la, Jehova be jɔn lajɛnna a yɛrɛ ye?

2. Cii min dira an ma ka mɔgɔw kɛ kalandenw ye, o kɔrɔ ye mun ye?

3. An mana baro kɛ ka ban ni mɔgɔ dɔ ye waajuli la, an ka kan ka mun kɛ?

4. Cogo juman na an be se ka viziti kura bɛrɛbɛrɛ kɛ?

5. Piyɔniye dɔ ye jijali juman kɛ, ani mun sɔrɔla o la?

6. Mun na an ka kan ka timinandiya viziti kuraw kɛli la?