Labɛn: o ye viziti kura barikamanw gundo dɔ ye
1 Yesu ye a ka kalandenw labɛn koɲuman walisa u ka kɛ “masaya Kibaru Duman” waajulikɛla setigiw ye (Mat. 4:23; 9:35). O fɔrɔmasɔn nin kɛra Palastine mara dɔrɔn na. Nka, sanni a ka yɛlɛ ka taga sankolo la, Yesu y’a fɔ ko kerecɛn cidenya baara tun bena jɛnsɛn kosɔbɛ walisa ka mɔgɔw kɛ a ka kalandenw ye siyaw bɛɛ la. —Mat. 28:19, 20.
2 O baara faan dɔ tun bena kɛ nin ye: ka segi ka taga bɔ mɔgɔw ye minw ye u mako don Ala ka Masaya kibaro duman na ani k’u kalan u ka Krista ka cikanw bɛɛ mara. Walisa an ka o viziti kura barikamanw ɲɔgɔn kɛ, an ka kan k’an yɛrɛ labɛn koɲuman.
3 I ka kɔn k’i yɛrɛ labɛn: U tɛmɛko fɔlɔ la, weleweledala dɔw be ɲiningali dɔ lawuli baro laban na. O kɔ, u b’a fɔ a tigi ye ko u bena segi ka na o ɲiningali jaabi. U y’a kɔrɔsi ko n’u tɛmɛna gafe Qu’enseigne la Bible kɔnɔna koow fɛ viziti kura kɛtɔ, o b’u dɛmɛ ka bibulukalan daminɛ kun kelen.
4 Hali n’an be ni La Tour de Garde kelen ni Réveillez-vous ! kelen dɔrɔn ye ka di mɔgɔw ma kalo o kalo, o kɔrɔ tɛ ko an ka kan ka zurunali kuraw kɔnɔ ka sɔrɔ ka taga bɔ u ye. N’an ye zurunali to mɔgɔ dɔ fɛ, an be se ka Alakow nege don a tigi la an kɛtɔ ka baro kɛ n’a ye o zurunali kɔnɔnako kan.
5 I ka kɛ ni laɲinita dɔ ye: I ye kunnafoni minw sɛbɛ a tigi koo la, sanni i ka segi ka taga viziti kɛ, wagati dɔɔni ta k’u lajɛ ani k’a filɛ i b’a fɛ ka min kɛ. Misali fɛ, i ye gafe min to kɔsa la, i ka baro kɛ o kɔnɔna koo dɔ kan. I ye baro min kɛ n’a tigi ye kɔsa la, i ka gafe wɛrɛ di min ɲɛsinna o ma. N’i tun ye ɲiningali dɔ lawuli i tɛmɛko fɔlɔ la, siga t’a la, i bena a ɲini k’o jaabi. I kɛtɔ ka vɛrise dɔ kofɔ min be i ka kumaw tiɲɛntigiya yira, i k’i jija ka sin k’o vɛrise kalan Bibulu yɛrɛ kɔnɔ.
6 An ka laɲinita: Ayiwa, an ka laɲinita ye ka bibulukalan dɔ daminɛ. Viziti kura kɛtɔ, balimacɛ dɔ ye bibulukalan kofɔ cɛɛ dɔ ye, nka a banna. Balimacɛ segira ka taga ni zurunaliw ye ani a y’a fɔ cɛɛ ye ko: “Bi, an be Bibulu ka ɲiningali dɔ jaabira min be mɔgɔw kɔnɔ.” Balimacɛ ye cɛɛ ka fɛtaw lɔn minkɛ, a ye vɛrise dɔ kalan ani ka dakun bɛnnen dɔ kalan gafe dɔ kɔnɔ an be bibulukalan kɛ ni min ye. O kɛra bibulukalan ye a tora ka min kɛ tuma o tuma.
7 Kuun b’a la an ka wagati ta k’an yɛrɛ labɛn viziti kuraw kama. Dɔ bena fara an ka ninsɔndiya kan, ani minw ‘labɛnnen be ka sɔn ɲɛnamaya banbali ma’ an bena se ka nɛɛma sɔrɔ k’olu dɛmɛ u ka ɲɛnamaya banbali sira ta.—Kɛw. 13:48, Kibaro Diman, 1994.
[Study Questions]
1. Kerecɛn fɔlɔw ka cidenya baara tun bena jɛnsɛn cogo di?
2. An be se ka Yesu ka cikan labato cogo di ka mɔgɔw kɛ a ka kalandenw ye?
3. An bena se ka viziti kura juu sigi cogo di an tɛmɛko fɔlɔ yɛrɛ la?
4. Mun na an man kan ka zurunali kuraw kɔnɔ ka sɔrɔ ka taga viziti kura kɛ?
5. Nafa juman b’a la ka laɲinita dɔ to an hakili la?
6. Viziti kuraw kɛtɔ, an ka laɲinita ye mun ye?
7. Labɛnko ɲuman y’i dɛmɛ cogo di ka bibulukalan dɔ daminɛ?