Ala ka Kuma ye tiɲɛn ye
1 Zaburu sɛbɛbaga y’a sɛbɛ ko “I ka kuma bɛɛ ye tiɲɛ ye.” (Zab. 119:160). Jehova be tɛmɛ a ka Kuma senuman fɛ ka ɲɛnamaya ka ɲiningali kɔrɔtalenbaw jaabili di. O jaabiliw be mɔgɔ wasa. Gwɛlɛyaw be minw kan, a be dusu saalo ni jigiya di u ma. Ani, a b’a yira an na cogo min na an be se ka magwɛrɛ ale la. Muso waleɲuman lɔnbaga dɔ y’a fɔ ko: “Bibulu ka tiɲɛn kalan lɔnni be komi mɔgɔ bɔra yɔrɔ finman dibiman dɔ la ka don bonden ɲuman dɔ ka kɛnɛ ni yeelen kɔnɔ.” Yala i b’i jija ka tɛmɛ cogoyaw bɛɛ fɛ ka Ala ka tiɲɛn Kuma fɔ mɔgɔw ye wa?
2 Duniɲa bɛɛ kɔnɔ, a be mɔgɔw yɛlɛma, ani a b’u sama: See be Bibulu ka tiɲɛn kalan ye ka mɔgɔw dusukun sɔrɔ, ani ka ɲɛnamayaw yɛlɛma (Heb. 4:12). Muso dɔ, min tɔgɔ ko Roza, tun y’a yɛrɛ bila jatɔya, dɔlɔtɔya ni dɔrɔgi la tali. A ko: “Loon dɔ, ne jigi bɛɛ tun tigɛra. Seere dɔ n’a muso y’a ɲɛfɔ ne ye cogo min na Bibulu be se k’an dɛmɛ k’an ka kunkow ɲɛnabɔ. Ne y’a daminɛ ka Ala ka Kuma kalan kɛ, ani a diyara n’ ye kosɔbɛ. Kalo kelen kɔnɔ, ne ye fanga sɔrɔ ka ɲɛnamaya saniyalen kɛcogo kura daminɛ. Komi kuun tun be ne ka ɲɛnamaya la sisan, n’ mako tun tɛ dɔlɔ wala dɔrɔgi ka dɛmɛ la tugun. Ani komi ne tun b’a fɛ sɔbɛ sɔbɛ la ka kɛ Jehova teri ye, ne tun cɛ sirila ka kolo a ka sariyaw ye. Hakilitigiya nafaman min be Ala ka Kuma kɔnɔ, n’o sababu tun tɛ, ne lanen b’a la ko ne tun ye n’ yɛrɛ faga ka ban.”—Zab. 119:92.
3 Bibulu be dan na ni bi ka gafe caamanba ye. A be ‘siyaw, bɔnsɔnw, mɔgɔ sifaw, ni kaanw bɛɛ’ sama ( Jira. 7:9). Ala ka sagoya ye ko “mɔgɔ sifa bɛɛ ka kisi, ani u ka tiɲɛn tigitigi lɔnniya sɔrɔ.” (1 Tim. 2:4, NW ). O kama, an man kan k’a miiri abada ko mɔgɔ dɔ ka bɔyɔrɔ kosɔn, a tɛna a mako don kibaro duman la. Nka, an ka Masaya cira fɔ mɔgɔw bɛɛ ye. Tuma o tuma, n’an be se, an ka sin k’a yira Bibulu yɛrɛ kɔnɔ.
4 An ka sinsin Bibulu kan: Waajuli kɛtɔ, cogoya caaman b’an bolo ka baara kɛ ni Bibulu ye. Zurunaliw yiratɔ, an k’a ɲini ka baara kɛ ni bibulusenw ye, minw be sɔrɔ zurunaliw yiracogo barokun kɔnɔ. Gafew yiratɔ kalo la, dɔw y’a ye ko nafa b’a la ka bibulusen dɔ ɲɛnatɔmɔ koɲuman, ani k’a kalan baro daminɛ na. Viziti kuraw kɛtɔ tuma o tuma, an ka bibulusen kelen wala damanin dɔw kalan walisa k’an lamɛnbaga dɛmɛ a ka lɔnniya tigitigi sɔrɔ dɔɔni dɔɔni ka taga. Bibulukalan kɛtɔ ni mɔgɔ dɔ ye, an ka baro basigi vɛrise jɔnjɔnw kan, ani an ka sinsin u kan. N’an ma bɔ waajuli kama soo ni soo, an ka Bibulu dɔ ta an bolo walisa ka seereya di mɔgɔw ma ni cogoya sɔrɔla an fɛ.—2 Tim. 2:15.
5 Ala ka tiɲɛn Kuma be nɔɔ barikaman to mɔgɔw kan. An ka mɔgɔ wɛrɛw dɛmɛ u ka nafa sɔrɔ a la. Waajuli kɛtɔ, koow cogoya mana bɛn, an ka baara kɛ ni Bibulu ye.—1 Tes. 2:13.
[Study Questions]
1. Kunnafoni nafaman jumanw be sɔrɔ Bibulu kɔnɔ?
2. Bibulu be mɔgɔw ka ɲɛnamaya fisaya cogo di?
3. Mun na an man kan ka sigasiga ka Bibulu ka cira fɔ mɔgɔ wɛrɛw ye?
4. Seereya ditɔ mɔgɔw ma, an be se ka baara kɛ ni Bibulu ye cogo juman na?
5. Mun na an ka kan k’an jija ka baara kɛ ni Bibulu ye waajuli la?