Yala i be Ala ka Kuma lafasa wa?
1 Nin duniɲa nin kɔnɔ mɔgɔw ka teli ka Bibulu mafiɲɛya. Nka kerecɛn lakikaw kɔni be Ala ka Kuma lafasa ni kisɛya ye. An lanen b’a la tigitigi ko “Kitabu kuma bɛɛ kɛra a sɛbɛnnikɛlaw kɔnɔ Ala dafiɲɛ fɛ.” O kama an sɔnna Yesu Krista ka seereya ma. Jehova delitɔ, a y’a fɔ ko: “I ka kuma ye tiɲɛ ye.” (2 Tim. 3:16; Yuh. 17:17). Cogo di an be se ka Ala ka Kuma lafasa bɛrɛbɛrɛ?
2 I ka bibulusenw degi k’u lɔn: Siga t’a la, Yesu y’a sɔbɛ don ka Ala ka Kuma kalan. O kɛra sababu ye a sera ka mɔgɔw kalan ni Ala ka Kuma ye a ka cidenya baara kuru bɛɛ la (Luka 4:16-21; 24:44-46). Cogo juman na an be se ka to ka bibulusen nafaman dɔw don ka mara an hakili la? An be se k’o kɛ an kɛtɔ ka Bibulu kalan loon o loon ani ka miiri bibulusen dɔ kan min kɔni y’an jija ani a be se k’an dɛmɛ cidenya baara la. N’an be lajɛnw labɛnna, bibulusen minw kofɔra, an ka kan k’u kalan Bibulu yɛrɛ kɔnɔ ani n’a sɔrɔ an be se ka ɲɛfɔli dɔ labɛn u kan. Lajɛnw na, ni kalankɛla be bibulusen dɔ kalanna, an ka kan ka tugu o kalan kɔ an yɛrɛ ka Bibulu kɔnɔ. Ka bibulusenw degi k’u lɔn, o bena an labɛn ka ‘tiɲɛ kuma faranfasi cogo sɛbɛ la.’—2 Tim. 2:15.
3 A to mɔgɔw ka Bibulu ka fɔta lɔn: Cidenya baara kɛtɔ, an ka kan k’a to mɔgɔw ka Bibulu ka fɔta lɔn. Ɲɛyirali fɛ, ni koow cogoya bɛnnen be, an ka kan k’a ɲini ka bibulusen dɔ kalan ani ka baro kɛ o kan ni lamɛnnikɛla ye. Ni a ye ɲiningali dɔ kɛ wala a ye sɔsɔli dɔ lawuli, a ka fisa an ka Bibulu ta k’a jaabi. Ni lamɛnnikɛla bolo degunnen lo, o bɛɛ n’a ta an be se ka bibulusen dɔ ka miiriya bɔ kɛnɛ kan an kɛtɔ k’a fɔ ko: “Sanni ne ka taga, a to ne ka bibulusen kelen kalan i ye.” Tuma o tuma n’a be se ka kɛ, an ka sin ka kalan kɛ Bibulu yɛrɛ kɔnɔ ani an k’a to lamɛnnikɛla ka tugu o kalan kɔ Bibulu kɔnɔ.
4 Tuma min na u ye bibulusen dɔw yira cɛɛ dɔ la ka seereya kɛ ko Ala tigiya saba kalan ye ngalon ye, a kabara k’a fɔ ko: “Ne be to ka taga Egilizi la ne sii bɛɛ la. Ne do m’a lɔn tiɲɛn na ko Bibulu ye nin kuma fɔ.” A sɔnna Bibulu kalan na joona-joona. Yesu tun y’a fɔ ko a ka sagaw tun bena ale kaan mɛn (Yuh. 10:16, 27). Cogo fisaman min na mɔgɔ kɔnɔgwɛw be se ka tiɲɛn lɔn, o ye n’an be sin k’a yira u la Bibulu yɛrɛ kɔnɔ. O kama an ka kɛ Ala ka tiɲɛn Kuma lafasabagaw ye.